اسكتش عرايس ميلاد

 

اسكتش عرايس الميلاد العظيم اللوحه الأولى اهداف الاسكتش  1- معرفة قصة ميلاد ربنا يسوع المسيح  2- معرفة الفرق بين الكريسماس وعيد ميلاد بابا نويل . 3- محبة الاخرين وعدم التريقة على حد خالص . 4- لازم نسمع كلام بابا وماما فى البيت ونفهم هم عايزين ايه كويس .
يدخل الام وبيتر ومارى ومعهم شجرة واشياء لتزيين الشجرة وتمثال لبابا نويل وصوت موسيقى we wish u a merry christmass  فى الخلفية ثم تبدأ الام بالحديث
الام	يالا يا بيتر شد حيلك شوية عاوزين نخلص قبل ما بابا يجى   .. حط الشجرة فى مكانها هنا .. ايوووة هنا وانتى يا مارى طلعى تمثال بابا نويل دة وحطيه جمب الشجرة
مريم	حاضر يا ماما .. ماما
الام	نعم يا حبيبتى
مريم	هو بابا نويل دة عنده كام سنة
الام	اية ؟
مريم	بسألك يا ماما .. بابا نويل دة يطلع عنده كام سنه كدا ؟
الام	مممم بصى هو احنا جبناه لما انتى اتولدتى .. يعنى من يجى 7 سنين كدة مثلا ولا حاجة
مريم	لأ يا ماما انا مش بسأل على التمثال .. انا بسأل على بابا نويل نفسه .. يعنى بابا نويل فى عيد ميلادة اللى جاى دة هيبقى عندة كام سنة ؟
بيتر	ههههه .. الحقى يا ماما دى فاكرة الكريسماس يبقى عيد ميلاد بابا نويل ..عيد ميلاد بابا نويل اية بس يا بنتى .. بابا نويل معندهوش عيد ميلاد
مريم	لأ عندة .. اسكت انت ماما مش الكريسماس هو عيد ميلاد بابا نويل ؟
الام	لأ يا حبيبتى الكريسماس دة مش عيد ميلاد بابا نويل ولا حاجة
مريم	اية دة ! بجد ؟ امال هو بيوزع هدايا لية على الناس فى العيد
بيتر	عشان هو بيحب يساعد الناس ويشوفهم مبسوطين ومش محتاجين حاجة
مريم	طب واحنا لية بنوزع هدايا وندى بعض حاجات احنا كمان ؟
الام	عشان احنا كمان يا مارى لازم نساعد الناس اللى محتاجة ونفرحهم .. ويالا بقى شهلى شوية فى التزيين عشان نلحق نخلص قبل ما بابا يجى
مريم	حاضر
يدخل الاب ومعه بعض الهدايا
الاب	ازيكم يا ولاد .. كل سنة وانتم طيبين
بيتر	اهلا .. ازيك يا بابا
الاب	بصوا شوفوا .. شوفوا انا جبت اية
مريم	الله يا بابا حلوين اووى
بيتر	اية لمارى واية اللى ليا ؟
الاب	لأ دى حاجات مش ليكم دى حاجات لاخوة الرب المحتاجين عشان خاطر يلبسوهم فى العيد
الام	تعيش وتجييب
الاب	متشكر اوى
بيتر	شفت يا بابا مارى
الاب	مالها ؟
بيتر	فاكرة ان الكريسماس يبقى عيد ميلاد بابا نويل هههه
مريم	يووة بقى بطل يا بيتر .. كل شوية يا بابا يتريق عليا
الاب	ههه معلش يا مرمورة .. هو انتى مش عارفة احنا فى عيد الميلاد دة بنحتفل باية
مريم	انا كنت فاكرة اننا بنحتفل بعيد ميلاد بابا نويل
الاب	لأ يا حبيبتى .. احنا بنحتفل بعيد ميلاد رب المجد يسوع   اية رأيكم احكيلكم الحكاية
الام	ايوووة حلوة اووى .. انت احكيلهم الحكاية وانا هروح احضر الغدا
الاب	فى يوم من الايام كان فى ولد صغير شغال مع باباه بيرعى الغنم و كان قاعد زهقان
يخرج الاب والاولاد ويدخل طفل يرتدى جلباب ومعه عصا صغيرة ويبدو على وجهه الحزن
حنا	يا جماعة .. هما راحوا فين .. يا عم بينيامين .. الله . محدش بيرد عليا لية ! .. عمو زكريااا ياربى هما راحوا فين دول !
