اسكتش القيامة ( يوسف وجدو )
اهداف الاسكتش
1- معرفة قصة قيامة الرب يسوع .
2 - الخدمة بدون مقابل ومحبة العطاء .
بداية الاسكتش
يفتح الستار على طفل اسمه يوسف
يوسف : هاهاهاها انهارده العيد وانا فرحان قوي . هاخرج واتفسح وانبسط . يا ترى مين قدي انهارده تعرفوا يا اصحابي انا بافكر اني استفيد بكل فلوس العيدية انهارده واصرفها كلها . يلا ماهو انهارده العيدجدو: يوسف يوسف يا ابني
يوسف : نعم با جدو
جدو : صباح الخير يا حبيبي كل سنة وانت طيب . اخرستوس انيستي
يوسف : وحضرتك طيب بس يعني ايه استوس اسيستي دي
جدو: هاهاها يا يوسف اخرستوس انيستي يعني المسيح قام والمفروض انك ترد وتقول اليسوس انيستي يعني حقا قام يلا قول بقى
يوسف: الي .. الي ايه يا جدو
جدو : اليسوس انيستي
يوسف: اليسوس انيستي .حقا قام
جدو: برافو شوف يا يوسف يا حبيبي انا رجلي تعبانه خالص ممكن يا حبيبي تنزل تشتري لجدو حبيبك شوية طلبات من عند البقال اللي جنبنا
يوسف: ممكن قوي .. بس يا جدو ايدك على الفلوس
جدو: خد يا حبيبي .ادي الفلوس وادي ورقة الطلبات
يوسف : لا لا ايه ده دول يا دوب على قد الطلبات فين بقى الفلوس بتاعتي .. مش انا هاجيبلك طلباتك يبقى تديني فلوس مقابل المشوار ده
جدو : هو يا حبييبي علشان تجيب لجدو حاجات لازم تاخد قصادها فلوس .. لا لا يايوسف يا حبيبي انت عارف ان بابا يسوع جه على الأرض وفدانا على عود الصليب .يا ترى ده كان ليه مقابل
يوسف : يعني ايه الكلام ده ؟!
جدو :هو انت ماتعرفش ان احنا كان علينا حكم الموت بس بابا يسوع من محبته لينا جه واخد الحكم بدالي وبدالك لأنه بيحبني وبيحبك وبيحب كل الناس كل ده ومن غير مقابل
يوسف: تعرف يا جدو انا سمعت الكلام ده يوم الجمعة العظيمة من ابونا .. والحقيقة انا شفت بابا يسوع وهو على الصليب وكان صعبان على خالص . لكن قولي يا جدو هو بعد ما نزلوه من على الصليب يا ترى ايه اللي حصل
جدو: تعالى يا يوسف نقعد مع بعض وأحكيلك ايه اللي حصل .. بعد ما نزلوه جه واحد اسمه يوسف الرامي
يوسف : ايه ده دا اسمه على اسمي
جدو: ده صحيح وبعد كده طلب من بيلاطس الوالي انه يدفن يسوع في قبره الجديد .. ووافق بيلاطس لكن اليهود كانوا قلقانين قوي
يوسف : طب ليه مش هما صلبوا يسوع قلقانين ليه بقى
جدو : قلقانين لأنهم سمعوا ان يسوع هايقوم وهو قال انه هايقوم في اليوم التالت وطبعا ماكنوش مصدقين فراحوا لبيلاطس وطلبوا طلب غريب قوي
يوسف: طلبوا ايه؟؟!!
جدو : طيب ماتيجي نشوف طلبوا ايه
( مشهد بيلاطس مع رؤساء الكهنة )
ج1: مولاي الملك بيلاطس ... رئيس الكهنة وواحد من الفريسيين عاوزين يقابلوك يا مولايبيلاطس : خليهم يدخلوا
رئيس الكهنة مع الفريسي: السلام لمولاي
بيلاطس: سلام ايه خير . انتم مش صلبتم يسوع عاوزين ايه تاني ؟
رئيس الكهنة: بس يا مولاي
بيلاطس : بس ايه .. ده انا عرفت انه مات بسرعة وان يوسف الرامي جه واخد الجسد علشان يكفنه ويدفنه في القبر الجديد بتاعه
الفريسي : ده صحيح بس !!
