حوار مع الكرباج وتاج الشوك والمسمار والحربة
اسكتش عيد القيامة
تاليف خدام كنيسة السيدة العذراء مريم
اسيوط/منفلوط/العزية
الشخصيات ( كاترين - الكرباج –تاج الشوك – المسمار – الحربة )
بداية الاسكتش
( تدخل الشخصيات الاربعة علي الترتيب )
كاترين : انتوا مين وجايين ليه هنا ... وماال شكلكم حزين كدة ليه ؟
الكرباج : احنا جايين من زمن المسيح ...وجايين ندافع عن نفسنا ... كل الناس بتحكم علينا وبتقول ان احنا عذبنا المسيح ..وده كلام مش صحيح ..
كاترين : انا حاسة اني شوفتكم قبل كدة بس مش فاكرة فين ..ممكن اتعرف عليكم واحد واحد .
الكرباج : انا الكرباج اللي جلد ضهر المسيح
كاترين : انت الكرباج اللي جلد يسوع !!! ايوة انا عرفتك ..انت اللي ....(يقاطعها في الكلام )
الكرباج : استني متحكميش عليا ... كل اللي حصل ده كان غصب عني ومكنتش اقدر اعمل حاجة .. انا عاوز ادافع عن نفسي ..وده من حقي
كاترين انت لسة ليك عين تتكلم بعدكل اللي عملته ..دا انت خليت يسوع يصرخ باعلي صوته ويقول ..آه .. انت اللي جلدته وجرحت ضهره بكل قسوة ومن غير رحمة ...خليته ينزفة من كل مكان في جسمه ... وفي الاخر بتقول غصب عني ..
الكرباج : طب خليني اوضح الحكاية من الاول وبعد كدة ابقي احكمي عليا .
كاترين : ايه هي الحكاية ...وعاوز تقول ايه اتكلم .
الكرباج : في يوم من الايام كانت اورشليم هادية جدا .. وفجاة ..سمعت صوت زي صوت الحرب ...وشفت جنود كتير اوي اوي وناس كتير بتجري ...انا الاول معرفتش فيه ايه ..بس بعد شوية لقيت الجنود ماسكين واحد (يسوع ) ومقيدينة بسلاسل كتير زي مايكون مجرم قتل حد .. بس الغريب ان روؤساء الكهنة كانوا موجودين ...وكانوا بيقولوا لبعضهم ...لازم يموت ...لازم يموت ...
كاترين : عارف يا كرباج اللي كانوا ماسكينه ده يبقي يسوع ...كمل .. بعد كدة ايه اللي حصل يا كرباج ..شوفت ايه كمان .
الكرباج : شوفت الملك بيلاطس وكان بيسال يسوع ..ويقوله .. انت ملك اليهود ولا لا ؟؟؟ بس يسوع كان ساكت خالص ومش بيتكلم .... وراح بيلاطس قال لرؤوساء الكهنة ...انا مش لاقي أي عيب في يسوع يستحق كل اللي انتوا عاملينه ده ويستحق اني احكم عليه ...انا هاسيبه يمشي لانه معملش خطية تستحق العقاب ... راحوا روؤساء الكهنة صرخوا باعلي صوتهم.. انت مش بتحب قيصر ولو بتحب قيصر احكم عليه ..وهيجوا الشعب كله علي بيلاطس وقالوله لو محكمتش عليه هانشتكيك لقيصر ... بيلاطس خاف منهم جدا وراح جاب واحد مجرم اسمه باراباس ...وقالهم انتوا عايزين اسيبلكم مين فيهم ...باراباس المجرم ولا يسوع اللي بتقوله عليه ملك ..راح رئيس الكهنة قال بسرعة اطلق سراح باراباس وكل الشغب كان بيقول اطلق باراباس ..اطلق باراباس ...
