اسكتش قداسة البابا كيرلس السادس
الراهب مينا المتوحد
القمص مينا البراموسى
الهدف من الاسكتش :-
1- معرفة سيرة الراهب مينا المتوحد ( البابا كيرلس السادس ) .
2- الرهبان القديسين فى ذلك الوقت منهم ابونا عبد المسيح المسعودى .
3- اهمية الصلاة فى حياة ابونا مينا المتوحد .
4- عمل الله مع القديسين فى حياتهم وكيف تأثرت الناس بهم .
5- الطاعة من اهم شئ يميز الراهب وكيف اثرت فى حياة القديس .
بداية الاسكتش :-
يدخل
ابونا عازر ومعه ابونا بشارة وابونا القمص شنودة .
القمص شنودة : اهلا يا ابونا بشارة حمدلله ع السلامة شرفتوا دير البراموس
الرهبان افتكروا انكم ضيوف غريبه راحوا دقوا اجراس الدير.
ابونا بشارة : اقدم ليك يا ابونا الابن المبارك عازر يوسف عطا طالب رهبنه
وجاى معايا من الاسكندرية .
ابونا شنودة : اهلا بيك يا اخ عازر حمدلله ع السلامة .
ابونا بشارة : اقدم ليك يا اخ عازر القمص شنودة امين الدير .
عازر : حصلت لينا البركة ربنا يعوضكم يا ابونا .
ابونا شنودة : اتفضل اتفضل يا اخ عازر تعال ادخل هوريك المكان اللى هتجيب
منه اكل والقلايه اللى هتبقى فيها .
عازر : شكرا خالص يا ابونا .
يخرج الجميع
يدخل عازر القلايه لوحده ويصلى .
عازر : اشكرك يارب عشان هبقى تلميذ لابونا عبد المسيح المسعودى ساعدنى يارب
وقوينى
واجعلنا مستحقين ان نقول بشكر ابانا الذى فى السموات يتقدس اسمك .. الخ .
يخرج عازر
يدخل ابونا شنودة وابونا عازر .
ابونا شنودة : احنا مبسوطين منك خالص يا اخ عازر عشان انت شخص مطيع وبتسمع
الكلام
وتساعد الرهبان الكبيره وتملى ليهم الميه .
عشان كدا هتمسك المطبخ بردو جنب
شغلك فى الدير
عشان انت شخص مطيع وبتعمل القربان وبتطحن الغلة وحاجات كتير .
عازر : شكرا خالص يا ابونا صلى عشان ربنا يساعدنى شكرا خالص .
ابونا شنودة : انت تلميذ مطيع وكمان مجلة ميناء الخلاص اللى بتصدرها
وتوزعها انك بتعرف سير قديسين كتير ووزعت كمان يجى 50 نسخه على الرهبان
انت خادم حلو خالص وهتبقى خادم كبير خالص .
يدخل عليهم احد الرهبان .
احد الرهبان : يا ابونا شنودة الحق الحق .
ابونا شنودة: اى اللى حصل ؟
احد الرهبان : ابونا ارمانيوس .
ابونا شنودة : ماله اتاخر بره الدير ولا ايه ؟
احد الرهبان : لا ده رجع اصل هو بيوصل البريد البغل اللى كان راكبه جرى منه
وطار فى الجبل ووقع ابونا فى الجبل وجه مشى .
ابونا شنودة : طيب هنعمل ايه دلوقتى ؟ معندناش ركوبه غير كدا لازم بكره يصحى الصبح ويدور
عليه لازم ضرورى يا ابونا .
الاخ عازر : متقلقش يا ابونا خلى ابونا ارمانيوس يرتاح وهيجى واحد من
الاعراب الللى عايشه عند الجبل ومعاه البغل
وانا هوزع الحاجات مكان ابونا ارمانيوس .
