اسكتش يوم الميلاد

 

اسكتش يوم الميلاد العظيم

اهداف الاسكتش : 

1- معرفة قصة ميلاد ربنا يسوع المسيح بطريقة مبسطة .

2- اهمية شخصيات فى حياة ربنا يسوع المسيح .

3- سرد بعض شخصيات اللى ظهرت فى حياة الرب يسوع .

المشهد الاول ..

مريم : يااا ياجدى اليوم انهارده كان صعب خالص وانا تعبت اوى
الجد  : معلش يا مريم ربنا يعوضك  .. انا كمان تعبت اوووى
مريم  :بس متنساش ياجدو انت وعدتنى انك هتحكيلى  حكايه من الكتاب المقدس
الجد : لا ياحببتى مش ناسي تعالى هكيلك حكايه حلوه اوووى
كان ياما كاان ايااام زمان  يوم عدي عليا انا وجدتك كان كل البلد مقلوبه من سنين طويله وبعيده كنت قاعد فى محلى  وجه يوم عجيب اسمه يوم الاكتتأب 
مريم : اكتتأب يعنى ايه يا جدو اكتتأب ؟!!
جدو : يعنى كل الناس جت بيت لحم علشا يسجلوا اسمائهم علشان يعرفوا عدد الناس الموجودين 
وانا قاعد على باب المحل لقيت راجل جاااى من بعيد  ومراته دخلين على حمار وكانت مراته حامل وكانت تعبانه خااالص
 يدخل يوسف ومريم
يوسف :  السنه دي زحمه اوووى فى بيت لحم علشان التعداد السكانى
العذرا  : اتصرف يا يوسف انا مش قادره ..أه ..أه.. انا حاسه انى بولد يايوسف
يوسف : نعمل ايه يارب مفيش فندق فاضى ولاحته نبيت فيها ... تعالى نسال الراجل اللى هناك ده ... لو سمحت من فضلك
جدو: اتفضل
يوسف : احنا جايين من سفر طويل ومراتى بتولد ومش لقيين حته نقعد فيها
جدو: ياخبر ..شكلها تعبانه فعلا  انا معنديش مكان مناسب ليكم بس .. بس فيه مكان  بس هو مش حلو ومش مناسب لناس زاييكم ورحته وحشه
يوسف : مكان ايه ورينا المكان ده
جدو : هو الاسطبل ال هناك ده
يوسف : اسطبل معقول  ..مزود بقر !!
  العذرا : انا تعبانه يا يوسف
يوسف : طيب يلا يا مريم اسندي عليا  ( يدخلو المزود )
 
مريم : وازاى يا جدو  الست وافقت تولد فى المكان الوحش ده ده انا لما بلعب جنبه برجع بسرعه  مش بستحمل ريحته
جدو: الست ام الطفل اسمها مريم
مريم : ياااه مريم زاي اسمى
جدو: وفضلت الست تتألم  تتألم لحد لما ....
( صوت بكاء طفل )
مريم : لحد ما اتولد الطفل
جدو : شاطره يامريم .. وكان ف نفس الوقت فيه مجوس قاعدين شافوا نجم كبيررر فى السماء بيلمع قوووى قالوا دي اكيد علامه ميلاد ملك عظيم تعالوا نمشي وراه ونشوف مين الملك ده
( نشغل جزء من ترنيمه نجما اشرق )
مريم : وبعدين يا جدو
جدو : كان المجوس وخديـيـن معاهم هدايا للمولد مـر , دهب , ولبان
مريم  : ايه !! ايه الهدايا الغريبه دي يا جدو 
جدو : خليهم هما يقوللنا ايه الهدايا دي
المجـــوس
1:  انا جبت للمولد (دهب ) وده رمز الملك فى العهد القديم زاى ماكان تابوت العهد كله متغطي بالدهب
2: انا هقدم للمولد  (اللبان ) وهو حبات البخور اللى بنحطها فى المجمره وده رمز للكهنوت والعبادة
3: اما انا بقى هقدمله  (المر)  وهو نوع من انواع العطور وبيرمز للآلم
 (ويتجهوه نحو المزود... على انغام ترنيمه ارضي افرحى )
 
 
 
 
 
