اسكتش توما الرسول

 اسكتش احد توما الرسول

احد القديس توما الرسول

اهداف الاسكتش  

1- ان يعرف المخدوم قصة القيامة فى عدم وجود القديس توما الرسول .

2- ان يعرف المخدوم بقصة القيامة فى وجود القديس توما الرسول .

3- ان يعرف المخدوم اهمية القيامة والايمان بوجود القيامة .

4- ان يفهم معنى الابواب المغلقة ولماذا تم اغلاق الابواب .

5- ان يحفظوا الايه طوبى للذين امنوا ولم يروا ويفهموا معنى الايمان الحقيقى .

اسكتش احد توما يدخل بطرس ويوحنا  .

 بطرس : يا يوحنا يا يوحنا  .

 يوحنا: ايوه يا بطرس فى ايه ؟

 بطرس : اتاكد يا يوحنا ان احنا قفلنا كل الابواب عشان محدش يدخل علينا خالص .

 يوحنا : حاضر يا بطرس انا هطمن على كل الابواب متقلقش .

يطمئن على الأبواب مقفولة كويس  .

يوحنا : ايوه يا بطرس تمام الابواب مقفولة خالص واحنا كلنا مجتمعين فى العلية عشان محدش يدخل علينا بس مش معانا توما هنا مش عارف راح فين نهارده  .

 بطرس : خلاص تمام يلا ندخل نشوف باقى التلاميذ جوه .

 يدخل بطرس ويوحنا ويجد باقى التلاميذ قاعدين .

 بطرس : متاخفوش احنا قفلنا كل الابواب خالص عشان محدش يخش علينا ومحدش يعرف يدخل خالص واحنا هنبقى مع بعض كلنا .

 يوحنا : ياترى هنعمل ايه دلوقتي يا بطرس هنعمل ايه  ؟

بطرس : نستنى يا يوحنا نشوف اى اللى يحصل .

 فجأه يدخل المسيح ليهم وهم ينظرون بخوف .

 يوحنا : شايف يا بطرس مين اللى ظهر فجاه ده يااه  ؟

 بطرس : ياااه مين ده ياترى يمكن روح ولا اى اللى جاى علينا ده ؟

يوحنا : احنا خايفين يا بطرس خايفين .

 المسيح : سلام لكم ما تخفوش يا اولادى انا الرب يسوع تعالوا بصوا عليا انا جسمى حقيقى اهو ليا لحم وعظم زى الناس انا قومت من الاموات زى ما قولتلكم .

 بطرس : ايوه صح ده الرب يسوع احنا فرحانين خالص خالص انك قومت من الاموات عشان انت قادر على كل شئ .

 يخرج الجميع ويدخل بطرس ويوحنا وتوما معهم .

 بطرس : ادخل ادخل يا توما بسرعه عشان هنقفل الابواب .

 توما : حاضر يا بطرس يلا بسرعه اقفل الابواب ورايا  .

يقفل الابواب ويدخلوا يقعدوا ويسمع صوت غلق الباب .

يوحنا : انت عارف يا توما الاسبوع اللى فات كنا قاعدين زى كدا وفجأه حصلت حاجه غريبه مش هتتوقع حصل ايه .

 توما : حاجه غريبه اى إحكولى بسرعه .

 يوحنا : كنا قاعدين كدا وخايفين وفجأه ظهر لينا الرب يسوع وقال السلام لكم .

 توما : اممممم وبعدين حصل ايه يا ترى .

 يوحنا : وبعدين فرحنا خالص وكمان كنا مبسوطين خالص وهو معانا مرة تانى .

 توما : اممممممم بس كدا يعنى ولا فى حاجه تانى ؟

 بطرس : شكلك مش مصدق يا توما صح ولالا ؟

 توما : بصراحة يا بطرس ايوه انت عارف انا مش بصدق بسرعه كدا لازم اتاكد كمان من اى حاجه واعرف ان كانت صح ولا غلط كمان .

