أخر المواضيع

مسلسل اسكتش اعمال الرسل الحلقة السابعه والثامنة

 مسلسل اسكتش اعمال الرسل الحلقة السابعه والثامنة 

الحلقة السابعة ايمان شاول الطرسوسى

الهدف من الاسكتش 

1- معرفة المخدوم بأهمية الصلاة وعدم الخوف .

2- الايمان ان ربنا بيعمل كل الاشياء الصالحة لينا .

3- معرفة قصة بداية ايمان شاول ومعجزات بطرس الرسول .

يدخل شاول الرسول .


شاول : انا لازم اقتل كل اللى بيؤمنوا بيسوع الناصرى انا فاكر يوم ما رجموا اسطفانوس كنت واقف وحارس هدوم الناس اللى كانت بترجم وكنت موافق على قتله .
دلوقت انا لازم اجهز نفسى عشان اروح لرئيس الكهنه عشان يدينى رسالة واذن اروح بلد دمشق عشان اموت اللى بيؤمنوا بيسوع الناصرى .

ثم يخرج شاول .

يدخل شاول ورئيس الكهنه يجلس على كرسى  .

رئيس الكهنه : تعال يا شاول عايز ايه .
شاول : انا يا رئيس كهنتنا عايزمنك رسايل للناس فى دمشق واصحابنا هناك عشان تقولهم يقفوا معايا ونروح نقتل اللى بيؤمنوا بالمسيح هناك وكمان نطردهم خالص من البلد وكمان لو لقيت حد فى الطريق اقبض عليهم واجيبهم اورشاليم عشان نحبسهم .
رئيس الكهنه : موافق يا شاول وكمان خد شويه جنود معاك عشان يساعدوك .

ثم يخرج ورقه ويكتب عليها ويعطيها لشاول .

شاول : شكرا خالص استاذن الخروج .
رئيس الكهنه : يلا بسرعه اعمل كل حاجه .

ثم يخرج الجميع .

يدخل شاول راكب حصان وبجواره بعض الجنود .

شاول : يلا بينا يا جنود قربنا نوصل دمشق بسرعه .

ثم فجأة يقع شاول من على الحصان ويصرخ ويرى نور شديد عليه .

شاول : اااه ا ه اااااااه ايه ده ايه ده .

ثم يسمع صوت يسوع المسيح ينادى عليه من الداخل .

يسوع المسيح : شاول شاول انت ليه بتضطهدنى .
شاول : انت مين يا سيد .
يسوع المسيح : انا يسوع اللى انت بتضطهده .
شاول : طيب يارب عايزنى اعمل ايه  .
يسوع المسيح : روح ادخل المدينه وهتعرف هتعمل ايه .
ثم يصرخ شاول .
شاول : ايه ده انا مش شايف انا عميت خالص مش شايف  .
تعالوا يا جنود خدونى للمدينه عشان انا مش شايف .

ثم ياخدوه ويخرج الجميع .

ثم يدخل حنانيا ويتحدث مع المخدومين عن نفسه  .

حنانيا : ازيكم يا اصحابى انا اسمى حنانيا مؤمن بيسوع المسيح وتلميذ للتلاميذ الكبار فى دمشق وامبارح بالليل جانى الرب فى حلم وقالى يا حنانيا هيجيلك واحد اسمه شاول عايزك تحط ايدك على عنيه وهيشوف علطول وانا رايح دلوقت اسال عليه فى بيت واحد هناك 
وانا اهو هدخل عنده .

يخرج حنانيا ويفتح الستار على شاول جالس ولا يرى ومنتظر حنانيا .

شاول : انا هعمل ايه دلوقت طيب انا مش شايف وشفت واحد اسمه حنانيا جه حط ايده على عنيا وشفت علطول وانا مستنى يجى .

يخبط الباب ويدخل حنانيا .

شاول : ادخل  .
حنانيا :ازيك يا شاول انا اسمى حنانيا وبعتنى ليك يسوع المسيح عشان تفتح تانى وتشوف وتؤمن بيه وكمان تتعمد .
شاول : ايوه انا حلمت بيك صح .
يضع حنانيا يديه على عنيه ويبصر .
شاول : انا شايف شايف شايف يا حنانيا فى حاجات بتقع من عنيا عاملة زى القشر اشكرك يارب اشكرك يارب انت لازم تعمدنى يا حنانيا عشان ابقى مسيحى .
حنانيا : حاضر يا شاول يلا بينا عشان اعمدك .

ثم يخرج الجميع  .

الحلقة الثامنة بطرس يشفى اينياس ويقيم طابيثا من الموت .

شفاء إينياس المقعد وإقامة طابيثا من الموت .

يدخل بعض الناس ويتحدثون وعلى جنب شخص مشلول اسمه اينياس ويدخل عليهم بطرس ثم يبدأ الحديث .

بطرس : سلام لكم يا اخواتى .
احد الاشخاص : سلام يا معلمنا بطرس .
بطرس : انا جيت اهو عندكم فى بلد اللى اسمها لدة عشان انتوا ناس كويسين وكمان عشان نصلى مع بعض ونبشر الناس اللى متعرفش ربنا .
احد الاشخاص : اكيد يا معلمنا بطرس احنا نؤمن ان يسوع المسيح هو ابن الله .
بطرس : ايه ده مين اللى هناك اللى قاعد على الارض ومش قادر يقوم .
احد الاشخاص : ده اسمه إينياس وليه ثمانية سنين مشلول ميقدرش يمشى خالص  .
بطرس : انا لازم اصلى عشان ربنا يشفيه .

