اسكتش عن الخوف
لا تخف لانى معك
اسكتش عن عدم الخوف من اى حاجه وعن قوة الصليب .
اهداف الاسكتش:-
1- عدم الخوف من اى شئ طالما الرب يسوع معنا لانه قال لاتخافوا .
2- علينا ان نرشم الصليب فى اى وقت قد نحس بالخوف لانه يطرد الخوف من داخلنا .
3- الصلاة قبل النوم وان نشكر الله على كل شئ وعلى حفظه لنا .
4- نتعود ان نرشم الصليب عندما نستيقظ او ننام .
هذا الاسكتش لمراحل ابتدائى ممكن تعملوه وتمثلوه فقرة افتتاحية فى مدارس الاحد او فى الفصل ويعرفوا قوة الصليب وقوة الصلاة وعدم الخوف من اى شئ .
هذا الاسكتش مأخوذ من قصة فى بستان الرهبان عن قوة علامة الصليب .
الشخصيات المأخوذه فى الاسكتش .
( الشيخ - الرجل الاسماعيلى- زعيم الشياطين- الشيطان الاول- الشيطان الثانى ) .
يدخل احد الشيوخ الكبار فى السن ويتحدث .
الشيخ: ياااه الواحد تايه ولا ايه فى الطريق هعمل ايه ياربى هعمل ايه ياااه مين اللى ماشى لوحده ده هناك اروح اشوفه يمكن الاقى مكان ننام فيه النهارده ونرتاح شوية .
يدخل احد الاشخاص وهو اسماعيلى لا يعرف المسيح .
الشيخ : من فضلك من فضلك لو سمحت .
الشخص الاسماعيلي: ايوه مين انت ؟ محتاج حاجه اقدر اساعدك فيها .
الشيخ : انا راجل كبير فى السن وكنت ماشى وعايز اروح اقرب بلد عشان ارتاح عشان المشوار طويل جدا عليا وبعدين اكمل طريقى .
الرجل الاسماعيلى : طيب تعال نتمشى كدا ونشوف مكان نرتاح فيه شويه تعال بينا .
الشيخ : ياااه احنا لينا كم ساعه ماشيين وخلاص وحتى معرفناش ننام فين دلوقت وكمان الليل جاى علينا خلاص لازم ندور على اى مكان نرتاح فيه .
الرجل الاسماعيلى: احنا احسن حاجه نروح نقعد فى الحتة اللى هناك دى اللى زى المغارة عشان الوحوش او التعالب هنا كتيره والكلاب ممكن تقابلنا دلوقت وتهجم علينا .
الشيخ : ايوه يلا بينا مفيش مكان احسن من كدا اهو لحد الصبح وخلاص نرتاح فيه .
ثم يخرج الاثنين ويدخلون مرة تانى وزى مغارة كدا داخلين فيها .
الرجل الاسماعيلى: يلا هنجهز مكان وخد الطوبة دى حطها تحت راسك عشان تنام عليها ويلا بينا عشان ننام ونرتاح وبكره نكمل طريقنا عشان الواحد تعبان خالص من المشى .
يفكر الشيخ فى سره شويه.
الشيخ : امممم انا لازم قبل ما انام ارشم علامة الصليب عشان دى قوتنا ومنخافش من اى حاجه طول ما الصليب معانا ولازم نرشم علامة الصليب فى اى مكان ندخله وقبل النوم وبعده وقبل الاكل بردو وبعده وفى كل حاجه فى حياتنا يلا هرشم علامة الصليب شمال ويمين وفوق وتحت وعليا وهنام باسم الاب والابن والروح القدس اله واحد أمين .
كويس كدا انا هنام دلوقت وانا مطمن ومش خايف من اى حاجه عشان ربنا بيحفظنى .
ثم ينام ويغلق الستار.
نشغل موسيقى رعب وخوف دخول الشيطان .
ثم يدخل رئيس شياطين ومعه جنوده ويجلس على الكرسى .
الشياطين مع بعض : اهلا يا بالزعيم اهلا بالزعيم نورت الجحيم .
الشيطان الزعيم : اممم انا شامم ريحة ناس هنا امممممم .
الشيطان الاول : ايوه يا زعيم دول شكلهم ناس جايين يباتوا عندنا هنا فى الصحراء الطويلة العريضة دى بتاعتنا ومش عارفين اننا اشترانا الارض وهى ملكنا دلوقت .
الزعيم : هما مش عارفين انهم جايين فى بيتنا ولا ايه ده شكلهم مش خايفين ولازم نعمل معاهم الواجب عشان يحرم حد يجى هنا وخلاص .