فخاف الملك منهم وامر الجنود انهم يطلقوا باراباس
...وبعد ماسابوا باراباس قالهم بيلاطس ...طب يسوع عايزين اعمل فيه ايه ..؟؟؟ وكان ردهم غريب اوي .. ضرخ رئيس الكهنة وكل الشعب وقالو ..اصلبه ..اصلبه .. اصلبه.. .. قالهم بيلاطس لا انا مش هصلبه ... انا هاجلده وبعد كدة هاطلق سراحة واسيبه يمشي.... وامر الجنود بانهم ياخدوا يسوع ويجلدوه ...وفعلا اخدوا يسوع في مكان واسع اوي وكان المكان ده مليان جنود وناس بتصرخ اصلبه ..اصلبه ..وخدوا يسوع وربطوا يسوع من ايديه بسلاسل ... وجه الجنود وخادوني غصب عني وانا بصرخ وبقول باعلي صوته انا مش ممكن اجرح يسوع ... مش ممكن اجرح يسوع ... بس مقدرتش اعمل حاجة ...كانوا اقوي مني ..وابتدوا يجلدوا بي ضهر يسوع ..وانا ببكي من الالم اللي بسببه ليسوع ..
كاترين : يااااه ..لقساوة قلوبهم ..مع انه بري حكموا عليه بالجلد ..بس فاكر يا كرباج كم جلدة جلدت بيها يسوع ...
الكرباج : اه فاكر .. انا مش ممكن انسي ابدا .. جلدوا بي يسوع 40 جلدة وفي كل جلدة كان بيصرخ من الالم .
كاترين : 40 جلدة يااااااه .... كتير اوي ...دا تلاقي جسم يسوع كله بينزف دم ... طب ممكن تقولنا يا كرباج ايه اللي شوفته كمان وايه اللي حصل بعد كدة.
الكرباج : انا معرفش ايه اللي حصل بعد كدة..لان انا مهمتي كانت خلاص خلصت معاهم .. بس اقدر اقولك ان تاج الشوك هو اللي يقدر يعرفك ايه اللي حصل .
كاترين : تاج الشوك اللي انغرس في جبين ملك الملوك !!!
تاج الشوك : استني متحكميش عليا انا كمان .. اسمحيلي ادافع عن نفسي انا كمان ..وبلاش تسيئي الظم بي ..وياريت تصبري عليا وانا هاقولك اصل الحكاية من اول ماكنت ..وانت تحكم في النهاية .
كاترين : هاتقول ايه بعد اللي عملته ..دانت .. زودت جراح المسيح وخليته يصرخ من الالام .
تاج الشوك : في يوم شوفت جنود كتير .. وكانت ايديهم مليانه دم ..وناس كتير بتصرخ وبتقول حرام اللي حصل .. وناس تانية كانت فرحانة وبتقول ..اصلبه ..اصلبه.. وجه جندي قرب مني وخدني من مكاني ووداني مكان كله جنود .. وشوفت الارض كانت مليانه بالدم ..وفجاة ...سمعت صوت الجنود بيقولوا ..هاتوه ...هاتوه هنا... وجابوا يسوع ... كان جسمه كلة بينزف دم ..زي مايكون كدة كانوا جلدينه قبل مايجيبوه ...وكان بيتالم اوي من جروحة الكتيرة ... وفي جندي من الجنود سال الجندي اللي كان جايبني وماسكني بايديه وقاله ايه ده ؟؟؟انت جايب الشوك الكتير ده ليه ؟؟ فرد عليه وقاله ... ده شوك وانا عملت منه تاج علشان محطة علي راس يسوع ملك اليهود ... فصرخت باعلي صوتي ...سيبني ...سيبني .. انا مش ممكن اجرحه تاني ..مش ممكن اجرح يسوع ملك الملوك ..وحاولت اهرب منه ... بس الجندي كان ماسكني بايديه الاتنين ومقدرتش اهرب منه ...كاترين : وايه كمان حصل منهم ...قول يا تاج الشوك .
