اسكتش تحضير شنطة المدرسة

 اسكتش تحضير شنطة المدرسة لاول يوم دراسة

بداية الدراسة وتحضير الشنطة 

 والوقايا من كورونا ينفع عرايس او شخصيات عادية

المقدمة :-

فى بداية الدراسة علينا توعية الطفل باشياء كثيرة وعلينا ان نتابع الطفل اثناء الدراسة وكيفية المحافظة عليه من خلال بعض الاساليب والطرق والتى يتبعها  وهى :

1- التوعية من خلال النظافة الشخصية والتى فى كل يوم نظافة الملابس ونظافة الجسم والاستحمام .
2- غسل الاسنان وغسل اليدين باستمرار حتى لا يتعرض الطفل للتلوث .
3- توعية الطفل بعدم استعمال الادوات الشخصية للغير وان يحافظ على نفسه .
4- عدم الاحتكاك بالباعة الجائلين لان هذا خطر عليهم فى ظل الامراض الموجودة .
5- سماع الكلام فى البيت من الاب والام وفى المدرسة  .

فنكش وماما واول يوم فى المدرسه

ماما : اصحى يا فنكش يا فنكش اصحى
فنكش : يوووه يا ماما عايز انام شويه
ماما : اصحى بقى يا فنكش كفايه نووم عشان المدرسة النهارده اول يوم ولازم نجهز شنطة المدرسة مع بعض يلا بقة اصحى
فنكش : يووووه يا ماما هو لازم اروح المدرسه يعنى نهاردة مينفعش ناخد اجازه خالص
ماما : لا يا فنكش مينفعش تقول الكلام ده المدرسه حلوه خالص ولازم نتعلم فيها عشان نعرف نقرى فى الكتب ونتعلم نكتب وكمان تعرف تقرى فى الكتاب المقدس لوحدك وتصلى فى الاجبية لوحدك كمان وفى الكنيسه فى القداس تحفظ الالحان صح ولالا يبقى لازم تروح المدرسه عشان تتعلم وتبقى ولد شاطر
فنكش : اه صح يا ماما لازم اروح واتعلم عشان اقرى فى الانجيل وابقى شاطر وكمان هطلع الاول زى كوكو صاحبى عشان ابقى ولد حلو
ماما : برافو يا فنكش يلا بقى عشان تقول تجهز نفسك للمدرسه
فنكش : حاضر يا ماما انا هقوم اغسل وشى بالميه والصابون واتشطف كويس والبس واسرح شعرى وهفطر كمان
ماما : برافو يا فنكش يلا بقى
فنكش يجهز نفسه ويفطر ويذهب يحضر شنطة المدرسه مع ماما
ماما : يلا يا فنكش بقى نجهز الشنطه عشان تروح المدرسه
فنكش : يلا يا ماما اهى الشنطه
ماما : اول حاجه يا فنكش تحط الكمامه معاك دى مهمه عشان انت عارف ان احنا دلوقت الناس خايفه من عدوى مرض كورونا فلازم تلبس الكمامه اما تكون فى اماكن زحمه خالص وخليها معاك علطول الكمامه واوعى تاخد كمامه حد من اصحابك فى المدرسه وتلبسها ده غلط وكمان اوعى تعطس فى وش حد بردو خليك بعيد عن اصحابك وبلاش تسلم على حد بايدك كفايه تشاور ليهم بايدك وكدا عشان العدوى لازم نحافظ على نفسنا
فنكش : حاضر يا ماما
ماما : وكمان حط ازازة الميه الزمزمية فى الشنطه بتاعتك ومينفعش تشرب من ازازة حد فى المدرسه ولو حد قالك هات اشرب قوله مينفعش انا اسف عشان لازم نحافظ على نفسنا بردو
فنكش حاضر يا ماما
ماما: وهناك يا فنكش لازم تغسل ايديك اما تروح تعمل حمام او قبل ما تاكل بردو لازم تغسل ايديك عشان نحافظ على نظافة اليديدين بتاعتنا
فنكش: حاضر يا ماما
ماما : ونحط المقلمة فى الشنطه بردو والكشاكيل والكرارييس
فنكش : لو حد من اصحابى يا ماما عايز قلم او كراسه ينفع ياخد منى
ماما : لا يا فنكش تقوله معلش يا صحابى مينفعش عشان العدوى ولازم كل واحد يبقى معاه حاجاته الشخصية ومينفعش نستعمل حاجات بعض عشان نحافظ على نفسنا من العدوى ومحدش ينقل المرض لحد بردو
فنكش : ايوه صح يا ماما
ماما: ولازم يا فنكش تحط المناديل فى جيبك علطول عشان اما تعطس تبقى معاك وتعطس فيها ومنعديش حد من اصحابنا
فنكش : ايوه صح يا ماما انا بحط مناديل علطول فى جيبى عشان اما اعطس يبقى معايا علطول
ماما : برافو يا فنكش صح كدا
ماما : وهحط ليك السندويشات تاكلهم كلهم عشان تتغذى وتبقى قوى ومينفعش تاخد من حد اكل او تدى حد عشان لازم نحافظ على نفسنا من العدوى ونسمع كلام المس والأستاذ فى المدرسه
فنشك : طيب ينفع يا ماما اجيب اكل من بره فى الشارع
ماما : لا يا فنكش ده غلط عشان لازم نحمى انفسنا من المرض ومش ناكل من الشارع عشان منتعبش وتاكل السندويتشات بتاعتك بس وتشرب من الازازه بتاعتك
فنكش: حاضر يا ماما انا هعمل كل حاجه وهسمع كلام المس فى الفصل والاستاذ كمان وهحافظ عل نفسى كمان شكرا يا ماما
ماما : برافو يا فنكش يلا باااى باااى
فنكش  : باى باى يا ماما

النهاية 

فى نهاية الاسكتش علينا ان نعرف الطفل ونعلم الطفل بالطرق الصحية التى يجب ان يتعلمها وكيفية غسل اليدين والاسنان بالطريقه الصحيحة وان يعرف الطفل ان لا يستعمل الادوات الشخصية الخاصة باصحابه فى المدرسه وخارج المدرسة وان يعرف اهميةالنظافة الشخصية فى الوقايه من العدوى لان خطر الامراض يأتى بسبب عدم الاهتمام والاهمال فى النظافة وعدم الوقايه الصحيحة وان يستعمل حاجاته الشخصية .