ما يليق وما لا يليق
اسكتش مواقف للبنات على كل ما يليق ولا يليق فى التصرف والحديث والكنيسة والخارج وان كل بنت لازم تاخد بالها من تصرفاتها وحياتها وكمان فى البيت وخارج البيت والكنيسة ونظرة الانسان للاخر بطريقة احترام
وفى نهاية الاسكتش كل بنت تقول الاخطاء اللى وقعت فيها الشخصيات دى ايه وممكن نعالجها ازاى .ممكن تعملوه فى الافتتاحية فى الاجتماعات او الرحلات والمؤتمرات لخطورة هذه المواقف .
تدخل احد البنات تتكلم مع الاجتماع وتشرح معنى الاسكتش .
النهارده يا بنات هنقدم ليكم اسكتش مواقف كل اسكتش قصير لا يتعدى عشر دقايق بموقف معين ودى شخصيات كل شخصية عليكم تقولوا ايه الصح وايه الغلط او ايه المفروض يليق بكدا او لا يليق ونستفاد من كل موقف .
الموقف الاول هنبدا بيه دلوقت وتشوفوا وتحللوا كل موقف .
تدخل سهير وتنادى على مريم وهى بداخل المطبخ .
سهير : يا مريم يا مريم .
مريم : انا هنا يا سهير تعالى انا المطبخ فينك يا شيخة مش باينة خالص .
سهير : اشغال يا ست مريم محدش فاضى لحد خالص الايام دى .
مريم : اه شكل وراكى حاجه ومخبية عليا ههههههه .
سهير : بس اسكتى لاحسن مامتك تسمعنا ده لسه فاتحه ليا الباب
مريم : ما تخفيش يا ستى محدش هيسمع احكيلى احكيلى
سهير : دى اسرار يا مريومة اسرار محدش يعرفها خالص هههههههه
مريم : اسرار ايه بس انتى متعرفيش انى مش بقول لحد حاجه خالص وكمان سرك فى بير يا بنتى .
سهير : فى بير طيب يا ستى اما نشوف البير دى هتودينا لحد فين .
مريم : احكى بقى اى اللى حصل وبالتفصيل كمان الممل
سهير : كمان بالتفصيل طيب يا ستى شوفتى الولد اللى فى الكنيسة اللى اسمه مينا ده
مريم : مينا مين قصدك اللى بنشوفه فى الكنيسة الخادم معانا يعنى ؟
سهير : ايوه بعتلى على الفيس طلب صداقة وبنتكلم فى الفيس وانا بكلمه وهو عايز يرتبط بيا وقالى انه هيستنى لحد ما اخلص دراسة وكدا يعنى .
مريم : يرتبط بيكى ازاى قصده يتجوزك ؟
سهير : اكيد يعنى اومال ايه ؟
مريم : بس انتى لسه قدامك الدراسه كم سنه تانى وحوارت كتير المفروض تاخدى بالك الاول من كدا وتهتمى بدراستك ومذاكرتك شوية .
وثانيا ماما فى البيت عارفه انك بتكلميه فى حاجه زى كدا ؟
سهير : لا طبعا انا مش بحكى لحد الحاجات دى وده كلام فيس يعنى عادى مفيهاش حاجه كل البنات بتتكلم كدا عادى اصحاب ولا بلاش .
مريم : طيب يا ستى المفروض الحاجه دى يعنى والكلام الفيس ده بالليل ده هيوصلك لفين ؟ وثانيا اخرة الكلام ده ايه المفروض ده هيعمل ايه دلوقت ؟
سهير : انا مش بكلمه كتير يعنى بس بدأت افكر فيه ومش مركزة خالص بصراحه فى المزاكرة دلوقت وانا لسه داخلة الجامعة دلوقت والموضوع ده مأثر عليا شوية وخايف اقوله كلمة يزعل ومش يكلمنى تانى .
مريم : طيب انا عندى فكرة ممكن اقولها ليكى .
سهير : ايه هى قولي ؟
مريم : ممكن تقولى لاب اعترافك وتحكى معاه فى الموضوع ده وتشوفى هل ده صح والمفروض تعملى ايه ؟
سهير: اب اعترافى بس انا بخاف احكى معاه فى الموضوع ده ممكن يقول لماما فى الكنيسة وغير كدا ببقى محرجة اما يوعظ بحس ان الوعظة بتاعته والموضوع بتاعه قاصدنى انا فبخاف اتكلم معاه بصراحه كدا .
مريم : بس ده اب اعترافك مينفعش نخبى عليه حاجه يعنى والمواضيع اللى زى دى مينفعش تسكتى عليها عشان متتعبيش وده سر من اسرار الكنيسة لازم ناخد بالنا من كدا وانتى بتخبى على اب اعترافك اومال فى البيت محكتيش ليهم بردو .