يدخل احد الاشخاص ويخبط الباب
يفتح احد الرهبان
احد الرهبان: بسم الصليب بسم الصليب واحد من الاعراب جايب البغل زى ما قال
الاخ عازر شوفوا كدا اهو جاى عليكم ومعاه البغل .
ابونا شنودة : المجد لله المجد لاسم الله القدوس .
يخرج الجميع
يدخل ابونا شنودة امين الدير والاخ عازر .
ابونا شنودة : النهارده يوم مهم خالص فى حياتك يا عازر النهارده يوم 25
فبراير1928 اوعى تنسى اليوم ده خالص .
عازر : فعلا ربنا اختارنى فى اليوم ده هترسم راهب .
ابونا شنودة :ايوه يلا بينا عشان نبدا الرسامة وكمان هيبقى اسمك ابونا مينا .
عازر : مينا ؟
ابونا شنودة : ايوه عشان النهارده قرينا فى السنكسار عيد القديس مينا وكمان
شفيعك الشهيد مارمينا اكيد عشان كدا اسمك هيبقى مينا .
عازر : اشكرك يارب عشان اخترت ليا اسم شفيعى مارمينا اشكرك يارب .
يخرج الجميع
يدخل عازر لوحده .
ابونا مينا : ياااه بسرعه كدا عدت 3 سنين النهارده 18 يوليو سنه 1931
اترسمت قس
اشكرك يارب خالص خالص .
يخرج ابونا مينا
يدخل ابونا مينا وراهب اسمه ابونا كيرلس .
ابونا كيرلس : يا ابونا مينا يا ابونا مينا .
ابونا مينا : ايوه يا ابونا كيرلس خير خير .
ابونا كيرلس : سيدنا الانبا يؤانس بعد ما سمع العظة اللى قولتها فى صلاة
العشية فى كنيسة مدرسة الرهبان فى حلوان
العظة عجبته وطلب ان يرسمك مطران .
ابونا مينا : ياااه انا مينفعش انا خاطى ولازم اعيش حياة الوحدة
انا ههرب لدير الانبا شنودة بسوهاج بس متقولش لحد خالص يلا سلام سلام
.
يدخل ابونا مينا .
ابونا مينا : اشكرك يارب عشان رحت للانبا يؤانس وسامحنى عشان هربت وخلانى
رجعت الدير
واعيش حياة الوحده اشكرك يارب .
وكمان قعدت فى مغارة بعيده ساعه مشى من الدير
للمغارة
واصلى علطلول واقرى فى الانجيل وانسخ الكتب وكمان اروح الدير بالليل يوم
السبت واصلى واتناول
اشكرك يارب وكمان طلبت من البابا يؤانس اتوحد فى طاحونه واقعد اصلى لربنا ووافق
الحمدلله وانا عايش مبسوط وبنام على الارض واصلى فى كنيسة دير الملاك
ميخائيل فى مصر
وكمان بدفع 5 قروش فى الشهر ايجار وكمان الطاحونه بقيت حلوه وعملنا فوق
مذبح ونصلى لام نشكر ربنا على كل شئ .
يخرج ابونا مينا بعد الصلاه يدخل ابونا مينا ويصلى ويقرا فى الكتاب المقدس ويخبط الباب وتدخل بنت مليكة
الشماس .
ابونا مينا : ايوه حاضر ايوه حاضر انا جاى .
البنت : الحق يا ابونا مينا ابويا مليكة مش بيتحرك وتعبان تعال صلى ليه
بسرعه .
ابونا مينا : حاضر انا هاجى يلا بينا .
يخرج الجميع ويدخل ابونا مينا والبنت وعم مليكة نايم ويتوجع من التعب .
ابونا مينا : قوم يا عم مليكة متقلقش هتخف قوم يلا معايا قربانه سخنه اهى
عشان تاكلها يلا بسرعه عشان تصلى معايا القداس مستنيك يلا .
عم مليكة : مين مين ؟
ابونا مينا : يلا قوم انا بحط الصليب على راسك اهو يلا يا عم مليكة عشن
تصلى معاى قوم بسم الصليب بسم الاب والابن والرو القدس اله واحد امين .