الشيطان الثانى : ايوه يا زعيم شكلهم مش خايفين على حياتهم ايه رايك يا زعيم نخوفهم شويه ونضحك عليهم قبل ما نديهم العلقة اللى هيا اى رايك ؟
الزعيم : ايوه صح روحوا خدوا كم حصان واجروا حواليهم شويه واعملوا اصوات كلاب واسود وتعالب وحيوانات مفترسة وارعبوهم خليهم يموتوا من الخوف .
وبعد ما ترعبوهم شويه هاتوهم ليا هنا ونشوف هما عايزين ايه فى الصحراء دى وبعدين نديهم العلقة اللى هيا عشان يحرموا يجوا عندنا هنا فى بيتنا .
الشيطان الاول : امرك يا زعيم يلا بينا يا رجالة .
ثم يخرج الجميع الى الخارج .
يفتح الستار عيلهم ويظهر الشيخ نايم هو والرجل الاسماعيلى ويدخل عليهم الشياطين ويرعبوهم باصوات ترعبهم وتخوفهم اصوات اسود وحيوانات .
الشيطان الاول للشيطان الثانى : ايه رايك يا معلم نرعبهم شوية .
الشيطان الثانى : ده احنا هنخليهم يترعبوا من الخوف ههههههه عشان يحرموا .
يعمل صوت كلب هو هو هو ويضحك عليهم .
الشيطان الاول : ده احنا هنضحك عليهم لحد ما نزهق كمان ونلعب بيهم شوية .
ويعمل صوت حصان ويضحك شوية هههههههههه .
ثم الشيخ ينظر بعينه ويخاف من الرعب .
الشيخ: ايه اللى شايفه ده يارب استر استرها يارب .
الشيطان الاول : يلا بينا يا معلم نمسكهم من رجليهم ونوديهم للزعيم عشان نديهم العلقة اللى هيا ونوضبهم شوية ونتسلى بيهم هناك ونلعب بيهم هههههههه .
الشيطان الثانى : يلا بينا امسك الرجل ده يلا ونجرى بيه بسرعه .
يلا هوووووب شيل اجرى اجرى اجرى .
الشيطان الاول : تعال نوديه للزعيم عشان يلعب بيه شوية يلا بينا .
الاسماعيلى : مين مين الحقونى الحقونى .
ثم يدخلوا للزعيم ويجدوه على الكرسى جالس .
الشيطان الاول : ايوه يا زعيم ادى الراجل اول واحد اتوصينا بيه .
الزعيم: اهلا بيك انت شرفت وضبوه وكسرو عظمه ادوه العلقة التمام .
ثم يضربوا شويه ويضحكوا عليه ويهزروا معاه .
الزعيم : اومال فين الراجل اللى نايم معاك يا انسان .
الاسماعيلى : هناك ياعم هتلاقى نايم اومال هيروح فين يعنى .
الزعيم : يلا هاتوه بسرعه عشان نوضبه شويه كمان مع صاحبه .
ثم يخرجوا ويدخل الشيطان الاول والثانى ليبحثوا على الشيخ .
الشيطان الاول : يلا بينا اهو تعال نشوف هنا اهو .
الشيطان الثانى : ايه ده لا لا مش قادرين ده فى قوة الصليب محوطاه ومش قادرين عليها لا اجرى بسرعه قبل ما نتحرق بسرعه اجرى لا لا .
الشيطان الاول : تعال نشوف الزعيم تانى نقوله على اللى حصل .
ويخرجوا مرة اخرى ويدخل والزعيم موجود .
الزعيم: ايه عملتوا ايه يا شوية شياطين ؟
الشيطان الاول: يا زعيم مش قادرين يا زعيم ندخل ومش عارفين نعمل ايه .
الزعيم : انتوا عيال متعرفوش تعملوا حاجه خالص مفيش فايدة فيكم مش بتتعلموا حاجه .
الشيطان : هنعمل ايه طيب يا زعيم مش عارفين ندخل ليه .
الزعيم للاسماعيلى : فين اللى نايم معاك ؟ اعترف اعترف .
الاسماعيلى: ياعم نايم مكانه هو هيروح فين موجود مرمى مكانه هناك .
الزعيم : طيب وضبوه ده تانى عشان يحرم يتكلم وروحوا هاتوا الراجل التانى شفوه بسرعه عشان نضربه شويه كمان ونتسلى بيه .
يضربوا الشياطين الراجل شويه ويصرخ من الضرب
الاسماعيلى : كسرتوا عظمى كفايه كفايه انا حرمت مش هبقى هنا تانى .
