صلاة مكتوبة لنهاية العام
صلاة خاصة بنهاية السنة
بسم الاب والابن والروح القدس الاله الواحد امين
كنيستنا علمتنا نشكرك انت اللى علمتنا يارب نشكرك يارب حتى لو تعبانين مضايقين حيرانين نشكرك يارب لانك وصلت ناس كتير السماء اديتهم اكاليل وافراح .
نشكرك يارب انك عبرت الموت على ناس كتير من شعبك لكن انقذتهم وقومتهم كأنهم قاموا من الاموات , نشكرك يارب على الناس اللى اتعزت رغم الامها وقربت منك رغم احزانها واتعلموا الايمان واتعلموا الاتكال وبكوا قدامك بعد ما كانت عينيهم ناشفه وقلبهم ناشف .
نشكر يارب
نشكرك على كل نفس سمعت سمعت الانذار وتابت واتضعت وخافت خوف مقدس نشكرك يارب لانك ما بتغلضش فى احكامك كل اللى بتعمله بيطلع صح دايما صح .
نشكرك يارب لانك دايما قريب من اولادك بالذات المجروحين والتعبانين محدش بيعزيهم غيرك ومحدش بيحس بوجعهم زيك .
نشكرك يارب ان فى هذه جميعها فى الشدة والضيق والالام باشكالها يعظم انتصارنا بك وحدك يارب لانك احببتنا .
نشكرك على الغفران اللى بتعطيه لينا مجانا مش بنستاهله نشكرك على حب بلا حدود وصبر كمان بلا حدود استحملتنا كتيريارب ولسه بتستحملنا كتير .
كل انواع البلادة والعند والتذمر والشك والخوف والقلق وعدم الايمان وعدم محبتنا لبعض , مستحمل منا صلوات فاترة مستحمل منا تكاسل فى كل طلب وكسر لوصاياك اتركها هذه السنة ايضا يارب لا تأخذنا فى نصف ايامنا ادينا زمان توبة يارب .
بقى كل يوم فى العمر دين علينا ليك يارب بعد ما شفنا الموت بيقرب اوى .
ساعدنا كل يوم نقدمهولك من الصبح لحد الليل ننتظرك نملاه حب نملاه نملاه صلاة نملاه خير نملاه تعب , ساعدنا يارب نعيش ليك ونبطل نعيش للدنيا ولنفسينا .
سامحنا يارب على خطايا بلا عدد انت اللى عارفها اكتر مننا انت شايف جوه وبره .
ان حصرنا خطايانا هى اقل كتير من الحقيقة لكنها مش اكتر من رحمتك عشان رحمتك واسعة جدا قطرات المطر ورمل البحر بردو رحمتك اكتر .
سامحنا على خطايا الفكر والحواس والارادة سامحنا على عنينا كان المفروض نخلعها وايدينا كان المفروض نقطعها حاجات كتير كان المفروض نغيرها واحنا مش خايفين من الهلاك بس انت يارب خايف علينا من الهلاك .
ارحمنا يارب برحمتك وخلينا نتوب
تتأنى وتتأنى وتفتقدنا بكل الاشكال تطبط قد ما تطبطب وبعدين تشد قد ما تشد وفى كل ده لا تشاء ان يهلك احد , احسبنا يارب كلنا مع الابن الضال اللى رجع بيتك ما يستهلش يبقى خدام عندك لكن عشمانين يارب فى حضنك الابوى فى جريك علينا وانت بتحضنا وتقبلنا وتدخلنا بيتك تانى وتقولنا فرحتونا وفرحتوا السماء كلها .
افتح ابواب كنيستك يارب لكل التائبين اللى عرفوا كرامة كنيستك وبيتك , افتح لينا ابواب السماء يارب برحمتك عشان كل واحد فينا يجهز ويسافر على خير ويستقبلوه الحبايب اللى فى السماء , ارحمنا يارب برحمتك لان كثيرا ما امتلأنا هوانا وعار.
قوينا يارب على نفسنا قوينا يارب على دماغنا نعترف امامك ان ايماننا اضعف جدا مما تصورنا, احنا فين من الشهداء اللى بيدخلوا على الموت بفرح وفين يارب من الموج العالى اللى قابلوه اولادك طول حياتهم .
ثبت ايمانا يارب ثبت رجاءنا عليك ثبت عينينا على السماء , انزع مننا الفتور والزهق والكسل والنوم وكل يوم طلع غالى خلينا نلحق يارب ونسابق الوقت عشان نستعد .
اذكر يارب كل المتألمين كل الباكيين والحزانى كل المجربين بكل الاشكال كل اللى صعبان عليهم منك يارب طيب خاطرهم محدش يعرف يصالحهم غيرك ويعزيهم غيرك .
ارفع يارب عن العالم بصلوات كنيستك وقديسيك وانبياؤك وشهدائك ورسلك وقبلهم امنا العدراء ارفع عن العالم الموت والوباء والغلاء وسيف الاعداء وكل امر مخيف .
ارفع يارب عن العالم لان الناس تعبت واثقين ان حساباتك افضل من حساباتنا وافكارك اعلى كتير من افكارك لكن نترجى رحمتك ونقولك يارب اسرع واعنى .
نجنى اولادنا اللى بعدوا عنك رجعهم لحضنك ارسل فعلة قديسين لحصادك لان الحصاد كتير فى بلادنا والعالم كله .
اذكر يارب كل صرخة من كل جعان وعطشان من كل متألم ومريض مش لاقى حد جنبه لازم يلاقيك ويلاقى ملايكتك , فرح العالم يارب وخلى العالم يرجعلك بالشكر زى ما خلت عالمنا تصلحه من الخراب اللى فيه .
ارجع تانى وتحنن على جبلتك يارب وشد الناس شد ليك , املأنا بروحك المعزى واملأنا بثمر الروح حط فى قلبنا السلام الذى يفوق كل عقل خلينا فوق الدنيا كلها مركزين فيك وفرحانين بيك وواثقين فيك تمام الثقه انك تاخدنا يوم بيوم لغاية حضنك وابديتك .
يارب الناس مشتاقة تتناول وافتح بيتك لكل الناس عشان الكل يسجد قدام هيكلك لنقول بصوت واحد نسجد لجسدك المقدس ودمك الكريم .
اذكر يارب خلاصك فى كل الشعوب اذكر اللى سألونا نذكرهم قدامك يارب , بارك اكليل السنة بصلاحك من اجل فقراء عبك من اجل اليتيم والغريب والضيف والمريض والمعوق والمتألم بكل نوع اسمعنا وارحمنا اعطنا معونة من عندك يارب .
خلينا يارب نقدم توبة وتكون توبة حقيقة بداية سنة جديدة بداية حياة جديدة اجعلها يارب سنة التوبة ساعدنا ان نرضيك فيها سامحنا على كل اللى فات احنا عايزين نغلق كل الصفحات يارب اللى مليانه خطايا نغسلها ونقفلها بالتوبة وننسى اللى فات .
ساعدنا ان نرضيك فى كل عمل صالح يارب اذكر كل من طلب ان نذكرهم فى بداية سنة افتكر كل واحد يارب طلب مننا طلب من اجل بيته ومن اجل حياته وتوبته ساعدنا ان نخدمك بكل بر وطهارة ومحبة احنا ماليناش غيرك يارب تحنن علينا وارحمنا .
بشفاعة امنا القديسة العذراء مريم وشفاعة جميع مصاف قديسيك أمين .