يجلس ويده على خده ثم يبدأ فى الترنيم
حنا	انا زهقان انا مش عارف .. هما سابونى وراحوا فين بس انا دايما كدة وحدى ياربى ....ومحدش بيا بيحس انا عاوز حاجة تفرحنى ..وتحسسنى ان انت هناك  حتى فى وقت الامى وتعبى .. برفع عينى ليك بلقاك انا عارف ان انت معايا .. وانا بفرح بوجودى معاك هو انت امتى هتجيلى .. وتفرح قلبى برؤياك وتفرح قلبى برؤياك
	يدخل زكريا .. راعى يرتدى جلباب
زكريا	حنا .. اية دة انت هنا .. انت بتعمل اية ومرحتش معاهم لية ؟
حنا	عم ذكريا اخيرا لاقيتك انت كنت فين واروح معاهم فين ؟
زكريا	تروح معاهم المزود
حنا	مزود ؟؟ مزود اية يا عم زكريا ؟
زكريا	مزود البقر يا حنا
زحنا	مزود بقر اية بس يا عم ذكريا .. مش كفاية علينا الخرفان .. هنربى بقر كمان
زكريا	لاا دة انت شكلك مش فاهم حاجة خالص
حنا	طب فهمنى .. اية اللى حصل
زكريا	هو انت محستش باى حاجة بليل ؟
حنا	حاجة ؟ حاجة زى اية ؟ اة اة قصدك لما عم بينيامين جة يشيل الخروف الخروف عما عليه ببي ؟ ههههه ايوة افتكرت دة انا قعدت اضحك عليه اوى بس بردة مش فاهم اية علاقة دة بالمزود
زكريا	بيبى ؟ ببى اية بس يا حنا لأ انا قصدى متأخر شوية لما جينا ننام
حنا	ايوة ايوة افتكرت لما جينا ننام وعم نوح قعد يشخر ويعمل اصوات غريبة ببقه ومحدش كان عارف ينام منه هههه كان مسخرة بس بصراحة انا كنت نعسان اووى ونمت على طول
زكريا	ااة عشان كدة .. عشان كدة مشفتش اللى حصل
حنا	اية اللى حصل بقى يا عم زكريا ما تقلى
زكريا	طب انت مسمعتش اى صوت غريب بليل ؟
حنا	غير صوت عم نوح لأ بصراحة صوت شخيرة كان عالى اووى
زكريا	طب مشوفتش اى نور؟
حنا	ايوة انا فعلا شفت نور غريب كدة كان شديد اووووى كأن الشمس ضربت فى وشى بس لما فتحت عنيا ملقتش حاجة ولاقيت الدنيا لسة ضلمة والشمس مطلعتش ولا حاجة فنمت تانى
زكريا	ايوة هو النور دة
حنا	اية هو النور دة يا عم زكريا ما تفهمنى اكتر
زكريا	دة كان ملاك يا حنا .. احنا ظهرلنا ملاك عظيم اوووى
حنا	ياااة اية دة بجد ؟ دة انا كان نفسى اشوف ملاك اووى .. شكله اية يا عم زكريا ها .. شكله اية ؟
زكريا	شكله ابيض وعظيم ونوره شديد وقالنا كلام غريب
حنا	قالكم اية ؟
زكريا	قالنا ان المسيح اتولد النهاردة وقلنا يالا روحوا شوفوة
حنا	بتقول اية !! المسيح اتولد ..انا مش مصدق
زكريا	ما ناا كنت زيك كدة بس هو قالنا نروح نشوفه فى المزود اللى فى بيت لحم هنلاقية هو وامه
حنا	طب وانت مستنى اية يا عم زكريا .. تعالى يالا ودينى بسرعة عاوزة اشوفه .. يااة اخيرا يارب هشوفك
يخرج الراعى وحنا ثم يدخل حنا وهو بيده البقرة والحمار وبرسيم
حنا	تعالوا تعالوا بس متخافوش انا مش هعملكم حاجة ..انا هديكم اكل ومية وحاجات جميلة
البقرة	يا سلام مقابل اية بقى ان شاء الله اكيد هتموتنى وتاكلنى .. يا ماما .. انا خايفة رجعنى المزود ارجوك
حنا	متخافيش صدقينى انا مش هعملكم حاجة .. انا بس عاوزكم تحكولى اللى حصل
الحمار	انا اقلك يا سيدى .. انا كنت مع يوسف ومريم فى مصر وبعدين مريم تعبت اووى كان لازم تولد
حنا	ااة يوسف دة اللى يبقى جوزها ؟
االحمار	لأ خطيبها
حنا	خطيبها وهى حامل ؟؟ طب ازاى ؟ انا ماما قالتلى الست عشان تبقى حامل لازم تبقى متجوزة !