الشيطان الاول: يلا بينا يا معلم نروح نسحب الراجل ده من تحت الارض او من فوق عشان مش نتحرق وناخده بسرعه من غير ما يحس زى صاحبه .
ثم خرجوا ويدخل ويجدوا الراجل نايم .
الشيطان الاول : خد يا معلم الراجل من تحت الارض وانا همسكه من فوق ونجره بسرعه.
الشيطان الثانى : ماشى يلا بينا من غير ما يحس يلا بسرعه امسك .
الاول: ايه ده لا لا ده علامة الصليب فى كل حته اهرب يا معلم بسرعه ده هنتحرق بسرعه اهرب لا لا ده كدا مينفعش يلا نخرج بسرعه عشان شكنا هنتحرق .
ويخرجوا بسرعه الى الخارج .
يدخل الشيطان الاول والثانى للزعيم .
الزعيم : عملتوا ايه يا شوية عيال ؟
الشيطان الاول: يا زعيم ده علامة الصليب فى كل حته وكل ما نقرب هنتحرق انا خايف يا زعيم نتحرق كل ما نقرب عليه نلاقيه راشم علامة الصليب فى كل حته ومش عارفين ندخل عليه يا زعيم لازم نشوف حل طيب .
الزعيم : ياااه ده علامة الصليب هنشوف حل ازاى مينفعش نقرب تانى هنتحرق اضربوا الراجل ده تانى وارموه بعيد ويلا بينا لنتحرق من علامة الصليب .
يضربوا الراجل تانى شوية ويصرخ من الالم .
الرجل الاسماعيلي: كفاية ضرب هو مفيش غيرى ولا ايه الحقونى الحقونى .
الشيطان الاول للثانى : يلا يا معلم تعال نرميه قريب على صاحبه عشن الصبح قري يطلع ومش نتحرق من علامة الصليب يلا هووووب ارمى .
ويرموا الراجل ويخرجوا بسرعة ويخرج الجميع .
يصبح الصبح وينادى الشيخ على الرجل اسماعيلى .
الشيخ: ياااه الصبح جه بسرعه الواحد مكانش حاسس بحاجه والنومة دى كانت حلوه بشكل اول مرة من زمان انام النومة دى اكيد عشان ربنا بيحفظنا .
اى ده الراجل اللى معايا ماله مرمى كدا ومتعور يا ترى اى اللى حصل ليه .
الشيخ :مالك ايه ده اى اللى حصل ليك كدا ؟ حد اتخانق معاك ولا حيوان هجم عليك ؟
الاسماعيلى : ااااه اااه ده جسمى كله اتفشفش من الضرب شوية ناس كدا شكلهم اسود ومسكونى وضربونى ضرب وكل ما يقربوا منك عشان يمسكوك يجروا بسرعه ويخافوا ومش عارف كأنى مفيش غيرى . اومال انت محدش يقرب ليك كدا ازاى ؟
الشيخ: اصل انا قبل ما انام رشمت علامة الصليب اللى هى قوتنا .
والصليب هو اللى اتصلب عليه رب المجد وسحق قوة الشيطان عشان كدا الشياطين يخافوا من الصليب واحنا لازم نرشم علامة الصليب فى كل حاجه نعملها قبل ما ننام او بعد ما نصحى او قبل الاكل وكمان فى اوقات كتير عشان دى قوتنا والايه فى الكتاب المقدس بتقول حاشا لى ان افتخر الا بصليب ربنا يسوع المسيح عشان كدا احنا طول ما نرشم علامة الصليب مش هنخاف من اى حاجه .
الرجل الاسماعيلى : طيب احكيلى من الاول عشان افهم نفسى اعرف قوة الصليب دى .
قوة الصليب
يحكى الشيخ للرجل مع موجود موسيقى فى دقيقة بدون كلام .
الاسماعيلى: ياااه ده علامة الصليب قوية خالص انا هروح اتعمد وهبقى مسيحى عشان كدا
الشيخ: ايوه عشان قوتنا هى الصليب عشان اتصلب عليه مخلصنا ربنا يسوع المسيح ولازم نتعود اننا مش نخاف من اى حاجه فى البيت او الشارع اواى مكان عشان ربنا بيحافظ علينا وملايكته بتحرسنا مش نخاف خالص .
الشيخ : يلا بينا عشان النهار طلع نكمل طريقنا وتروح تتعمد وتبقى مسيحى
الاسماعيلى: يلا بينا بسرعه انا عايز ابقى مسيحى بسرعه .
يخرج الجميع الى الخارج وتقفل الستار .