اسكتش نونا مش هتكدب تانى

اسكتش نونا والكذب

نونا مش هتكدب تانى ونشوف نهاية  الكذب

مقدمة الاسكتش :- 

فى بداية القصة علينا ان نهتم بالمخدوم وكيفية توصيل اليه ان الكذب شئ غلط وانه لا يجب عليه الكذب 

واحنا لازم نعرف كل الاطفال وخصوصا الاطفال السن الصغير ان الكذب شئ غلط ولازم ناخد بالنا من كل كلمة 

 الكتاب المقدس وربنا مش بيحب الكدب خالص ومن خلال ذلك :-

1- توعية الطفل والمخدوم بان يقول الصدق مهما كانت الاسباب .

2- عدم الكذب امام الاخرين حتى لا ينظرواالينا بشكل مختلف  .

3- محبةالاطفال ومحبة الجميع ونتمنى الخير لكل الناس    .

نونا وكوكا يدخلان مع بعض

نونا : ازيك يا كوكا عامله اى

كوكا : كويسه يا نونا انتى عامله اى

نونا : كويسه يا كوكا

كوكا : انتى مجتيش ليه مدارس الاحد الاسبوع اللى فات يا نونا

نونا :اصل اصل اصل بطنى كانت وجعانى ورجلى وجعانى وعينى وجعانى

كوكا : يااااااااه كل ده يا نونا ليه كدا ده جسمك كله واجعك ولا ايه

نونا: لا لالالا بطنى ورجلى بس نسيييت

كوكا : ايه ده يا نونا ازاى تنسى مالك بقى فى اى

نونا: لالالالالا مفيش حاجه يا كوكا

كوكا : يا نونا يا نونا انتى بتضحكى وتكذبى عليا ولا اى

نونا : اصل اصل اصل

كوكا : احكيلى بقى مش انا صاحبتك ولا اى

نونا : اكيد طبعا انتى صاحبتى

كوكا : طيب احكيلى اى اللى حصل بقى

نونا : اصل انا نمت متاخر يا كوكا بالليل كدا وكنت بلعب على الكمبيوتر وبتفرج على كرتون

كوكا : وبعدين يا نونا

نونا : وبعدين ماما دخلت عليا وانا بتفرج على الكرتون قالتلى روحى نامى يلا يا نونا عشان تصحى تروحى القداس

كوكا : كويس وبعدين حصل اى تانى

نونا : قولتلها حاضر ومنمتش بقى شوفتى كدا

كوكا : يااااه وبعدين اى اللى حصل تانى

نونا : وبعدين نمت متاخر كدا تعبانه خالص يا كوكا

كوكا : امممممممممممم وبعدين

نونا : وبعدين ماما بتصحينى الصبح قولتلها بطنى وجعانى ومش هقدر اروح مدارس الاحد خالص وكذبت عليها

كوكا : يااااااااااااااااه كل ده يا نونا

كوكا : وبعدين حصل اى

نونا : ماما راحت القداس الصبح وانا قعدت العب على الكمبيوتر لوحدى بعد ما صحيت وبعدين

كوكا : اى تانى

نونا : وبعدين رحت اشرب رحت وقعت وقعه كبيره خالص قعدت ابكى كتير خالص مالص مالص

كوكا : يااااااااه شوفتى بقى عشان كدا

نونا : ايوه وماما جات من الكنيسه لقيتنى ببكى كتير كتير

كوكا : قولتيلها اى طيب

نونا : قولتلها انى كذبت عليكى يا ماما ونمت متاخر وكمان قولتلك الصبح بطنى وجعانى رحت وقعت وقعه كبيره وانا رايحه اشرب

كوكا : وماما قالتلك اى

نونا : قالتلى مينفعش كدا يا نونا بابا يسوع بيحبك خالص خالص ومش بيحب حد يكدب خالص خالص

كوكا : شوفتى بقى يا نونا مينفعش نكدب بعد كدا تانى عشان بابا يسوع بيحبنا خالص ومش بيحب حد يكدب خالص ولازم دايما نقول الصدق

نونا: ايوه صح يا كوكا انا اسفه انى كدبت عليكى انا مش هكدب كمان تانى خالص خالص خالص

كوكا : ايوه برافوووووو خالص يا نونا نروح اكنيسه ونعترف كمان يا نونا ونبطل نكدب خالص ونسمع الكلام ومش نكسل خالص ونروح علطول مدارس الاحد عشان بابا يسوع يفرح خالص خالص بينا

نونا : ايوه صح يا كوكا اانا هروح اقول لابونا فى الكنيسه انى مش هكدب تانى خالص وهسمع كلام ماما فى البيت علطلول واقول ليها حاضر حاضر علطلول

كوكا : برررررررررررافو يانونا يلا بينا ندخل الكنيسه عشان نصلى ونقول لبابا يسوع مش هنعمل حاجه وحشه تانى خالص خالص ونحضر مدارس الاحد يلا بينا

نونا : يلا بينا ونونا مش هتكدب تانى خالص خالص خالص وهتسمع كلام ماما واحنا كلنا فى البيت هنسمع كلام ماما وبابا واخواتى وهنقول الصدق دايما علطول ونعترف ونتناول ونصلى ومش هنتاخر على مدارس الاحد خالص

فى نهاية الاسكتش يجب علينا توعية الاطفال وان نقوم باعطاء امثلة للمخدومين عن اشخاص فى الكتاب المقدس كان الكذب عندهم غلط وان هذا مرفوض لدى الرب يسوع وانه لا يحب الكذب وعلينا ان نكون صادقين فى الكلام  .

الاطفال دائما يحبون اللعب اكثر شئ لديهم وان خطورة الكذب فى هذه المرحلة علينا ان ننتبه اليها حتى لا يتعود على الكذب فى بداية حياته وان يقول الصدق فى جميع الاحوال سواء فى المدرسة اوالكنيسة او المنزل اوامام بابا وماما وامام  اى شخص يقابله .

وان نوعى المخدوم ان لا يخاف من شئ حتى يتعود على ذلك عندما يكبر فى السن لان ربما الطفل يظن ان الكذب هو وسيلة وانه يخاف من الضرب فى المدرسة او البيت وقد لا يجد امامه غير الكذب حتى لا يعاقب فعلينا متابعة الاطفال بخصوص هذا الموضوع لانه خطير جدا ونوضح لهم ايات من الكتاب المقدس والقديسين الذين يرفضون الكذب حتى يعلم الطفل ان الكذب شئ صعب وانه يقول الصدق دائما وفى جميع الاوقات والرب قادر ان يعطى الفهم والنعمة لكل المخدومين وان يبارك ثمرة العمل الصالح .