مواقف بنات يليق ولا يليق
نادية والسينما
يهدف الاسكتش الى التعريف بخطورة بعض المواقف التى قد تحدث فى الحقيقة وقد لا ندرى ما تكون عواقبها فيما بعد .
اسكتش هدفه توعية البنات بأشياء قد تكون من نظرة البعض صحيحة وفى نظرة البعض خطا والهدف منه من خلال الاسئلة معرفة شخصيات الاسكتش .
تدخل سامية المسرح وتنادى على نادية صاحبتها
سامية : يا نادية يلا بينا هنتأخر على ميعاد الاجتماع فى الكنيسة
تدخل عليها نادية وتربط فى شعرها
نادية : انتى علطول مستعجلة يا سامية هى الدنيا طارت هنروح هنروح
سامية : طيب ما هو كل مرة تأخرينا انتى وتقدى تتزوقى فى لبسك وشكلك ومش هنخلص دلوقت من الحكاية دى .
نادية : بس اسكتى انتى هو مفيش غير الكلام ده كل شويه ولا اى ما احنا عارفين القصص دى وكل شوية يقولوا فى الكنيسة الحشمة الحشمة هو ايه يعنى احنا ماشيين غلط ولا اى.
سامية : لا مش غلط يا نادية هو اقدر اقول عليكى حاجه غلط ولا ايه .
نادية : ايوه كدا اتعدلى فى الكلام شوية ( بضحك ) قوليلى بقى اى رأيك فى اللبس بتاعى ده شيك ولا لا والبنطلون الاستايل ده والتيشرت ده شغل عالى يا بنتى انتى ماليكيش فى الحوارات دى شكلك اخرك شوية الهلاهيل اللى لابساها دى لموأخذه هههههههههه
سامية : ماشية يا ستى يعنى انتى بتقولى كدا عايزه رأيي ولا بتغظينى ؟
نادية : لا طبعا عايزه رأيك هو انا لسمح الله بتكبر ولا ايه .
سامية : امممم طيب اول حاجه انتى مش شايفه ان اللبس ده اوفر خالص والبنطلون اللى فيه تقطيع ده والتيشرت اللى قصير ده
نادية : اسكتى بس بس انتى هتجيبلا كل حاجه فى اللبس مفيش حاجه عجبتك خالص .
سامية : يا بنتى هو انا هكذب عليكى ولا ايه مش انتى اللى عايزه رأيي
نادية : بس اسكتى مشوفتيش اللى حصل الاسبوع اللى فات وانا راكبه العربية مشوفتيش اللى حصل ده ولا ايه ؟
سامية : ليه كدا كنتى فين ؟
نادية : كنتى مروحه من الجامعه وراكبة العربية .
سامية : اى اللى حصل كمان احكى احكى .
نادية : كنت لابسه شوية ملابس عادية يعنى زى كدا الجو اساسا كان حرارة موت .
سامية : ها وبعدين كملى .
نادية : ولقيت يا ستى شوية اولاد بيتجننوا ورايا وسمعاهم وشيفاهم نظراتهم عليا مقولكش خفت بصراحة فى الوقت ده بس عادى هيعملوا ايه متعوده على الاشكال دى .
سامية : طيب وبعدين حصل ايه .
نادية : عادى روحت البيت وعدى اليوم مفيش اى مشكلة .
سامية : طيب وانتى مش شايفة انه فى مشكلة فى اللبس يعنى عادى .
نادية : عادى يا بنتى دى حرية شخصية طيب ما انا رايحه الكنيسة عادى باللبس ده والنهاردة اجتماع الشباب والشابات والاولاد اساسا انتى عارفه شكلهم ايه .
سامية : ماشية بس احنا اولا رايحين نصلى وناخد بركة مش رايحين نعرض لبسنا .
نادية : ده استايل مش عرض ملابس موضة جديدة .
سامية : بس بردو دى كنيسة وكمان الشباب هناك يعنى فى الشارع واماكن كتير .
نادية : ده الشباب بتبص عليا ومش بينزلوا عنيهم من عليا فى الكنيسة وقت الاجتماع وكل واحد عايز يعمل نفسه البطل المغوار ههههههههه
سامية : مش كل الشباب فى تفكيرك كدا فى ناس كويسة كتير .
