اسكتش عيد الميلاد فى السماء

اسكتش عيد الميلاد فى السماء

اسكتش خيالى عن عيد الميلاد فى السماء وعن علاقة القديسين بالرب يسوع المسيح من خلال شخصيات احداث الميلاد والتى لها علاقة بأحداث قصة الميلاد .

يمكن كلنا نحتاج اننا نتخيل فقط او نشعر يوم فقط ماهى حياتنا فى السماء وكيف يمرالوقت ومدى فرحة السمائيين بكل لحظة فى السماء مع الرب يسوع لقد صدق القديس بولس الرسول عندما قال ما لا تراه عين ولم تسمع به اذن وما لم يخطر على بال انسان ما اعده الله للذين يحبونه . فعلاقتنا فى السماء ليس لها حدود نتمتع بحضور الله الى الابد ومن هنا ظهرت هذه الفكرة قد تجعل الانسان يفكر لو الى لحظات كم تكون الابدية انها ليس موضوعات نقوم بدراستها او معلومات نحفظها انها حياتنا على الارض فعندما نحيا السماء على الارض من صلوات وتسابيح ومزامير والحان سوف نشعر إننا فى السماء .

بداية الاسكتش وظهور السمائيين 

يبدأ الاسكتش بتجهيز وتزيين  قاعة المسرح وضع كرسى عليه صليب كبير 
بداية الاسكتش يقوم بتشغيل مديح نسجد لإسم الثالوث الرب الاله العظيم الواحد فى اللاهوت المثلث الاقانيم ومن ثم تدخل مجموعة من الملائكة  تجهز القاعة ويتحدثون مع بعض من اجل بداية عيد الميلاد وهم الملاك ميخائيل والملاك جبرائيل .

الملاك ميخائيل: ما اعظم اعمالك يارب كلها بحكمة صنعت .

الملاك جبرائيل: ملأنه الارض من غناك .

الملاك ميخائيل: النهاردة يوم عظيم فى تاريخ البشرية .

الملاك جبرائيل : طبعا اليوم عيد ميلاد مخلص البشرية بداية حياة جديدة للبشر .

الملاك ميخائيل :انت يا ملاك جبرائيل قمت بعمل عظيم فى قصة الميلاد .

الملاك جبرائيل :اكيد البشرية كانت تحتاج لمخلص ولكن لما ربنا يسوع المسيح جه الوقت المناسب اللى حسب حكمته تواضع العظيم ونزل على الارض من أجل خلاص ادم وزريته كلها وانا فى الوقت ده استخدمنى الرب عشان البشارة وكنت مبشر القديسة والدة الاله العذراء مريم ومبشر ايضا للرعاة ومبشر بميلاد القديس يوحنا المعمدان .

الملاك ميخائيل : احنا نهادره بنجهز قاعة السما من اجل الاحتفال بعيد الميلاد وكل قديس هيحكى معانا عيد الميلاد كان عامل معاه ازاى .

الملاك جبرائيل : اكيد عيد ميلاد الرب يسوع المسيح له المجد مهم فى تاريخ البشرية .

الملاك ميخائيل : دلوقت هيدخل اول واحد فى تاريخ البشرية اكيد  كل العالم يعرفه لانه هو بداية خليقة الله وربنا من اجل محبته للانسان تواضع ونزل لخلاصه .

يدخل ابونا ادم الى داخل المسرح بموسيقى .

ابونا ادم : ازيكم يا اولادى انتوا عارفين انا مين اكيد انا ادم وكمان انا اول رجل وضع رجله على الارض وبداية البشر وطبعا انا اتخلقت وكمان جاءت امكم حواء بعد كدا  وكانت الحياة فى الجنة حلوه جدا وانا وكنت مبسوط خالص بيها لكن الحية وطبعا هو الشيطان وبمخالفة وصية ربنا اطردنا من الجنة ونزلنا على الارض وزعلنا كتير لكن ربنا وعدنا انه نسل المرأة يسحق رأس الحية وفعلا فضلنا مستنين كتير خالص لحد اليوم ده وربنا نزل على الارض وتواضع عشان يخلصنى ويخلص اولادى طبعا اللى هما كل البشرية اللى جات بعدى واتولد عشان خاطرنا وطبعا النهاردة زى ما انتوا عارفين احنا بنحتفل بعيد ميلاد مخلصنا مخلص البشرية كلها عشان خاطرنا .