تاج الشوك : خدني الجندي وبكل قوي حطني علي راس يسوع ...ويسوع بيصرخ من لالام الشوك ..والجنود بيضحكوا كلهم ..ويستهزؤا بيه ..ويسجدوا قدامه ويقولوله السلام لملك اليهود ...السلام لملك اليهود ..وكانوا بيضربوه علي راسة بعصاية ... وخلوني انغرس في جبينه غصب عني .وبعد كدة جابو الجنود قماشة كبيرة وحطوها علي جسم يسوع واتريئوا عليه كتير ... وفي وسط كل ده بصيت بعيد وانا ببكي ... شوفت العدرا وهي بتبكي بدموع عينيها ...وتمسح دم يسوع من علي الارض .. وبعد شوية مش كتير ... جه الجنود وخدوا يسوع تاني وودوه لبيلاطس الملك وكان روؤساء الكهنة موجودين وكل شعب اورشيلم ...ولما جابوا يسوع عند بيلاطس و....بيلاطس شاف جسم يسوع اللي كله جروح وبينزف ..اتعجب اوي ...وقال ازاي انت اتحملت كل الالامات دي .. وبص لرؤوساء الكهنة وللشعب وقالهم ..بصوا ...شوفوا يسوع جسمه كلة متقطع ومليان جروح وبينزف دم .. انا هاسيبة يمسي كفايه عليه كل الجراحات دي .... راح رئيس الكهنة صرخ بصوت عالي وقال لبيلاطس ..اصلبه ..وكل الشعب قالوا اصلبه ..اصلبه ... . قالهم بيلاطس انتوا عاوزيني اصلب ملككم ... راح الكهنة قالوا احنا ملناش ملك غير قيصر ...ولما بيلاطس لقي روؤساء الكهنة مصريين انهم يصلبوا يسوع ... جاب ميه وغسل ايديه وقال "انا بري من دم هذا البار " رد روؤساء الكهنة وقالوا "دمه علينا وعلي اولادنا " ... والشعب كله كان بيقول ..اصلبه.. اصلبه .. ومفيش في قلوبهم رحمة .. ولما بيلاطش ملقيش فيهم فايدة ...وخاف منهم ...سلمهم يسوع علشان يصلبوه ...
كاترين : كمل يا تاج الشوك قول كل اللي شوفته . في طريق الجلجثة ويسوع رايح يتصلب .
تاج الشوك : جاب الجنود صليب كبير اوي ..وخلو يسوع يشيلة ..ويسوع شايل الصليب كلن الجنود بيضربوه والناس بيشتموه .. ومن كتر التعب وقع يسوع علي الارض والصليب وقع عليه ... ومقدرش يشيل الصليب تاني .. ف راح الجنود جابوا واحد اسمه سمعان علشان يشيل الصليب مكان يسوع ... وطول الطريق كان يسوع بينزف دم وبيصرخ من الالم ..ولما وصلنا مكان الصلب وقع يسوع تاني علي الارض ... وجات العدرا تصرخ وتبكي علي ابنها يسوع ..بس الجنودة بعدوها عنه ...
كاترين : كفايا يا تاج الشوك ...كفايا كدة .. مش عاوزة اسمع اكتر من كدة ..
المسمار : لا..لا..لازم تسمعي وتعرفي انا احنا ملناش ذنب ..والذنب ذنب رؤوساء الكهنة والشعب
كاترين : انت مين وعاوز تقول ايه تاني .؟
المسمار : انا ... انا المسمار.
كاترين : انت .. انت المسمار اللي جرحت يسوع 4 مرات ..في ايدبه اتنين وفي رجليه اتنين ..وياما ..ياما سمعت صرااخ واهات يسوع ..وبرضه كنت قاسي عليه .
المسمار: انا يمكن قسيت عليه ..بس صدقني غصب عني انا كمان .
كاترين : غصب عنك ازاي ...انت خاين خنت العشرة معاه ... نسيت... نسيت لما كان نجار وكنت بتشتغل معاه .
المسمار : انا مش ناسي بس اديني فرصه اوضح الحكاية ...من اول دقة مسمار وانت تحكم عليا في النهاية ... كانت زحمة كتير حوالي وناس كتير هنالك ..شفت حبال وصليب علي الارض ..كان معايا كير من المسامير..بس كنا مش عارفين ايه اللي بيحصل وايه اللي هيصير ...سالت الناس اللي عند الصليب ايه الحكاية ..بس مافيش حد رد عليا ..علشان الكل كان مشغول ... وبصيت بعيد ولقيت العدرا هناك بتبقي ودموعها بتسيل وكان معاها يوحنا الحبيب وهو كمان الحزن كان باين عليه ...وفجاة خدني جندي روماني وكان في ايده التانية شاكوش كبير ...ولما شوفت مين اللي هدق في ايديه ... صرخت صرخة قوية من جوايا ..والعدرا بتصرخ سيبوا ابني ضنايا .. بس محدش سمعني ولا سمع بكايا .. وخدوني غصب عني ودقوني في ايدين ورجلين يسوع ...وبعد مادقوني وصليبوا يسوع ..رفعوه علي الصليب والدم من حواليا بيسيل .. ومكنش في حاجة بايديا ... مكنش في حاجة بايديا اعملها وخفف عنه الالام الصليب ..