ونطفئ النور
ونشغل النور على تلات شخصيات 
السامريه .. نازفه الدم .. المولد اعمى
يدعكوا عنيهم ويبصوا حواليهم
السامريه ... ياااا احنا فين
نازفه الدم .. ازاى جينا هنا  ايه المكان الغـريب ده
المولود اعمى ... وايه المزود اللى هناك ده ..
السامريه .. ااايه ده مش دي مريم  ام يسوع  المسيح ....احنا شكلنا رجعنا بالزمن  ودي ولاده يسوع المسيح تعالو بسرعه نشوف الطفل يسوع
(يروحو عند المزود )
السامريه .. ياااه يارب انت ابرع جمالا من كل بنى البشر
النازفه .. أأأه يارب ياشافى المجروحين مستهلش اشوف لحظه ميلادك
المولود اعمى .. يسوع المسيح ربي واللهى  شافى جسدي  ( يسجد )
يوسف .. يبص على نازفه الدم  ويقول .. انتوا مين؟؟؟
العذراء ... و ازاى عرفتوا اسم ابنى
نازفه الدم  تشيل البيبي   وتقوم تقف فى نص المسرح.. وتحكى
انا معروفه فى الكتاب المقدس باسم المراءه نازفه الدم حكيتى هقولهالكم بختصار  انا قعدت 12 سنه تعبانه وبنزف  وكنت بتألم جدااا ولفيت على كل الحكماء ومحدش قدر يشفينى وبعد ما ييأست  سمعت عن يسوع ومعجزاته وعرفت انه موجود فى البلد بس لما رحت لقيت ناس كتير اوى حواليه وقلت مستحيل هقدر اوصله بس كان جوايا ايمان انى لو لمسن طرف جلبيته هخف  وفعلا لمسته وهو وبرغم كل الناس اللى حواليه حس بيا وقال لتلاميذه مين لمسنى  فى حد لمسنى وتلاميذ قالو يا معلم الناس كتير حواليك طبيعي حد يلمسك قال لا انا حسيت بقوه عظيمه خرجت منى ولما سمعته وطيت على رجله وكنت خايفه وقالى يا بنتى ايمانك شفاكى وخفت بعد طول السنين دي وامنت بيسوع المسيح ربى واللهى ومخلصي
وتدي الطفل ليوسف ... ويوسف يبص ليسوع وللمولود اعمى طيب وانت مين وايه حكايتك
 
 
 المولود اعمى ...يااااااه ده انا حكايتى طويله
انا كنت مولود اعمى وعشت عمرى كله بشحت لحد ما مره سمعت ان يسوع جاى ووقف قدامى والتلاميذ سالوه  ليه يايسوع  اتولد اعمى يا ترى امه اللى غلطت ولا ابوه اللى وحش ... رد يايسوع المسيح  وقال  مرضه ده مش نتيجه خطيه  ده ربنا سمح بالضربه دي علشان يظهر اعمال الله فيه وقتها اتبسط اوووى لانى كنت ديما بسمع الناس وهى بتشتمنى وبتشتم امى وابويا ودى كانت اول مره بسمع حد بينصفنى وبيعزينى ولاول مره كنت اسمع ان عمايا مش غضب من ربنا عليا .. وسالته انت مين  قالى  يسوع المسيح وهو بيحط ايديه على عينى بالطين  وقالى اغتسل فى بركه سلوم وفعلا رحت وفتحت وبقيت بشوف يسوع المسيح خلقلى عنين  وعرفت من وقتها ان يسوع المسيح هو نور العالم  وامنت انه الله
 
 
 العذراء ... ياااا ابنى والهى هيعمل كل ده هو شافى النفوس والاجساد ... وتبص على السامريه طيب وانتى ايه قصتك
السامريه .. انا كنت فى يوم شايله الجاره ورايحه عند البير وكان الطريق وحش ونظرات الناس ليا بتقتلنى
وعند البير لقيت راجل  قاعد وشه  وديع مليان سلام .. وكان شكله يهودى  وبعد ما مليت الجاره  قالى هاتى اشرب
واستغربت  جداا ازاى بيطلب منى يشرب وانا سامريه  وهو يهودي
رد يسوع المسيح  وقالى مانتى لو عارفه مين بيكلمك مكنتيش هتقولى كده مكنتيش هتستغربي ... كنتى هتطلبى منى ماء الحياه المايه اللى معايا لو شربتى منها مش هتعطشي ابدا... السامريه .. ياااا طيب ادينى المايه دي خلينى محتاجش اشرب تانى
قال يسوع طيب روحى هاتى جوزك وتعالى  ..ردت .. بس انا مش متجوزه
يسوع المسيح ... انتى قلتى الحقيقه لانك اتجوزتى 5 مرات واللى انتى عايشه معاه دلوقتى مش جوزك
السامريه .. ان نــبــى  انا عارفه ان المسايا هيجي وهيبقي عارف كل حاجه
يسوع ... انا هو الذى يكلمك  وجريت على المدينه  وبشرت بوجود يسوع المسيح وحكيت للناس عن النبي اللى عرف عنى كل حاجه وانه كلمنى رغم انى من الساميريه
 
 
 
مريم ... ياااااه يا جدو بقي الطفل المولد فى المذود ده هو يسوع المسيح ربنا ومخلصنا
يتلموا كلهم حواللين المذود ويسجدوا 
النهايه
وتبداء ترنيمه  نزل من السماء للارض
 تاليف الاستاذه انجى ملاك