الملاك ميخائيل : اكيد يا ادم احنا مبسوطين خالص ان ربنا عمل كدا حاجه حلوه عشان البشر وعشان يخلصهم من الشيطان وكل ده عشان بيحب الانسان محبة كتير خالص .

الملاك جبرائيل : ودلوقت معانا تانى واحد من بداية تاريخ الميلاد هيدخل يعرفكم بنفسه.

يدخل يوحنا المعمدان بلبسه وشخصيته .

يوحنا المعمدان : سلام يا اولادى اكيد عايزين تعرفوا انا مين انا يوحنا ابن زكريا وزى ما الناس عرفتنى انا يوحنا المعمدان وطبعا حياتى زى ما انتوا عارفين ابويا زكريا وامى اليصابات كانوا ناس بسيطة ومكانش معاهم اى اطفال لحد ما السن اتأخر بيهم ولكن فى يوم من الايام ظهر الملاك جبرائيل لأبويا وبشره بميلادى وانى هخلى الشعب يستعد عشان اما يجى الرب يسوع يلاقى الشعب مستعد عشان يقبله وطبعا ابويا مكانش مصدق وقعد فترة مقدرش يتكلم صامت لحد ما اتولدت وطبعا بعد فترة عشت فى الصحراء والبرارى لحد ما كبرت وبدأت اعمد الناس واقولهم توبوا واعملوا اعمال كويسه عشان ربنا يبقى مبسوط بيكم ولكن فى ناس سمعت وناس رفضت ومشيت بعيد وفى يوم من الأيام جه بنفسه الرب يسوع وانا عمدته بنفسى فى نهر الاردن وكان صوت من السما هذا هو ابنى الحبيب الذى به سررت وبعدين طبعا هيردوس الملك قطع رأسى واستشهدت عشان قولت الحق ومرضيتش اقول حاجه مش صح واحنا لازم تعلم اننا نقول الحق دايما ومش نكذب عشان كلنا اللى فى السماء دلوقت مش بنعمل اى حاجه وحشه وكلنا قديسين وطبعا كانت حياتى على الارض قصيرة لكن اخدت اعظم عطية عمدت ربى يسوع المسيح وانا مبسوط النهاردة معاكم عشان نحتفل بعيد الميلاد فى السماء زى ما انتوا بتحتفلوا فى الارض كدا وكلنا مبسوطين عشان ربنا معانا دايما وهيفضل معانا للأبد .

الملاك جبرائيل : طبعا يا يوحنا اكيد كل اللى بيروح السماء بيبقى فرحان عشان بيبقى مع السيد المسيح دايما وهو اللى خلقنا كلنا وفرحانين كتير بكدا وانا اما جيت وبشرت زكريا ابوك بميلاد كنت مبسوط خالص عشان انت اللى هتخلى الشعب يبقى مستعد وتهيئ الطريق للسيد المسيح وفعلا الرب يسوع نفسه جه واتعمد وانت شوفت كدا بنفسك .

الملاك ميخائيل : ايوه يا ملاك جبرائيل ومتنساش ان الرب نفسه قال عن يوحنا انه اعظم مواليد النساء والشعب كان بيحبه عشان كان عايز الناس تتوب وتبقى كويسه .

الملاك جبرائيل : ودلوقت معانا حد تانى جاى يحتفل معانا بعيد الميلاد السماوى انتوا اكيد مستنين تعرفوا مين وهو بنفسه هيجى ويقولكم كل حاجه اتفضل .

يدخل يوسف النجار الى المسرح مع موسيقى مناسبة او ترنيمة .

يوسف النجار : سلام يا اصحابى انا مبسوط النهارده معاكم فى عيد الميلاد فى السماء وكلنا بنبقى مبسوطين اما نتكلم على ربنا يسوع المسيح انا طبعا كان ليا دور عظيم فى الارض ايام ميلاد المسيح له المجد وكنت خطيب القديسة والدة الاله العذراء مريم اكيد عرفتوا انا مين ايوه انا يوسف النجار وطبعا انا مبسوط خالص ان ربنا اختارنى عشان ابقى فى المهمة العظيمة دى واكون خطيب العذراء مريم وطبعا فى لحظة الميلاد احنا فضلنا ندور على مكان نرتاح فيه عشان كانت خلاص القديسة العذراء مريم هتولد وللاسف ملقيناش مكان غير المذود اللى بيبقى فيه الحيوانات شفتوا اد ايه تواضع ربنا يسوع المسيح يا اولادى هو بنفسه اللى خالق كل حاجه تواضع ازاى ومرضيش يتولد فى قصر ولا بيت كبير واتولد فى مزود صغير عشان يعلمنا اننا نشكر دايما ونتعلم التواضع ومش نتكبر على حد ومنبقاش احسن من حد وكمان اخدت بركة عظيمة اما رحنا وهربنا لمصر وكنت بشيل الطفل يسوع بنفسه وطبعا حاجات كتير حصلت معانا فى الاخر احنا كلنا ادينا بنحتفل بعيد الميلاد السماوى ومبسوطين خالص خالص .

