اسكتش الغطاس

اسكتش عيد الغطاس 

الاسكتش مناسب لمراحل حضانة ممكن تعملوه فى الفصل او مدارس الاحد ويعرفوا قصة عيد الغطاس واسماء العيد من عيد الظهور الالهى وغيره .

 اهميه المعموديه

 ان يعرف الطفل ان الرب يسوع اعتمد ليعلمنا ان نعتمد .

التدريب : ان يتدرب الطفل على الفرح بانه ابن ربنا ويفرح بكل من نال المعموديه .

الايه : هذا هو ابنى الجبيب الذى به سررت متى 3 : 17

الترنيمه المقترحه :1234567 هما دول اسرار كنيستنا اللى بيهم احيا اول بيتين

(سر المعموديه والميرون )

اسكتش المعموديه

لازم كلنا نعرف اهمية عيد الغطاس واهمية سر المعمودية فى حياتنا .

ونلاحظ ان السيد المسيح اعتمد فى نهرالاردن وده اول حاجه عملها ربنا يسوع المسيح فى بداية خدمتة يكمل كل بر وربنا اعتمد بالتغطيس عشان نعرف اننا لما نتعمد بتكون المعمودية بالتغطيس وده او سر من اسرار الكنيسة السبعة  .

الشخصيات

1- السيد المسيح 2- يوحنا المعمدان 3- السمكه نيمو

4- اب كاهن 5- ام وطفلها للعماد ( عروسه لعبه ) 6- شخصين يعمدهم يوحنا

7- خادمه للمقدمه وتشجيع الاولاد لعمل الحركات مع السمكه نيمو

وسائل الايضاح 

: صوره للسماء سحاب السماء - حمامه بيضا

مجسم بيتلبس للسمكه - ملايه لبنى عليها صور سمك وكانه نهر الاردن هنعلقها

ملابس للشخصيات - لبس العماد للنونو

خادمه للمقدمه : ياترى مين فينا شاف نونو بيتعمد قبل كدا ؟؟؟؟

طب مين فيكو اتعمد ؟

طبعاااا كلنا اتعمدنا عشان نبقى مسيحين.

وابونا غطسنا فى الميه كام مره ؟ 3 مرات

طب ابونا بيرشمنا كام رشمه بزيت الميرون ؟

36 رشمه فى جسمى كله برافو عليكو

قولولى مين هنا بيعرف يعوم؟ طب مين عنده عوامه طب تيجو نعوم سوا ياله كله يقوم يقف البس عوامتك وياله نستعد عشان نعوم ( الاطفال مع الميسات يمثلوا انهم بيعوموا ) .

ياله ياله كله يعوم سد مناخيرك اغطس لتحت اغطس لتحت تش تش تش محدش يرش مياه عليا لا لا اوعوا ترشوا عليا كدا غرقتونى

هو محدش شاف سمكه كبيره بتعوم من هنا ----- ؟؟؟

دوروا دوروا معايا على السمكه نيمو صحبتى دوروا جنبوكوا كدا طيب يمكن تلاقوها -- ها لقيتو حاجه ؟؟ دوروا كدا تحت الديسك ولا حاجه هااا لقيته ؟

لا

طب تعالوا ننادى عليها سوا.

الاطفال والميسات : يانيمو يانيمو

اعلى اعلى عشان تسمع

يانيموووووووو

تدخل نيمو : هااااى اصحابى عارفين انا مين

انا السمكه نيمو أغطس اغطس أغطس --- وانط نطه وارجع تانى اعوم فى المياااااااااه

انا السمكه نيمو أغطس اغطس أغطس --- وانط نطه وارجع تانى اعوم فى المياااااااااه ( بنغمه ) .