عم مليكة : ايه ده انا قومت اي ده اشكرك يار ب انا خفيت اشكرك يارب اشكرك يا ابونا انا هروح كمان اصلى القداس مع ابونا مينا فى الطاحونه .
يخرج الجميع
يدخل ابونا مينا وتكلم مع نفسه .
ابونا مينا : ياه النهارده حلمت حلم غريب شوفت البابا يؤانس الله ينيح روحه العصايا
بتاعت الرعايا اللى معاه اتكسرت
وجالى عشان اصلحها ليه وانا صلحتها ليه وقالى خدها يا ابونا مينا خدها انا
عطيتها ليك خدها .
يا ترى معناه ايه الحلم ده معناه ايه ؟
يخرج ابونا مينا وبعد فتره يدخل مره تانى .
ابونا مينا :اشكرك يارب عشان انت معايا
دلوقت بابا الكنيسه اتنيح اللى هو البابا يوساب الثانى اللى قبله كان
البابا مكاريوس الثالث.
ووقتها الانبا اثناسيوس مطران
بنى سويف رشحنى ابقى رئيس دير الانبا صموئيل وعملنا اصلاحات كتير فى الدير
ودشنا كنيسه هناك
وكمان هناك اخدت درجة قمص اشكرك يارب اشكرك يارب
وكمان الانبا اثناسيوس بقى مقام البطريرك لحد ما يختاروا بطريرك اختار يا رب الراعى لكنيستك اختار الراعى لكنيستك .
يرن جرس التليفون ويرد ابونا مينا .
ابونا مينا : ايوه مين معايا ؟
الانبا اثناسيوس : انبا الانبا اثناسيوس يا ابونا مينا ازيك يا ابونا مينا عامل ايه ؟
ابونا مينا : اهلا يا سيدنا اقبل الايادى نشكرربنا على كل شئ .
الانبا اثناسيوس : انا رشحتك يا ابونا مينا فى الاسماء اللى هيبقى بطريرك وحطيت اسمك معاهم فى باب الترشيح قبل ما يتقفل .
ابونا مينا: انا غلبان يا سيدنا انا غلبان هروح فين انا بينهم انا غلبان خالص .
الانبا اثناسيوس : ربنا يختار الصالح يا ابونا ربنا يختار الصالح .
ابونا مينا : اكيد يا سيدنا ربنا يختار الصالح .
الانبا اثناسيوس : سلام سلام
ابونا مينا سلام .
ويخرج ابونا مينا .
فى نهاية الاسكتش المخدومين يكونوا فاهمين الجزء الخاص برسامة عازر لراهب ومن ثم ذهابه للطاحونه والهدف منه الناس تعرف ازاى الانسان بيصلى ويتعلم المحبة والتواضع ويحب كل الناس ويتمنى الخير دايما للجميع ونتعلم اننا نصلى فى كل مكان فى البيت او الشارع او الكنيسة لان الصلاة هى اهم حاجه فى حياتنا .
نتعلم الصوم الصلاة الدايمة وقصة البابا كيرلس زى ما احنا شوفنا قبل رسامته بطريرك ازاى كان بيحب الصلاة وبيعمل الخير فى الدير وبيحب يعمل قداسات كتير ويصلى كتير نتعلم منه محبة الصلاة ومحبة جميع الناس وان ربنا بيقف معانا فى كل خطوة .
وطبعا اخد فترة طويلة كان فى الطاحونه بيصلى وبيعمل قداسات فيها واكيد اتعرض لحاجات كتير هناك بس طبعا كان واثق فى ربنا انه معاه فى كل خطوة ياريت نتعلم ونثق ان ربنا معانا فى كل خطوة ومنبعدش عنه خالص ياريت الكل يستفاد من قصص القديسين وناخد من سيرتهم ونتعلم منهم .