بيلاطس : بس ايه ما تتكلموا فيه ايه
رئيس الكهنة: يا مولاي احنا افتكرنا انه كان بيقول وهو حي انه هايقوم بعد 3 ايام من موته
بيلاطس : هو قال كده ؟
الأثنين : نعم يا مولاي
بيلاطس : هو ده معقول برضه
الفريسي: مش بس كده يا مولاي ده ممكن التلاميذ بتوعه يجوا باليل ويسرقوا الجسد
رئيس الكهنة: ويقولوا للشعب انه قام من الأموات
بيلاطس يفكر : ده ممكن يحصل فعلا .. طيب وايه المطلوب دلوقتي ؟
رئيس الكهنة: ممكن مولاي يأمر جنوده بأنهم يحرسوا القبر ال3 ايم اللي جايين دول ونشوف بقى تلاميذه هايعملوا ايه
بيلاطس: خلاص خلاص يا حراس يا جنود : امرت انا الوالي بيلاطس بوضع اثنين من الجنود على قبريسوع المصلوب لمدة 3 ايام مع وضع حجر كبير على باب القبر
يوسف: معقول يا جدو جنود على قبر واحد ميت .. طب ليه ؟
جدو : ماهما كانوا متوقعين ان التلاميذ ييجوا ويسرقوا الجسد
يوسف: بس التلاميذ كانوا خايفين وقافلين كل الببان يحسن ييجوا اليهود ويصلبوهم
جدو: ده كلام صحيح بس اليهود كانوا برضه قلقانين
يوسف: طيب وبعدين يا جدو الجنود عند القبر عملوا ايه ؟
جدو: بيلاطس حط جنود على القبر وبعدين .
الشخصيات: 2 من الحراس – 4 من عرائس ماريونت
( تفتح الستار على 2 من الجنود بالماسكات ويدور الحوار الأتي )
ح1: إيه مالك خايف ليه ؟ المفروض انك جندي في جيش الوالي بيلاطس وانك مش بتخاف ابداح2: لا اصل حصلت حاجة غريبة جدا !
ح1: حاجة غريبة ! إيه خير انت قلقتني .. اتكلم
ح2: اصل ..اصل.. هو انت . أقصد احنا لوحدينا ؟
ح1: ايوة يا سيدي لوحدينا .. اتكلم بقى
ح2: اصل ..اصل .. طب هو فيه حد شايفنا ؟ !
ح1: يوه .. مافيش حد شايفنا. يالا بقى قول فيه إيه ؟
ح2: اصل .. اصل
ح1: وبعدين معاك . . اصل .اصل . يا اخي جننتني . انت هاتقول ولا اسيبك وامشي .
ح2: لا لا خلاص هاقول . هاقول
ح1: ها قول ياسيدي
ح2: اصل .اصل . (ويمسكه ح1 وكأنه هايضربه) خلاص اصل بيقولوا ان يسوع قام
ح1 : قام ! يسوع قام , قام ازاي يعني . هو فيه حد بيقوم من الموت
ح2: ما هو ده اللي هايجنني . ازاي واحد يقوم من الموت
ح1: الكلام ده غريب قوي . وبعدين تعالى هنا . مش انت كنت بتحرس القبر الي كان فيه يسوع .. هو ايه بقى اللي حصل ؟
ح2: اه . . اللي حصل . اللي حصل .
ح1: لا بقولك إيه . ركز معايا كده وقولي ايه اللي حصل ؟
ح2: هو احنا كنا بنحرس القبر .
ح1: دي قديمة ما انا عارف . انكم كنتم بتحرسوا القبر ولو ان الموضوع ده غريب شوية .. ازاي تحرسوا قبر واحد ميت .
ح2: ماهو اليهود كانوا خايفين ياحسن التلاميذ ييجوا باليل ويسرقوا الجسد ويقولوا انه قام من بين الأموات .
ح1: معقول الكلام ده . اه . استنى استنى ده انا سمعت انه كان بيقول انه بعد مايموت ب3 ايام هايقوم . بس غريبة شوية مش كده
ح2: ماهو عشان كده اليهود راحوا للوالي بيلاطس وطلبوا منه جنود لحراسة القبر ياحسن التلاميذ يسرقوا الجسد ويقولوا انه قام من الأموات
ح1: ها . وحرستوا القبر وبعدين ايه اللي حصل
ح2: احنا كنا بنحرس القبر ,بعدين ..
( تفتح ستار مسرح العرائس ) (مشهد القبر و2 من الحرس )
( اغنية يغنيها الجنود تكون كومدية )
ج2: اخيرا اخيرا مات ملك اليهودج3: ما تقولش ملك اليهود قول انه قال اناهو ملك اليهود هاهاها
ج2: وقال ايه يقوم في ثالث يوم
ج3: خلينا نشوف حايقوم المسيح ملك اليهود ولا لأ !
ج2: ده اكيد كان بيضحك على الناس
ج3: السلام ليك يا ملك اليهود جاوب لو قدرت
ج2: يقوم من بين الأموات ده قوم ناس كتير هو ما يقدرش يقوم نفسه!
ج3: انت فاكر لما رئيس الكهنة سأله هو انت المسيح ابن الله انت فاكر رد وقال ايه؟!
ج2: قال : انا هو وهاتشوفوا ابن الأنسان جالسا عن يمين القوة وجاي على سحابة من السما .هاهاهاها
ج3: يالا خليه يقوم ملك اسرائيل من الموت خلينا نشوف ونأمن !
