اسكتش يليق ولا يليق الحشمة
الحلقة الثالثة اسكتش رحلة بنات
الحشمة
الشخصيات الرئيسية
( مارى - سميرة - مارسيل - مريم )
اهداف الاسكتش
تعريف البنات بما يليق و لا يليق من خلال اسكتش قصير يسرد قصة عن هدف معين ومن خلال الاسكتش تبدأ مرحلة جديدة لشرح هذا الموقف وما هو مردود الفعل الذى تراه كل بنت
الاسكتش مناسب لمراحل بنات ثانوى فأعلى للتوعية بما يحدث فى الواقع وفى اخر الاسكتش نقوم بعمل بعض الاسئلة عن الاسكتش وكل بنت تقول ما يليق بالاسكتش وتضع مكانها مكان الشخصية لترى هل هذا يليق او لا يليق .
بداية الاسكتش تقوم بعض البنات بتنظيم رحلة لاحد الاديرة وحوار مع بعض .
تدخل مارى لتنادى على سميرة لكى تأخذ اشتراك الرحلة .
مارى : يا سميرة يا سميرة فينك يا بنتى نايمة ولا ايه ؟
تدخل سميرة عليها ومعها لبس فى ايديها و تتحدث معها
سميرة : ايوه يا بنتى انا هنا موجودة بس كنت بظبط اللبس اللى هروح بيه الرحلة .
مارى : ايوه ياعم يا بختك ورينى كدا اشوف اللبس
سميرة : اتفرجى يا بنتى على جمال سميرة ولبسها عمرك ما هتشوفى الحاجات دى فى حياتك شكلك كدا من نظرتك اتخضيتى هههههههههههه .
مارى : اى يا بنتى اللبس العسل ده حلو اوى اوى جبتيه من فين بس كدا عايزه اشترى زيك كدا ولونه جميل بس مش اوفر شوية على رحلة زى دى ولا اى رأيك ؟
سميرة : يووه اوفر مين يا بنتى انتى مش عايشة فى البلد ولا ايه .
مارى : ايوه بس كدا كل الناس هتتفرج عليكى فى الشارع والطريق .
سميرة : وماله وانا مالى بغيرى خلى اللى يتفرج يتفرج هو الناس هتغمض يعنى .
مارى : بس لبس جميل بصراحة انتى شايفه انه عادى يعنى ؟
سميرة : ايوه يا بنتى ده انتى هتشوفى الشباب هتتهبل عليه فى الرحلة .
مارى : طيب اى رأيك نروح نشترى زيه ليا كدا عجبنى جدا .
سميرة : اومال ايه كل شوية تقولى اوفر اوفر وانتى عينك هتطلع عليه .
مارى : ايوه بس عجبنى عشان كدا هشترى واحد ايه رأيك ونبقى طقم واحد مع بعض .
سميرة : ايوه كدا خليكى بنت منفتحه زى ما بيقولوا كدا واصحى معايا
مارى : المهم تعالى نعدى على اصحابنا بالمرة دلوقت عشان نظبط معاهم الرحلة
سميرة : مين فيهم فى ناس كدا بصراحة انا بتقفل لما اسمع سيرتهم كدا .
مارى : يا بنتى اصحابنا مريم ومارسيل
سميرة : انتى بتقولى مريم يبقى خلاص الرحلة باظت الله ينور
مارى : بس بس بتقولى اى ياعم مالها مريم ما هى كل مرة بتروح معانا .
سميرة : ماشى مقولتش حاجه بس بنت متقفلة خالص وتقعد تدى فى مواعظ ولبسها بلدى خالص متعرفش قيمة اللبس خالص ده لو شافت اللبس ده تقعد تقول وتفنن فينا .
مارى : بس تعالى نروح نشترى لبس ده وبعدين نعدى عليها .
سميرة : انتى بسرعة كدا فلوسك جاهزة علطلول يا مارى .
مارى : مارى اكيد يا بنتى اومال همشى من غير فلوس .
سميرة : طيب قولى لمامتك او خليها تقول اى رايها فى اللبس قبل ما تشتريه .
مارى : ماما مش هيعجبها العجب ومش هتتكلم يعنى عادى هتمشى الدنيا .
سميرة : ماشى بس بردو بدل ما تزعق وتعمل هيصة على الفاضى .
مارى : ياعم متقلقيش خالص يلا بينا احنا هنبقى ملكات جمال باللبس ده .
سميرة : هنروح دلوقت يعنى علطول انتى مستعجلة عليه يعنى .
مارى : ايوه وهنعدى على مارسيل ومريم بعد ما نشتريه بالمره .
سميرة : يلا بينا طيب عشان مش نتأخر .
تخرج سميرة ومارى ليذهبوا يشتروا ملابس
تدخل مارسيل ومريم مع بعض لتجهيز الرحلة
مارسيل : بس الرحلة يا مريم هتبقى جميلة جدا مع بعض لينا زمان مخرجناش رحلة شباب مع بعض وكل الاولاد هتبقى معانا اكيد .
مريم : اهم حاجه يا مارسيل ناخد بركة المكان وبعدين نشوف هنعمل ايه تانى من فقرات ترفيهية ونتبسط بيها هناك كلنا .
مارسيل : بقولك يا مريم سؤال بس عادى احنا اخوات صح ؟
مريم : ايوه طبعا يا مارسيل اتفضلى .