يرفع عنيه ثوانى للسماء وينادى عليه .

بطرس : يا إينياس يشفيك يسوع المسيح يلا قوم بسرعه .

يقوم اينياس بهدوء  .

اينياس : اي ده انا بمشى انا بمشى اشكرك يارب انا مؤمن بيسوع المسيح اشكرك يارب .

ثم يخرج الجميع .

يدخل احد الاشخاص بلدة اسمها يافا .

احد التلاميذ : انا لازم اوصل بسرعه لمدينة لدة عشان دى قريبه علينا عشان اروح اشوف بطرس الرسول يجى عندنا اهوالبيت .

ثم يخبط على الباب .

يدخل بطرس الرسول .

بطرس : ايوه انا بطرس انت مين ؟
احد الاشخاص : انا يا معلمى بطرس من بلد اسمها يافا والتلاميذ هناك بعتونى ليك عشان تيجى تقعد عندنا شويه وتصلى معانا  .
بطرس : حاضر يلا بينا .

يخرج الجميع .

ثم يدخل بعض السيدات تبكى ومعهم واحده نايمه اسمها طابيثا وبعض الملابس بجوارها
احد السيدات : يا عينى عليكى يا طابيثا كنتى بتعملى حاجات كتير كويسه وتساعدى كل الناس وانتى دلوقتى ميته خلاص وهندفنوكى بس مستنين معلمنا بطرس الرسول اهو جاى عشان يصلى .

ثم يدخل عليهم بطرس الرسول .

بطرس : مالكم فى ايه بس بتبكوا ليه ؟
احد السيدات : احنا يا معلمنا بطرس زعلانين على طابيثا خالص عشان ماتت وكانت كويسه خالص وبتخيط هدوم للناس الغلبانه .
بطرس: اممممم طيب ممكن كل اللى موجودين يخرجوا وسبونى انا وهى لوحدينا .

ثم يخرج الجميع ويصلى بطرس فى  سره  .

بطرس: يا طابيثا قومى .
تفتح طابيثا عنيها .
طابيثا : انا فين انا فين .
بطرس : قومى يا طابيثا قومى .

ينادى بطرس على الناس فى الخارج .

بطرس : تعالوا تعالوا يا جماعه طابيثا ربنا يسوع اقامها من الموت .

يدخل الجميع ويزغرطوا .

نؤمن بيسوع المسيح مؤمن بيسوع المسيح ويخرج الجميع ويقفل الستار .


 حلقات الاسكتش هذه  تدور على قصة ذهاب شاول الطرسوسى الى الكهنه ومطالبتهم لكى يعطوه رسائل الى الذين فى دمشق من اجل اعتقال المسيحين الذين هناك وتعذيبهم . واخراجهم من البلد ولكن الرب القدير لم يشأ هلاك شاول ولكن يعلم انه سيكون اناء مختار حيث ظهر له فى الطريق وقال له انا يسوع الذى تضطهده ومن هنا تغيرت حياة شاول الى بولس واخذوه وادخلوه الى دمشق لانه فقد البصر لمدة ايام وجاء اليه حنانيا ووضع يديه عليه فأبصر ومن ثم اعتمد ليصير بولس الرسول الكارز العظيم وبدأ التبشير فى البلاد وكثيرون من الناس الذين رأوه استغربوا لانهم كانوا يقولون اليس هذا شاول الذى كان يضطهد هذا الطريق ولكن ايمانه العظيم اصبح كارز للمسكونه بأسم الرب .
ويمكن اضافة اجزاء فى القصة على حسب امكانيات كل كنيسة والوقت المتاح من قصص فى سفر اعمال الرسل نحن ذكرنا القليل والذى يوضع عمل الرب فى المؤمنين والمعجزات الكثيرة التى تمت بأسم السيد المسيح .
والقصة الثانية التى نجدها فى المسرحية هى قصة القديس بطرس الرسول وشفاء الرجل المقعد إينياس والذى بواسطته امن الكثير من اليهود وايضا معجزة اقامة طابيثا من الموت حيث ذهب بطرس الى يافا وهناك اخبروه عن طابيثا وكم من اعمال الرحمة كانت تفعلها والملابس التى كانت تغزلها من اجل الفقراء والمساكين وصلى بطرس واقام طابيثا من الموت بأسم ربنا يسوع المسيح ونحن فى نهاية الاسكتش على كل من المخدومين ان يعرفوا قيمة الصلاة والصوم وبواسطتها الرب يستجيب وان حياتنا لا تخلوا من الصوم والصلاة لانهم سلاح ضد محاربات الشياطين وعلى كل مخدوم ان يعرف معنى الصوم والاصوام الموجوده فى الكنيسة وسبب وجودها وان يأخذ تدريب بسيط للصلاة والصوم والرب قادر ان يعمل فى الكثير ببركة امنا القديسة العذراء مريم والرسل الاطهار .

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -