التنمر مع ماريو
خطورة التنمر وعلاجه واحترام الكنيسة
الحماية من التنمرواحترام الاخرين
الشخصيات ( مس سارة - ماريو - ميشو - مرمر- شنودة-شفيق- يوسف) .
يدخل ماريو مع صديقه ميشو .
ماريو : ازيك يا ميشو يا صاحبى عامل ايه ؟
ميشو : كويس الحمدلله يا ماريو انت عامل ايه واخبار الضحك معاك ايه ؟
ماريو : اسكت يا ميشو مشوفتش اللى حصل امبارح علمت نكت فى الولد شنودة صاحبنا مش هقولك حصل ايه ؟
ميشو : حصل ايه بس احكيلى ههههههههههه .
ماريو : عامل نفسه بيصلى ويحفظ الحان واحنا منعرفش حاجه وفى حصة مدارس الاحد يقعد يجاوب على كل الاسئلة ويعمل نفسه قديس واحسن مننا .
ميشو : ازاى يعنى ماله ؟
ماريو : صوته مسرسع كدا وهو بيقول اللحن وفاكر نفسه هو اللى حافظه وصوته حلو وانه احسن مننا وخليت العيال تضحك عليه .
ميشو : طيب وبعدين يا ماريو هتعمل ايه ؟
ماريو : النهارده بعد مدارس الاحد هناخد حصة الالحان وهتشوف بعينك وكمان صاحبه شفيق ههههه ابو راس طويلة ههههههههههه .
ميشو : شفيق ماله كمان شفيق ؟
ماريو : فاكر انه اطول واحد فينا وهى راسه الطويلة ههههههههه .
ميشو : خلاص يا ماريو يلا احنا نهارده هنراجع حصة الالحان مع مس سارة بعد درس مدارس الاحد عشان المعلم مش موجود نهارده ويلا عشان نحضر مدارس الاحد ومش نتأخر ونشوف الدرس اللى هناخده ونراجع اللى فات مع بعض .
ماريو : يلا يا عم ميشو انا جاهز اهو يلا بينا .
يخرج ماريو وميشو ويدخل فصل مدارس الاحد باقى الاصحاب
( مرمر وشنودة وشفيق )
ماريو : اهلا شايف يا ميشو اهو ابو راس طويلة قعد اول كرسى اهو وكمان ابو صوت مسرسع قاعد جنبيه ههههههه .
ميشو : خلاص بقى يا ماريو عايزين نقعد وبلاش نتكلم كتير يلا اقعد وراهم وخلاص .
يدخل مس سارة الفصل عشان تبدأ الدرس النهارده
مس سارة : ازيكم يا اولاد عاملين ايه ؟
الاولاد مع بعض: نشكر ربنا يا مس سارة كويسين .
مس سارة : احنا نهارده هناخد درس حلو خالص عن المحبة وهو درس يوسف الصديق
مرمر : احنا عارفين اسمه يا مس سارة بس فى حاجات منعرفهاش عنه .
ماريو يهمس لميشو : اسكتى انتى يا تخينه مش عارفه حاجه خالص ههههههه
مس سارة : يوسف الصديق يا اولاد اخواته رموه فى البير وكمان باعوه وكمان اتسجن وحصلت معاه حاجات كتير خالص بس هو كان بيحب كل الناس ومش بيتريق على حد وكمان بالرغم انه اخواته عملوا فيه حاجات كتير سامحهم فى الاخرومش عشان هو خلاص بقى اقوى منهم يبقى ينتقم منهم لا طبعا هو كان بيحب ربنا كتير جدا .
وكمان بيحب اخواته بردو وعيلته كلهم وكان بيحب كل الناس حتى اما اصبح الرجل الثانى فى مصر يعنى بقى زى فرعون فى مصر كدا واخواته شافهم بعينه افتكر كل حاجه عملوها فيه بس هو عشان قلبه كان نقى خالص وبيحب ربنا عرفهم بنفسه تانى وهما خافوا ليقتلهم بسبب اللى عملوه فيه زمان لكن هو طمنهم كتير وقالهم متخافوش انا اخوكم ومش هتمنى الشر لاى حد فيكم وهكون معاكم ومش هتحتاجوا اى حاجه وهى دى المحبة يا اولاد ان طالما الانسان بيحب ربنا يبقى يحب غيره ويتمنى الخير لغيره ومش يعمل فيه حاجة وحشه .
شفيق : ايوه يا مس سارة صح كدا انا بحب اصحابى كتير زى يوسف الصديق .
شنودة : وانا كمان يا مس بحب اصحابى ودايما بلعب معاهم .
مرمر : وانا كمان بلعب مع اصحابى ودايما بنحب بعض .
مس سارة : وانت يا ماريو بتعمل ايه ؟
ماريو : ايوه يا مس بحب اصحابى كتير لدرجة انى بحب اضحك عليهم هههههه .
ميشو : وانا كمان بحب اصحابى يا مس بردو
مرمر : على فكرة يا مس سارة ماريو بيحب اصحابه مووووووووت خالص
مس سارة : ماله كدا يا مرمر؟
ماريو : اسكتى يا بت لاضربك ضربة اطير راسك من كتفك خالص .
مرمر : لا يا مس سارة واحنا جايين مدارس الاحد جاى يجرى من بعيد ورمى لبانة فى شعرى كدا وشده وجرى منى وانا قعدت اجرى وراه وبكيت ومرضيتش اقول لابونا فى الكنيسة ولا ابوه ولا امه .
ماريو : على فكرة يا مس سارة انا بلعب معاها عادى
مرمر : لا يا مس ده كل ما يقابلنى بيقولى التخينه اهى التخينه اهى .
ماريو : وفيها ايه يا مرمر انا اتمنى ابقى تخين عادى ههههههههههههه .
مس سارة : على فكرة ده غلط يا ماريو ومينفعش اننا نتريق على بعض ده مش صح
ماريو : انا بهزر يا مس سارة عادى مفيهاش حاجه .
مس سارة : لا طبعا يا ماريو ده مش هزار دى تريقه واستهتار باللى قدامك مش كل واحد قدامك يقدر يستحمل اللى بتعمله وممكن بعد كدا تتخانقوا مع بعض كمان .
شفيق : ايوه يا مس انا بحب ماريو كتير بس هومش بيبطل يتريق علينا وكان بيتريق عليا بطريقه وحشه ويخلى الاولاد يضحكوا عليا .
ماريو : انا بحبك يا شفشف انت صاحبى واطول راس فى مدارس الاحد اقصد اطول واحد فى مدارس الاحد ده عادى يعنى مش تريقه .
مس سارة : شفت بقى يا ماريو انت كلامك مش صح كدا ده اسمه تنمر عارف يعنى ايه ؟
ماريو : يعنى ايه يا مس سارة ؟
مس سارة : التنمر يعنى انك تتريق على اصحابك وتقول عليهم كلام مش حلو وكمان تقول الفاظ مش حلوه عليهم وممكن تشد شعر حد وتضرب حد وتتريق على ملابس حد ده كله اسمه تنمر وده غلط مفيش حد احسن من حد .
احنا كلنا اخوات وكلنا زى بعض وربنا خلقنا كل واحد بشكله يعنى احنا اما نغلط فى شكل حد منننا كأننا بنعيب على ربنا ونقول ده ربنا معرفش يخلق حلو احسن من شكل الراجل ده فلازم يبقى فى احترام بينا .
مرمر : صح يا مس سارة انا بحب اصحابى ومش بحب كمان اشوف حد يتريق عليهم خالص كلنا اخوات وكلنا بنحب بعض ونتمنى الخير لبعض ونخاف كمان على بعض .
مس سارة : ايوه برافو كدا يلا بينا نراجع درس الالحان اللى اخدتوه الاسبوع اللى فات مع المعلم فى الكنيسة فاكرين لحن ايه ولا مش فاكرين .
الاولاد : فاكرين يا مس لحن بشفاعات والدة الاله .
مس سارة : طيب يلا يا اولاد نقول مع بعض ونشوفكم لسه فاكرين ولالا .
الاولاد : بشفاعات والدة الاله القديسة مريم يا رب انعم لنا بمغفرة خطايانا نسجد لكل ايها المسيح مع ابيك الصالح والروح القدس لانك اتيت وخلصتنا رحمة السلام ذبيحة التسبيح ايه رأيك يا مس فى اللحن ؟
ماريو : ما توطى صوتك يا عم شنودة عامل نفسك المعلم وصوتك عالى ومسرسع كدا مينفعش كدا انا عايز احفظ زيك ولا هتحفظ وحدك ولا ايه .
شنودة : شوفتى يا مس سارة اهو بردو ماريو بيتريق عليا كمان وبيقول على صوتى مسرسع وانا مش راضى اتكلم معاه كمان .
ماريو : هتعمل ايه يعنى بس اما نطلع من الكنيسه هتاخد علقة منى .
شنودة : يا عم اسكت انت مفيش غيرك ولاايه ؟
مس سارة : خلاص بقى يا ماريو قولنا مينفعش نتريق على حد لازم نحترم غيرنا ولازم نخاف على بعض ونسامح بعض لازم كدا يلا بقى عشان نصلى ونوزع عليكم الصور ولازم يا ماريو تحترم اصحابك وكفايه تريقه عليهم وكمان ناس امباح قالولى بيتريق على اصحابه فى المدرسه وممكن كمان يضربوك مش كل الناس زى بعض .