سهير : هو طلب منى يقعد معايا فى يوم ونحكى مع بعض يعنى ونشوف نعمل ايه بس بعيد عن الكنيسة عشان محدش يشوفنا يعنى يعملنا فضيحة مش ناقصة يعنى .
مريم : ويقعد معاكى على اساس ايه يعنى مش اما تشوفى راسك من رجليكى وتعرفى تركزى فى دراستك .
سهير : انا اساسا تايهه شويه بس لازم احط النقط على الحروف زى ما بيقولوا .
مريم : يعنى هتقولى لمامتك فى البيت الموضوع ده ولا هتقولى لأب اعترافك ؟
سهير : نووو ولا ده ولا ده هحاول اشوف حل معاه على الفيس اما نتكلم باليل كدا ونشوف هنعمل ايه ؟
مريم : فيس تانى مش قلنا بلاش الفيس ده دلوقتى هى ناقصة تعب اعصاب .
سهير : احنا هنتقابل فى كافيه بكره عادى فى الظهر بعد الكلية واحنا على الواقف كدا
مريم : كافيه ايه با بنت سيبك من المواضيع دى دلوقت .
سهير : خلاص بقى انا هحل الموضوع لوحدى بقى واوعى تقولى لحد خالص لاحسن تحصل مصيبة .
مريم : متخافيش يا بنتى سرك فى بير فى بير قولتلك .
سهير : يلا بقى عشان اروح ومش اتأخر على البيت ده انا مقولتش لماما اساسا طلعت من الكنيسة عليكى علطلول .
مريم : خلاص ماشى يلا سلام .
سهير : يلا سلام سلام .
تخرج سهير ومريم للخارج ويغلق الستار
تدخل سهيرواختها سارة الكبيرة للداخل وسهير تبكى
سارة : كدا يا سهير ينفع اللى عملتيه ده
سهير: معملتش حاجه يا ماما يعنى اكون عملت ايه ؟
سارة : ازاى تقابلى حد من غير حتى ما تقولى ومين ده اللى قابلتيه احكيلى على كل حاجه
سهير تفضل تبكى شويه تانى
سارة : انا اختك الكبيرة يا حبيبتى المفروض تحكيلى على كل حاجه ومينفعش تخبى عليا وحتى امك متعرفش الموضوع ده خالص وانا مرضيتش اقولها عشان متتخانقش معاكى .
سهير : هو انا عملت مصيبة يعنى ولا ايه ؟
سارة : مش حكاية مصيبة حكايه انك مقولتيش لحد فى البيت ثانيا اللى شافكم دلوقت اكيد حكى لكل البلد وعمل ازاعة فى الشوارع وكل اللى هيتكلم دلوقت ميبقاش غير عليكم ينفع كدا يقولوا سهير بتطلع بمزاجها وتلف .
سهير: انا كنت طالعه من الكلية وقابلته فيها حاجه دى وعزمنى فى الكافيه .
سارة : طيب يعنى لو قولت لماما دلوقت هتعمل ايه طالما شيفاها حاجه صغيرة .
سهير : لا لا متقوليش ليها معلش .
سارة : طيب هسألك سؤال صغير وجاوبى بصراحه .
سهير : اتفضلى بس يكون بعيد عن كدا .
سارة : صاحبتك مريم عارفه بالموضوع ده ؟
سهير : عادى صاحبتى اكيد بحكى معاها ونفرفش شوية عادى قولتلها باين فى مرة .
سارة : طيب يعنى اختك ولا صاحبتك ؟
سهير : بس ده موضوع وده موضوع تانى انتى بتلفى عليه ايه .
سارة : طيب من غير لف ولا دوران مين هيخاف عليكى اكتر اختك ولا صاحبتك ؟
سهير : طبعا اختى يعنى بالمفهومية كدا .
سارة : طيب يعنى الاولى تحكى للاقرب ليكى ولا ايه .
سهير : خلاص يا اختى انا المره الجايه هحكيللك على كل حاجه ومش هخبى عليكى حاجه .
سارة : طالما فيها مرة جايه انا هقول لماما وهتشوف معاكى حل
سهير : استنى استنى اوعى
ويخرج الاثنين للخارج وينتهى الاسكتش
تخرج الخادمة تسال البنات اسئلة على الاسكتش .
1- ما هى الاخطاء اللى وقعت فيها سهير ؟
2- هل تعتقد ان مريم حكت لحد فى الكنيسة من كلامها مع سهير ؟
3- هل تفكير سهير من ناحية اب اعترافها صح ؟
4- هل ممكن تكون ام سهير صعبة لدرجة انها خايفة تحكى ليها ؟
5- هل الصداقة اننا نحكى لاصحابنا على مواضيع زى كدا
6- هل الولد اللى كلمته مريم ممكن يكون صادق فى كلامه ؟
ولو فى اسئلة تانى فى الموضوع او حلول ممكن تعطوها ليهم عشان يفهموا خطورة الموقف . وازاى نعالج المواقف دى الصح .