مارسيل : انتى بتجيبى لبسك من فين اللى بتروحى بيه الرحلة ؟
مريم : يعنى هجيبه من الشارع من المحل طبعا اى السؤال الغريب ده .
مارسيل : لا بس بسأل يا مريم عادى يعنى .
مريم : قصدك لبسك مختلف شوية عننا يعنى صح كدا ؟
مارسيل : لا لا بس قصدى الجو والدنيا والشباب انتى مش عايزه الناس تشوف جمالك.
مريم : يا مارسيل هو اللبس اللى هيبين الجمال وانا بلبس عشان الشباب يعنى
مارسيل : لا بس لبسك طويل وبصراحة هو كويس بس بردو .
مريم : لا عادى انا متعودة على الملابس دى من زمان عادى دى حياتى .
مارسيل : اهى مارى وسميرة جايين دلوقت هنشوفهم عملوا ايه .
تدخل مارى و سميرة عليهم ومعهم ملابس فى ايديهم .
سميرة: ازيكم يا بنات جهزتوا نفسكم للرحلة .
مارسيل : اكيد يا سميرة اى ده كنتوا فين كدا ؟
سميرة : كنا بنشترى لبس عشان مارى
مارسيل : الله يا جمالوا على اللبس الشيك اوعى وشك جميل خالص .
مارى : اى رأيك يا بنت يا مارسيل ؟
مارسيل : بجد تحفة هيخليكم بنات ولا كدا اوعى وشك من الجمال .
مارى : البركة فى سميرة هى اللى ورتنى اللبس ده .
مارسيل: وانا بقول بردو الزوق ده يا ترى بتاع مين اكيد سميرة .
مارى : اى ما قولتيش رأيك يا مريم يعنى .
سميرة : لا اوعى تقولى اى يا مريم انتى هتحطمينا برأيك بصراحة .
مريم : متخفيش يا سميرة هقول رأى وخليها على الله .
مارسيل : لا بجد قولى يا مريم اى رأيك ده هيكون لبسنا فى الرحلة انا وسميرة .
مريم : انا مقولتش حاجه بس دى رحلة فيها اديرة ومكان مقدس وبردو الاماكن اللى هنروحها فيها شباب كتير والرحلة اساسا رحلة شباب وكله هيبص عليكم .
سميرة : مش قولتلك يا مارسيل هتحطمنا برأيها يا اختى مريم ده الموضة دلوقت ولازم نمشى معاها احنا مش بنعمل حاجه غلط اللى بيبص علينا ده كدا كدا بيبص من غير حاجه واحنا محترمين يعنى مش هنمشى كدا وخلاص .
مريم : طيب يا مارى وريتى لبسك لماما فى البيت ؟
مارى : لا بصراحة لسه بس عادى هتقول ايه يعنى ؟
مارسيل : بصراحة لبس تحفة وعايزه اشترى زيه بس انا مش معايا فلوس بردو وغير كدا لازم ماما تشوف الحاجه اللى هشتريها وانا لو معايا فلوس كنت هشترى بس يلا تتعوض .
مريم : بس انا مقولتش حاجه غلط انتى ممكن تسببى عثرة لحد وانتى مش واخدة بالك من اللبس ثانيا احنا رايحين اماكن مقدسة يعنى بردو هيبقى شكلك حلو لو اب من الكهنه قالى كلمة مش حلوه بس اللبس ده مينفعش طبعا هو لبس حلو بس لا يليق بنا احنا كمسيحين .
سميرة : مش قولتلك يا اخت مارى مريم دى بتاعت مواعظ .
مارى : هو بصراحة اللبس اللى اشتريته حلو وفى نفس الوقت اوفر شوية وانا بعد كلام مريم احترت مش عارفه هقول لماما واوريه ليها ولا ممكن تزعق .
سميرة : بقولك اى يا مارى مش من اولها وامال احنا اشترينا ليها اللبس طلعى من دماغك كلام مريم وخلينا فى الرحلة وجمال الرحلة .
مريم : اسمعى الكلام يا مريم وشوفى ماما ورأيها وقوليلها اى رأيك فى اللبس ده ؟
مارى : هفكر يا مريم وهشوف الدنيا .
مارسيل : يلا يا بنات بس نظبط شوية العاب للرحلة والفقرات فككم من حوارات اللبس وخلينا فى حاجه اهم بردو تانى .
ويخرج الجميع وينتهى الاسكتش .
اسئلة عن الاسكتش
1- هل ترى سميرة مقتنعة بالملابس اللى بتعملها ؟
2- ماذا ترى فى مارى عندما قررت تشترى ملابس مثل سميرة ؟
3- هل لو مارسيل معاها فلوس كانت هتشترى ملابس مثلهم ؟
4- انت شايفه مريم ازاى من ناحية الموضة ؟
5- هل مارى اقتنعت انها هتخلى مامتها تشوف اللبس ؟
6- هل شايفين ان مارى غلطت انها اشترت حاجه من وراء مامتها ؟
7- هل الملابس دى من وجهة نظرك ممكن تسبب عثرة لغيرها؟
8 - لو انتى مكان مارى هل هتشترى ملابس وبعدين تقولى لماما ولا قبل ما تشترى ؟
9 - لو انتى مكان مارسيل ومعاك فلوس هتعمل ايه ؟
10 - لو مكان سميرة هل اللبس ده يليق بأماكن رحلات واماكن مقدسة ؟