الحمار	مريم مكنتش حامل فى انسان عادى .. دى كانت حامل فى ابن الله .. الروح القدس حل جوة بطنها بعد ما ظهرلها الملاك وخلاها حامل من غير جواز خالص
حنا	اااااه .. دى معجزة فظيعة !
الحمار	بالظبط كدة ما تجيب شوية برسيم ..
حنا	لأ لما تخلص الحكاية ..
الحمار	طب مش هحكى حاجة .. ها بس
حنا	لا لا خلاص .. اتفضل .. ها كمل
الحمار	على فكرة البقرة اللى هناك دى اكلت البرسيم كله ..
حنا	متخافش انا معايا تانى ..سيبها بقى وركز معايا.. وبعدين
الحمار	وبعدين بقى مريم قعدت بطنها تكبر تكبر تكبر وكان لازم بقى تولد فراح يوسف ركبها على ضهرى وفضلنا ماشييين ماشيين طريق طوووويل لحد ما جينا بيت لحم
حنا	ها وبعدين ؟
الحمار	ما تجيب حبة برسيم بقى .. البقرة هتخلصه
حنا	يادى البرسيم .... حمار مادى اوى .. اتفضل يا سيدى .. كمل بقى
الحمار	بعد ما جينا بيت لحم .. فضلنا ندور على اى مكان تولد فيه ملقناش خالص وبعدين فى واحد صعبنا عليه اخدنا ودانا المزود ومريم ولدت هناك
الاب	طب وبعد ماولدت حصل اية
الام	مش عارف بقى انا كنت تعبان ونمت خلى البقرة تحكيلك
البقرة	انا اقلك .. مريم فضلت تتوجع جااامد جدا وبعدين هوووب ولدت نونو جميل وزى القمر .. بعدها بشوية لقينا شوية رعاة جايين وسجدوا للنونو الصغير وبعديها جة ناس كدة بيقولوا اسمهم ... اسمهم ... اسمهم الجاموس
حنا	هههه .. جاموس اية بس ..انتى قصدك  الماجوس ؟؟
البقرة	ايوة هما المجوس دول وانا ايش عرفنى بقى .. بردة جم وجابوله معاهم هدايا وبردة سجدوله
حنا	طب وبعدين حصل اية ؟
الحمار	وبعدين حضرتك جيت واخدتنا .. ممكن بقى ترجعنا عشان زمان يوسف محتاجنى دلوقتى ؟
	حاضر هرجعكم وهاجى معاكم كمان اقعد مع الرب يسوع شوية .. يالا بينا
يخرج الثلاثة ويدخل الاب والاولاد
مريم	دى القصة طلعت غير ما انا فاكراها خاالص .. بس يا بختك يا حنا ياريتنى كنت مكانك .. بابا انا نفسى اوى اشوف بابا يسوع .. ممكن الاقيه فين ؟ هو خلاص طلع السما ؟
الاب	هو فعلا دلوقتى فى السما يا حبيبتى لكن هو موجود جوة فى قلبك ؟
بيتر	بابا .. انا عاوز اجيب هدية لبابا يسوع فى عيد ميلادة .. تفتكر اجيبله اية ؟
الاب	همممم .. سؤال جميل ..بس هو مش محتاج حاجة يا بيتر بس عارف اية اكتر هدية هيحبها الرب يسوع منك ؟
بيتر	اية ؟
الاب	قلبك الجميل يا بيتر ..
الام	يا اولاد .. يالا الغدا جاااهز
مريم	حاضر يا ماما
الاب	اية رأيكم يا اولاد نصلى قبل ما نتغدا
بيتر	ماشى
الاب	يالا يا بيتر ابتدى ..
بيشوى	يارب انا بشكرك انك اتولدت علشانى فى مزود بقر بسيط .. انا بحبك اوى .. كل سنة وانت طيب
الجد	يارب .. انا بديلك قلبى هديه ياريته تقبله وتدخل تسكن فيه وتخليه دايما نضيف ونقى ..كل سنة وانت طيب ^_^
تبدأ ترنيمة فى عيد ميلادك ياربى الملك ويبدأون الترنيم معها ثم يدخل الحمار والبقرة والام ويرنمون سويا مع الاطفال النهاية جروب نصوص واسكتشات للخدمة الرب يعوض كل من له تعب فى الخدمة