كاترين : عندك حق يا مسمار ... ( تنظر للحربة ) انتي مين وانا شوفتك في قبل كدة ...انا اكيد اعرفك
الحربة : انا اللي بيها اطعن جنب يسوع
كاترين : فعلا !!! انتي الحربة اللي طعنتي جنب يسوع ....يااااااه.. انتي معندكيش قلب ...قلبك زي الحجر ..ازاي تجرحي جنب يسوع ..ازاي .. ازاي تزيدي المه ..مش كفايا الكرباج وتاج الشوك والمسامير ... ازاي مرحمتيش يسوع .
الحربة : لا ...استني ..انا قلبي مش قاسي زي ما الناس فاكرة ..لا.. ولا قلبي زي الحجر ..
كل الحكاية ان انا برضة مظلومة زيهم ..كل حاجة حصلت معايا كانت غصب عني
كاترين : غصب عنك ازاي ..قوليلنا ايه هي حكايتك ..يمكن تطلعي مظلومة زيهم .
الحربة : في اليوم ده لما جابوا يسوع وصلبوه .. كنت في ايد الجندي الروماني وشفت كل حاجة.. شفت ازاي كلنوا بيعذبوه وكانوا بيهنوه ...
قولي يا حربة حكايتك ... متخفيش .
الحربة : شفت جنود كتير ومعاهم يسوع وفوق راسة تاج من شوك ..وشفت مسامير مدقوقة في ايديه ورجليه ..وشفته وهو معلق علي الصليب وكان بيصرخ من الامه وجراحة ..بس الغريب في كل ده ان يسوع ..زغم انهم جلدوه وصلبوه ..سامحهم كلهم ..وكان بيقول " يا ابتاه اغفر لهم لانهم لا يعلمون ماذا يفعلون " وكمان كان في اتنين تانيين مصلوبين معاه .واحد علي يمينه وواحد عن شماله ..وكان رؤوساء الكهنة موجودين هناك .. وكانوا بيقولوله "لوكنت ابن الله خلص نفسك وانزل من علي الصليب علشان نؤمن بك "..وناس تانيين كانوا بيقولوا ليسوع "اه يا ناقض الهيكل وبانيه في 3 ايام .
كاترين : وايه كمان شوفتيه يا حربة قوليلنا عليه .
الحربة : جه الجنود وخدوا اللبس اللي كان يسوع لابسه وعملوا عليه قرعة وواحد منهم كسبة وخدوا ..وبعد شوية يسوع نادي علي الجنود وقالهم " انا عطشان " ف راح الجندي اخد اسفنجة وملاها خل وحطها علي راسي واداها ليسوع علشان يشرب ..بس يسوع رفض يشربها .. وكتبوا لوحة وعلقوها فوق الصليب مكتوب فيها "هذا هو ملك اليهود...وبعد كدة .. كان يسوع بيصلي ويقول .."الهي الهي لماذا تركتني ".. وكمان قال "قد اكمل " وفجاة صرخ يسوع بصوت عظيم وقال " ياابتاه في ايديك استودع روحي " ونكس راسه وسلم الروح ...ولما يسوع اسلم الروح ابتدات الشمس تظلم .. وحصلت زلازل وكل الصخور اتشققك .. وجه جندي روماني وفي ايديه شاكوش كبير كسر بيه رجلين الاتنين اللي مصلوبين مع يسوع ..ولما جه عند يسوع علشان يكسر رجليه ..لقيه خلاص مات .. فقال للجندي التاني اللي معاه .. يسوع خلاص مات .. مش هكسر رجليه..فقاله خد الحربة واتاكد انه مات ..فخدني وطعن جنب يسوع وبعد الطعنه خرج من جنب يسوع" دم وماء" واتاكد انه خلاص مات .. عرفي الحكاية كلها وان احنا كلنا مظلومين ..
كاترين : اه عرفت .. ... شكرا ليكم ..شكرا يا كرباج ..شكرايا تاج الشوك .. شكرا يا مسمار ..شكرا يا حربة .. انكم وضحتوا للناس انكم ملكمش ذنب في اللي حصل ..شكرا ليكم كلكم .