  بطرس: تتأكد ازاى يا توما فهمنى ؟

 توما : لازم يا بطرس عشان اتاكد اشوف مكان المسامير اللى فى ايد الرب وكمان مكان الحربه اللى طعنوه بيها واحط ايدى بنفسى عشان ابقى متأكد صح .

 بطرس : اممم اكيد الرب هيجى لينا تانى وتتاكد يا توما تعال ندخل جوه للتلاميذ ونقعد معاهمونشوف هما هيعملوا ايه مع الموضوع ده مع بعض .

 يخرج بطرس وتوما ويدخل فى وجود باقى التلاميذ .

 بطرس : اهو يا توما كل التلاميذ اللى هنا شافوا الرب يسوع عشان تعرف بس .

توما : ايوه يا بطرس بس انا مش هصدق غير اما اشوف اثر المسامير والحربه انا مش بصدق بسرعه يا بطرس .

 يدخل ليهم المسيح فجاه وهما جالسين .

بطرس : بص بص يا توما اهو الرب يسوع ظهر اهو وجاى عليك .

 الرب يسوع: تعال يا توما قرب عليا تعال .

 توما : حاضر يارب انا جاى .

 الرب يسوع: بص كدا يا توما اثر المسامير وحط ايدك عند مكان الحربه عشان تتأكد انى أنا فعلا .

 توما : يااه ربى والهى انا مكنتش مصدق خالص كدا انا صدقت انك قومت من الاموات وفرحان خالص .

 الرب يسوع: عشان انت يا توما مكنتش مصدق طوبى للذين امنوا ولم يروا يعنى با بخت الناس اللى امنت ومشافتتش .

بطرس : شفت يا توما اهو الرب ظهر وكمان شوفت مكان المسامير والحربه واتأكدت كمان انت كدا .

يتكلم بطرس ويوجه نظره للاطفال

 

بطرس:  عشان كدا يا حبايبى لازم نؤمن ان ربنا معانا فى الكنيسه وهو فى وسطينا فى القداس ولازم نقعد هاديين ومنعملش هيصة ومناكلش فى الكنيسه ونرمى الزباله فى الارض .

 وكمان نحترم القداس ومدارس الاحد ومنعملش صوت ونسمع كلام بابا وماما فى البيت عشان بابا يسوع شايفنا وبيبقى مبسوط خالص اما نسمع الكلام ونبقى اطفال حلوين يلا بقى سلام هنسيبكم دلوقت اخرستوس انستى .

فى نهاية الاسكتش قصة بسيطة مثلا قصة توما الرسول توضح للاطفال مدى اهمية ظهور الرب للتلاميذ وتأكيد للقيامة من الاموات ولازم الاطفال يعرفوا ان القديس توما كان من الاثنى عشر تلميذ وليس من السبعين رسولا .

القديس توما قديس عظيم واحنا بنتعلم من سيرته حاجات كتير منها الايمان والبشارة وان احنا مهما جات علينا اوقات صعبة لازم نؤمن ونتأكد ان ربنا معانا مش هينسانا وهيقف معانا فى كل خطوة لانه هو ابونا السماوى المحب لأولاده .

ممكن الاطفال يمثلوا الاسكتش هما بنفسهم عشان يعرفوا القصة كويس ويحكوها مع بعض ويعرفوا ليه احنا فى الخماسين المقدسة بنحتفل بأحد توما وليه سمى هذا الاسم بأسم توما .

طبعا كلنا اكيد عارفين قصة القيامة وأحداث القيامة ونلاقى فى انجيل معلمنا ماريوحنا البشير معجزات للرب يسوع بعد القيامة ولازم الاطفال يعرفوا ان السيد المسيح ظهر للتلاميذ مرات كتير وقعد يحكى معاهم وعلمهم حاجات كتير .

فى النهايه لازم نعرف ان القديس توما بشر فى اماكن كتير واخيرا استشهد واصبح شهيد عظيم وتلميذ عظيم وناس كتير بتتشفع بيه وتاخد بركته .