نادية : المهم سيبك من كل ده احنا عايزين نروح السينما النهارده . اى رأيك ؟
سامية : سينما ايه كمان دى واحنا رايحين الاجتماع .
نادية : عادى واحنا طالعين من الاجتماع هنروح انا وشلة البنات صاحبتنا .
سامية : لا يا ستى بلاش احسن هنتاخر ع البيت .
نادية : انا عملت حسابى قولت لماما هنتاخر فى الاجتماع احتياطى محدش عارف الظروف هيجرى ايه بردة .
سامية : على اساس ايه قولتى كدا يعنى انتى كذبتى عليها مقولتيش ليها موضوع السينما .
نادية : لا يا بنت قولتلها هتأخر مجبتش سيرة السينما خالص .
سامية : طيب ما الاجتماع معروف ميعاده يا ختى .
نادية : ماشى بس ممكن بردو يتأخر تحصل اي ظروف يعنى ههههههههه
سامية : انتى عايزه تبررى كدبك يعنى بالكلام ده هو احنا هنضحك على ربنا يعنى .
نادية : يا سمسمة انا مكذبتش انا قولتلها هنتاخر ومممكن مش نتأخر .
سامية : طيب وما جبتيش ليه سيرة السينما ليها .
نادية : طبعا ممكن مش هتوافق ده اكيد كمان .ياعم خلاص طنشى ياريت ما كنت قولتلك اساسا يلا بينا ع الاجتماع بدل التحقيق ده .
سامية : خدى بالك بقى شوية من الحاجات دى عشان هتجيب وراها مصايب متعرفيهاش دلوقت وانتى هتلاقى نفسك فى دوامة اخرتها مصيبة .
نادية : بس بس كفاية كدا انتى هتعمليها مصيبة يلا انا جهزت اهو يلا بينا .
يخرج الاثنان وينتهى الاسكتش .
فى نهاية الاسكتش يقوم بنقاش الاسكتش فى الاجتماع من خلال الاسئلة وعرض المواقف اللى ظهرت فى الاسكتش وكيفية تقديم الحلول لها .
اسئلة الاسكتش
السؤال الاول هل نادية شايفة الاجتماع فسحه بالنسبة ليها ؟
السؤال الثانى ملابس نادية ممكن تتلبس فى داخل و خارج الكنيسة من نظرتها ؟ ومن نظرتك انت هتعمل ايه ؟
السؤال الثالث : هل نادية حاسة بالغلط اللى عملته فى العربية من خلال نظرات الشباب ؟
السؤال الرابع : هل نادية كذبت على مامتها بالطريقة دى ؟
السؤال الخامس : هل ممكن مامت نادية تعرف بقصة خروجها بعد كدا ؟
السؤال السادس : لو مكان صاحبتها سامية ممكن تعمل ايه ؟ هتقول لمامتها ؟
السؤال السابع : هل نادية من خلال كلامها عارفها ان مامتها مش هتوافق عشان ملابسها ولا عشان هتتأخر ولا عشان مش واثقه فى بنتها ؟
السؤال الثامن : هل نادية ممكن تكون سببت عثرة للشباب سواء فى الكنيسة اوالشارع ؟
السؤال التاسع : لو كنت مكان مامت نادية هتعمل ايه ؟
فى نهاية الاسكتش يجب ان الكل يعرف بخطورة الموقف وان البيت يكونوا عارفين بنتهم هتروح فين وواثقين فى بنتهم كويس والملابس زى ما احنا شفنا فى الاسكتش تكون محتشمة خاصة فى الكنيسة عشان دى بيت ربنا وطبعا فى كل الاماكن لاننا اولاد وبنات المسيح وممكن الانسان عايز يظهر نفسه وميعرفش انه ممكن يسبب عثرات لغيره حتى من غير ما يدرى فلازم نوعى كل بناتنا بخطورة هذه المواقف وممكن بسبب كدا الموضوع يوصل للتحرش وتوصل لعواقب وخيمة فى غنى عنها .
الرب يبارك ويعمل فى اذهاننا والى اللقاء فى الحلقة الثالثة .