ماريو : متخافيش يا مس محدش يقدر يعمل حاجه ههههه
مس سارة : انا بقولك كدا عشان تحترم غيرك بردو دول اصحابك ومينفعش نتريق عليهم ولا نشد شعرهم ولا نرمى عليهم حاجه .
مس سارة : يلا بينا عشان نصلى .
يصلى ويخرج ماريو اول واحد بسرعه
ماريو : انا هروح بسرعه عشان العب هههههههههههه سلام .
ويخرج ماريو الى الخارج
مس سارة : متزعلوش يا اولاد من ماريو اكيد هيجى الوقت وهيتعلم ازاى يحترم اصحابه وانتوا اصحابه وبلاش تزعلوا منه كمان عشان يمكن هو مش لاقى او حاسس انه لوحده .
ميشو : احنا يا مس سارة بنحبه بس هو بيحب يتريق على الناس كدا كبير وصغير .
يدخل احد الاطفال بسرعه ( يوسف ) .
يوسف : الحقى يا مس سارة الحقى بسرعه .
مس سارة : ايه اللى حصل يا يوسف مالك ايه اللى حصل ؟
يوسف : ماريو وهو طالع كانت فى شويه عيال مستنينه فى الشارع طلع يجرى راح مسكوه وقعدوا يضربوا فيه بالشباشب والعصايا وجروا منه وطاروا بسرعه
ههههههههههه وبيبكى بره عند الكنيسة
مس سارة : مينفعش نضحك على حد يا يوسف ده صاحبنا بردو
يوسف : يستاهل هو اصل هواللى جابه لنفسه وبيعمل حركات وحشه للعيال ويرمى عليهم ورق وطوب ويجرى عشان كدا هما ضربوه واستنوه بره
مس سارة : تعال نشوفه عمل ايه .
يخرج الجميع ويدخلوا يجدوا ماريو بيبكى
مس سارة : مالك يا ماريو بس بتبكى ليه
ماريو : شويه عيال ضربونى وجريوا ومعرفش راحوا فين .
مس سارة : شوفت يا ماريو انا قولتلك مينفعش نتريق على حد ولازم نحترم بعض كتير سواء كبير او صغير عشان ده غلط والعيال دول ممكن كانوا يضربوك ضربه اقوى من كدا وتروح المستشفى وتحصل مشاكل لبابا وماما بردو وكله بسبب التنمر زى ماقولتلك مينفعش نقول على خلقة ربنا حاجه وحشه
ماريو : عند حق يا مس سارة انا اسف على اللى عملته كله وانا هحترم كل واحد ومش هتريق على حد خالص وانا اسف يا مرمر انتى وشفيق وشنودة انا مش هقول عليكم كلام وحش تانى ومش هتريق عليكم سامحونى كتير انا اسف
ميشو: انت اخونا يا ماريو و مرمر وشفيق وشنودة كلنا اصحاب وبنحب بعض
مرمر : احنا مش زعلانين منك احنا بنحبك يا ماريو انت زى اخويا وممكن كلام اللى بتقوله ده يجرح واحد من جواه اما يلاقى الناس تضحك عليه وانت مش حاسس بكدا
فلازم نحترم بعض ونحب بعض .
شنودة : ايوه صح ربنا ماريو خلقنا كدايا ماريو وحتى لوصوتى وحش مينفعش نقول لبعض كدا فى ناس مولوده مش بتتكلم خالص اساسا ولا بتسمع بردو مينفعش نقول على بعض كلام مش كويس محدش بيختار شكله اما يتولد فى اطفال بتبقى مولوده مش بتشوف او مش بتسمع دى مينفعش نتريق عليها عشان ربنا اللى خلقهم كدا واحنا لازم نسامح ونحترم بعض ونخاف على بعض ونتمنى الخير لكل الناس .
شفيق : صح يا شنودة وانن كنت بتتريق بتقول ابو راس طويلة عليا انا مش بزعل منك خالص وانا بحبك عشان انت صاحبى وربنا قال حبوابعضكم بعض وفى ناس ممكن عندها راس ومخها مش شغال وعندها اعاقه مينفعش نتريق عليها دى خلقة ربنا .
ماريو : شكرا ليكم يا اصحابى وانا اسف مرة تانى وانا من دلوقت مش هتريق علي حد ولا اضرب حد ولا اشتم ولا اعمل حاجه مش حلوه واحترم الكبير والصغير وكمان هحترم بيت ربنا اكتر عشان ده غلط وانا اوعدكم ابقى ولد كويس خالص .
مس سارة : برافو يا اولاد انا عيزاكم تحبوا بعض كدا وتحترموا بيت ربنا وكمان تحترموا كل الناس وكويس يا ماريو انك عرفت كل ده يلا بينا عشان ترحوا البيت يلا سلام .