عارفين اصحابى انا عايشه فى النهر دا من زمان خالص خالص والنهر دا يبقى بيتى واسمه نهر الاردن

وفى يوم وانا بلعب فى المياه مع اصحابى السمك وبعوم اعوم اعوم ياه اقفوا وكله يعوم معايا اعوم اعوم اعوم انا اصلى بحب العوم اوى واغطس اغطس اغطس وانط لفوق لفوق ياله كله ينط معايا ---- شفت من بعيد حاجه غريبه خالص ----- شفت :

(يوحنا يدخل ومعاه 2 بيتعمدوا بالدور )

ويقول : لازم كلوكوا تتوبوا لازم كلكوا تتعمدوا

اللى هيتعمدوا : نتوب ليه عايزين نعرف ليه لازم نتوب ؟

يوحنا : عشان تفرحوا قلب ربنا ونعيش معاه فى السما

وهو لازم نتعمد (اللى هيتعمدوا )

ايوه طبعا لازم نتعمد ----- يوحنا

مشهد تعميد يوحنا لشخصين

يوحنا هيقف قدام الملايه(النهر) ناحيه الاطفال هو واللى بيتعمدوا واول ما يعمد يفضل هو قدام الملايه واللى هيتعمد يتدخل ورا الملايه كانه هيغطس فى المياه ويكون فى طبق مياه الولاد متشفهوش ويحط يوحنا ايده على راس المتعمد وينزل وكانه غطس فى المياه ويبل وشه من طبق المياه كانه اتغطس .

نيمو هتكمل كلامها : اه دا مين اللى انا شايفاه من بعيد دا --- اه داا انا عارفاه انا عارفاه كويس

دخول شخصيه السيد المسيح

يدخل السيد المسيح ويكون لابس شال احمر فوق التونيه .

نيمو : اه دا حبيبى بابا يسوع جاى عندى هنا فى نهر الاردن.

يسوع يقف قدام يوحنا

يسوع : يايوحنااا

يوحنا : اه دا مش ممكن انت جاى هنا ليه ؟ انت جاى عندى انا انا مستهلش خالص

يسوع : انا جاى عشان تعمدنى يايوحنا .

يوحنا : انا --- انا اعمدك انت !!!! دا انت المفروض اللى تعمدنى تقوم تيجى عندى عشان انا اعمدك ...

يسوع :ايوه يايوحنا

خلاص يايسوع انا هعمدك .

يقلع بابا يسوع الشال اللى فوق التونيه -----

ويكون واقف ورا الملايه

نيمو : اه دا بابا يسوع نزل وغطس فى المياه ( يسوع يبل وشه مياه )

واول ما يقوم

( 2 ميس هتكون واقفه عند لوحه السماء هيفتحوا اللوحه بالخيط المحطوط فى اطرافها هتتفتح السماء

خادمه المقدمه : تاخد الحمامه اللى فى السماء هتشيلها وتحطها فوق راس يسوع المسيح وصوت يقول

" هذا هو ابنى الحبيب الذى به سررت " .

ويقوم بابا يسوع على راسه الحمامه .

نيمو : اه اللى انا شايفاه دا ---- اه اللى حصل دا شفتم حصل اه

السماء --- السماء انفتحت وطلع منها حمامه دى الروح القدس شفتوهاااا اصحابى .

وسمعتوا الصوت قال اه من السماء

" هذا هو ابنى الحبيب الذى به سررت " .

قال اه ------- ؟؟؟

ومدام بابا يسوع اتعمد واتغطس فى المياه يبقى اى نونو يتولد لازم يتعمد .

مشهد تعميد الكاهن لطفل

يدخل اب كاهن -ام - نونو - ترابيزه - فوطه - طبق ميه - ازازه زيت صغيره زيت الميرون

ابونا :احنا دلوقتى هنعمد النونو الحلو دا عشان يبقى مسيحى

يغطسه ابونا 3 مرات فى المياه

اعمدك ياجرجس باسم الاب ... والابن... والروح القدس... اله واحد امين .

ينشفه بسرعه ---- ودلوقتى هرشمه 36 رشمه فى كل حته فى جسمه بزيت الميرون

يلبسه لبس العماد

ميس تزغرط اثناء العماد

ابونا : جرجس خلاص ياولاد بقى مسيحى والناس كلها فرحانه ومبسوطه بيه وكمان السماء فرحانه بيه اوى .

احنا كلنا اتعمدنا زى بابا يسوع بالظبط واتغطسنا فى المياه وكلنا لازم نفرح ان بابا يسوع اتولد واتعمد عشانا  .

الاسكتش منقول لكل الخدام تحضير دروس مدارس الاحد ربنا يعوض كل من له تعب فى الخدمة ويعطيه اجرا سمائيا  .