اسكتش نوح والفلك
نوح وبناء الفلك
المقدمة الرئيسية للقصة :
بدايةالاسكتش هى قصة توضيحية بسيطة للاطفال عن بناء فلك نوح وعلينا توضيح ما يلى :
1- قصة ابينا نوح من اعظم القصص التى توضح عناية ربنا بالبشر .
2- توعية الطفل بان ربنا يسوع لا يحب الشر ويحب الخطاة ويصبر عليهم عشان يرجعوا ويقدموا توبة .
3- توعية الطفل بأهمية الطاعة وان نسمع كلام ربنا من خلال كلام الكتاب المقدس وابونا فى الكنيسة وبابا وماما .
4- توعية الطفل باهمية الكتاب المقدس وان لازم اما نتعلم القراءة نقرى فى الانجيل ونحفظ الحان فى الكنيسة .
البداية قصة نوح والفلك عرايس
مناسب لجميع مراحل ابتدائى
الشخصيات كركر كوكى والاستاذ نوح
كوكى تنادى على كركر
كوكى : يا كركر يا كركر فينك يا كركر
كركر : انا هنا يا كوكى انتى فينك بس كدا مش باينه
كوكى : انا تحت البيت يا كركر بنادى عليك من بدرى انت بتعمل ايه
كركر : انا كنت نايم يا كوكى وتعبان خالص وجسمى مكسر وعايز انام تانى
كوكى : كفايه نوم يا كركر هتتعب كدا لازم نروح نذاكر عشان ننجح فى المدرسه ونبقى اولاد شاطرين
كركر : حاضر يا كوكى هجيب الكتب وانا جاى اهو عشان اجهز الكتب ونذاكر
كوكى : متنساش هات معاك الكتاب المقدس عشان نقرى فيه قبل ما نروح نذاكر يا كركر
كركر : حاضر يا كوكى اهو جاى بسرعه
ينزل كركر بسرعه
كركر ايوه يا كوكى انا اهو جيت يلا بينا نروح عند الاستاذ نوح
يمشى كركر وكوكى ويوصل لبيت الاستاذ نوح
يا استاذ نوح يا استاذ نوح
الاستاذ نوح تعالوا يا اولادى انا منتظركم اهو تعالوا عشان نقرى فى الكتاب المقدس
يدخل كركر وكوكى
كركر : ازيك يا استاذ نوح عامل ايه
الاستاذ نوح : نشكر ربنا يا كركر انا كويس يلا بقى عشان نقرى فى الكتاب المقدس عشان تروحوا تذاكروا
كوكى : اهووو معانا الكتاب المقدس يا استاذ نوح يلا بينا
الاستاذ نوح : قبل ما نقرى يا اولاد فى الكتاب المقدس لازم نرسم علامة الصليب
باسم الاب والابن والروح القدس اله واحد امين
الاستاذ نوح : هنقرى يا اولادى من سقر التكوين الاصحاح السابع
وقال الرب لنوح ادخل انت وجميع بيتك الى الفلك لانى اياك رايت بار فى هذا الجيل
مجدا للثالوث الاقدس
الاستاذ نوح : هناخد الايه الحلوه دى بس النهارده يا اولادى
كركر : ياااه يا استاذ ده حلوه خالص وكمان اسمه نوح على اسمك صح كدا
الاستاذ نوح : ايوه يا اصحابى اسمه ابينا نوح زى اسمى بالظبط
كوكى : طيب يا استاذ نوح يعنى ايه الفلك ده يا استاذ وممكن تقولنا قصة نوح
الاستاذ نوح : الفلك يا اصحابى يعنى سفينة كبيره خالص خالص وبتشيل ناس كتير وحيوانات كتير خالص
كركر : طيب احكيلنا يا استاذ بسرعه خالص عشان عايزين نسمع قصة نوح
الاستاذ نوح : حاضر يا اولادى يلا بينا
الاستاذ نوح كان يا اولادى زمان خالص مالص بعد ابونا ادم وحواء ان الناس بدات تكتر فى الارض وبدات الناس تعمل حاجات وحشة خالص تشتم وتكدب ووتضرب بعض ويسرقوا وحاجات كتير خالص وربنا قال مينفعش كدا الناس تعمل الحاجات دى
كركر : وبعدين يا استاذ
الاستاذ نوح : وبعدين ربنا قعد يدور على حد كويس خالص لحد ما لقى نوح قال يااااه اهو واحد اسمه نوح كويس خالص ومبيعملش حاجات غلط زى الناس الوحشة التانيه
راح ربنا قال لنوح يا نوح الناس بدات تعمل حاجاات وحشه خالص وتضرب وتقتل وتشتم وكمان بيعبدوا الاصنام لازم اموتهم خالص
راح نوح قال لربنا ياااه يارب طيب وليه كدا
ربنا قاله عشان هما مش بيعملوا حاجات كويسه وبيقتلوا بعض وانا استنيت عليهم كتير ومحدش راضى يتوب
راح ربنا قال لنوح عايزك يا نوح تبنى سفينة كبيره خالص وتحط فيها اولادك ومراتك وكمان تحط فيها الحيوانات
الاستاذ نوح : وبعدين يا اولاد بدا نوح يعمل فى السفينة اللى هى الفلك والناس فضلت تضحك عليه كتير