الملاك ميخائيل : اكيد وكلنا يا يوسف مبسوطين خالص عشان احنا فى السماء علطلول دايما مع ربنا ونتمنى كل الناس تكون فى السماء معانا وتعمل اعمال كويسه عشان تروح السماء وميبقاش اى حاجه وحشه فى حياتهم .

الملاك جبرائيل : طبعا احنا دلوقت معانا شخصية عظيمة هى القديسة والدة الاله القديسة العذراء مريم هى ام النور لانها استحقت انها تبقى ام الرب يسوع اتفضلى كلنا منتظرين

تدخل القديسة العذراء مريم مع موسيقى او ترنيمة ليها مناسبة .

القديسة العذراء مريم : سلام يا اولادى انا مبسوطة جدا انكم النهارده موجودين فى الكنيسة وانا بحبكم جدا ودايما بصلى عشانكم فى السماء وكلنا النهاردة فى السماء بنحتفل بعيد ميلاد الرب يسوع ومبسوطين خالص زى ما انتوا مبسوطين وطبعا زى ما انتوا عارفين كل البشرية كانت مستنية السيد المسيح اللى هيخلصها من ابليس وطبعا الملاك جبرائيل جه وبشرنى بميلاد السيد المسيح وانى كل الناس هتقولى طوباكى وانا طبعا كنت بسمع الكلام ومش بعترض على حاجه واستحملت حاجات كتير وهربنا لمصر ورجعنا تانى اسرائيل وكمان فى ميلاد الرب يسوع ملقيتش مكان عشان اولد فيه غير المزود شوفتوا ازاى عظمة ربنا وتواضعه احنا كلنا مبسوطين خالص اننا معاكم النهارده وهنحتفل معاكم بعيد الميلاد  وطبعا دلوقت كلنا منتظرين حاجه حلوه كتير هتيجى عشان تحتفل معاكم بعيد الميلاد .

تضئ انوار الكنيسة وتشغل لحن سبحوه الله ويدخل السيد المسيح فى تصفيق حار ويقعد على الكرسى وتقعد عن يمينه القديسة العذراء مريم  .

السيد المسيح : سلام يا اولادى طبعا انا فرحان كتير بيكم النهارده عشان جايين الكنيسة بنفسكم تحتفلوا بعيد الميلاد المجيد وانا بحبكم كتير خالص عشان كدا نزلت على الارض واتجسدت واتحملت حاجات كتير عشان اخلصكم من الموت واتصلبت عشانكم كل ده عشان انا بحبكم كتير واتمنى انتوا كمان تحبونى وتعملوا حاجات كويسه وتفضلوا تقعدوا فى بيتى فى الكنيسة باحترام ومينفعش نضرب بعض او نتخانق وكمان نحترم القداس والصلاة وتصلوا فى البيت دايما وتفتكرونى دايما فى حياتكم عشان انا دايما بكون معاكم ومش بنساكم خالص حتى لو كل الناس نسيوكم انا عمرى مش انساكم انا اتولد فى مزود عشان تتعلموا التواضع ونبقى كلنا بنحب بعض ونتعلم نبقى كويسين وطبعا كل القديسين الحلوين اللى فى السماء دلوقت بيصلوا عشانكم ومستنين فى يوم من الايام تيجوا معاهم وتبقوا كلكم مع بعض وتبقوا فرحانين كدا زيهم عشان كدا عايزكم دايما تحبوا بعض وتصلوا كمان عشان بعض وتسامحوا بعض ونبقى دايما نحب الخير . 

يلا بقى دلوقت كلنا هنحتفل بعيد الميلاد مع بعض .

وتبدأ ترنيمة عيد الميلاد  وتقفل الستار .