راح ربنا قاال لنوح انا هنزل مطر على الارض كلها واخليها تتملى ميه وتغرق فلازم تخلص السفينة دى عشان تدخل فيها يا نوح
وفعلا نوح خلص السفينة ودخلت عيلة نوح السفينة والحيوانات كلها دخلت فيها
كركر : ياااه يعنى يا استاذ الاسد دخل فى السفينة وما اكلش نوح
الاستاذ : لا طبعا يا كركر الاسد كان طيب وربنا قاله اوعى تاكل حد خالص ربنا قادر على كل شى
كوكى : وبعدين يا استاذ وبعدين يا اولاد دخل السفينة نوح هو والعيلة وقفل الفلك عليهم
بعدين بدا ربنا ينزل مطر كتير والناس تجرى وتجرى لحد ما المطر بدات يعلى والميه غرقت البيوت وصلت للجبال وماتت الناس كلها
كوكى : يااااه لحد الجبال
الاستاذ نوح ايوه يا كركر وماتت الناس كلها كلها مفضلش غير نوح واسرته بس فى الفلك
وقعدت الميه 40 يوم على الارض
كوكى : ياااه يا استاذ كل ده
الاستاذ نوح : ايوه يا اولاد صح وبعدين فضل نوح شويه تانى لحد ما الميه قلت وخرج من الفلك
كوكى ده اكيد مالقاش حد خالص بره
الاستاذ نوح ايوه صح وفضل يخرج مع الحيوانات لحد ما خرجوا كلهم
يلا بقى نتعلم ايه من قصة نوح دى
كوكى : نتعلم يا استاذ اننا مش نزعل ربنا خالص مالص ونصلى كتير بردو
كركر : ايوه صح ومش نخاصم حد ولا نضرب بعض انا واصحابى
الاستاذ نوح : ايوه برافو يا اولاد وكمان المفروض نسمع كلام بابا وماما ونصلى ونذاكر الدروس بتاعتنا
ونروح الكنيسه كمان ونتناول ونصلى ونحفظ الحان عشان بابا يسوع يبقى مبسوط بينا خالص
كركر وكوكى صح يا استاذ احنا هنسمع الكلام وهنروح الكنيسه ومدارس الاحد ونتعلم كتير كتير كتير
الاستاذ نوح برافو خالص يلا بقى عشان تروحوا تذاكروا الدروس بتاعتكم وتبقى شاطرين
كركر : حاضر يا استاذ نوح باااااااااااااااااى باااااااااااااااى
الاستاذ نوح باااااااااااااااااااااااااااااااى
فى نهاية الاسكتش نقدم بعض الاسئلة عن القصة وعن حياة نوح من خلال معرفة القصة يفهم المخدوم قصة نوح وقصة الفلك وازاى ربنا كان حافظ نوح بداخل الفلك وانه عمره ما تركه ودايما كان معاه ونتعلم عدم الخوف ومش نخاف من اى حاجه عشان ربنا معنا ودايما محافظ علينا .
وطبعا قصة نوح من القصص المفيدة اللى بنتعلم منها حاجات كتير كلنا عارفين ازاى نوح كلمه الله وقاله ابنى الفك بالمواصفات اللى عطاها ليه وطبعا شرور العالم ذادت والخطايا كتيره وربنا بيصبر على الانسان كتير ينظر ان يرجع ويقدم توبة وده حصل فى قصة يونان واهل نينوى كان ربنا خلاص هيهلك المدينة ولكن يونان قالهم بعد اربعين يوم هتنقلب المدينة وكل اهل البلد سمعوا الكلام وقدموا توبة وصاموا عشان كدا ربنا قبل توبتهم .
ولكن ايام نوح الناس حتى مفكروش ده اللى بيعملوه صح ولا غلط لكن استهتروا بكلام نوح وفكروا انهم هما الصح ونوح هو الغلط وصبر كتير عليهم ربنا عشان يرجعوا ويتوبوا لكن مفيش فايدة .
عندما انتهى نوح من بناء الفلك اخد عيلته جوه الفلك والحيوانات اللى اختارها دخل بيها الفلك ربنا امطر على الارض المطر واستمر ايام كتير وكل الناس اللى بره الفلك ماتت عشان مفكروش يرجعوا ويتوبوا وكلهم هلكوا وماتوا .
واحنا من خلال قصة نوح نتعلم ان لازم نعمل حاجات كويسة ترضى ربنا ونصوم ونصلى ونقدم توبة ونتناول الحاجات دى لازم نتعلم تبقى فى حياتنا ونتعلم ازاى نبقى كويسين فى البيت والشارع والكنيسة وكل مكان نروحه لازم الناس تشوفنا تقول علينا دول بتوع ربنا عشان كدا هما كويسين .
ربنا بيقبل اى انسان هيجى ليه ويقدم توبة ومستنى كل الناس تيجى وتقدم توبة على كل حاجه وحشه احنا لازم نتعلم حياة التوبة المستمرة يعنى مهما وقعنا فى خطايا لازم نرجع بسرعه ونتوب ونقول سامحنا يارب .