ج2: طب يالا بينا نروح للقبر ونحرسه يحسن التلاميذ ييجوا باليل ويسرقوا الجسد ويقولوا انه قام من الأموات
( صوت اخرستوس انيستي )
ج3: الله الله ايه ده ايه النور ده
ج2: ده باينله زلزال ايه ده الحجر بيتدحرج
ج3: مش ممكن شايف مين اللي طالع من القبر مش معقول ده يسوع يسوع قام من بين الأموات
ج2: انا مش مصدق نفسي مش مصدق عيني
ج3: يالا بينا نجري انا خايف قوي
ج2: يالا ياعم ده الجري نص الجدعنة
(ويجروا ) وتقفل الستار......
( يرجع مشهد ال2 الحراس الكبار )
ح1: يعني عايز تقولي انه فعلا قام .. يسوع قام من بين اللأموات
ح2: لأ . انا ماقولتش كده
ح1: الله . مش انت شفت كده
ح2: اه انا شفت .. أقصد ما شفتش
ح1: وبعدين معاك انت حيرتني
ح2: اصل .. اصل ..
ح1: بلاش كلمة اصل دي .. شوفلك كلمة تانية
ح2: اصل اليهود .. اقصد الشيوخ . شيوخ اليهود لما رحنالهم قالوا اوعوا تقولوا انه قام
ح1: امال تقولوا ايه يعني ؟
ح2: نقول ان التلاميذ جم بالليل وسرقوا الجسد من القبر وادونا فلوس كثير علشان ما نقولش الحقيقة
ح1: يعني تنكروا اللي شفتوه .. طب وهي الناس هاتصدق الكلام ده
ح2: طبعا لازم يصدقوا . مش التلاميذ ممكن يعملوا كده
ح1: يا ذكي .. ازاي التلاميذ ييجوا يسرقوا الجسد وانتم الحراس كنتوا فين
ح2: هانقول . كنا نايمين . اه نايمين
ح1: نايمين هو فيه جندي ينام ليلة حراسته
ح2: وفيها ايه تعبنا ونمنا .
ح1: ولما انتوا كنتوا نايمين . عايز تفهمني ان التلاميذ جم ودحرجوا الحجر الكبير ده واخدوا الجسد ومشيوا بيه . كل ده وانتم نايمين . بصراحة ده كلام ما يدخلش العقل
ح2: ماهو بصراحة كده انا محتار . ومش عارف اعمل ايه . اقول اللي شفته ولا اسمع كلام اليهود . علشان كده انا خايف قوي
ح1: طب قولي . هو فيه حد غيركم شاف يسوع لما قام من الموت ؟!
ح2: هو احنا لما شفنا اللي حصل جرينا ووقفنا بعيد نشوف ونراقب القبر وبعدين شفنا .. شفنا
ح1: ها نرجع تاني . شفنا . شفنا .
ح2: ياعم استنى شوية . احنا شفنا واحدة من المريمات جاية الصبح بدري ومعاها حنوط . وبعدين . .
(مشهد مريم المجدلية ومريم اللأخرى مع يسوع ) (عرائس)
مريم ج: (بتبكي) يسوع حبيبي يسوع.. ازاي يصلبوك . انا مش عارفة ايه اللي عملته علشان يعملوا فيك كده
مريم: كفاية عياط يا مريم .. ده انت بقالك 3أيام لا بتاكلي ولا تشربي . كفايه يا حبيبتي
مريم ج: ازاي مش عايزاني اعيط . ده يسوع حبيبي ازاي يعملوا فيه كده وهو اللي شفى المرضى واخرج شياطين . لا انا لحد دلوقتي مش قادرة اصدق اللي حصل ده
( صوت كلاب )
مريم : اهو شفتي يا مريم مش قلتلك بلاش نطلع بدري قوي ولسة يدوب النور بيشقشق
مريم ج: كان لازم اجي واطيب جسد حبيبي يسوع . دي اقل حاجة ممكن اعملها
مريم : الله ايه النور اللي هناك ده
مريم ج: نور فين .. ياه ده نور منور القبر كله .. يا ترى فيه ايه .؟
مريم : مش عارفة . تعالي نشوف في ايه!!
الأثنين : يالا بينا . (ويقربوا من القبر )
مريم ج: الله .. ده القبر فاضي . امال راح فين جسد يسوع . راح فين ؟!
مريم : هدي نفسك علشان نعرف نفكر
مريم ج: اكيد اخدوا جسد يسوع أخدوا جسد يسوع (تبكي)
يسوع :مريم .. مريم
مريم ج: انت مين ؟ !
يسوع: بتبكي ليه يا مريم ؟
مريم ج: اخدوا جسد يسوع ومش عارفة حطوه فين .. هو انت الجانيني ؟ ! ارجوك لو انت تعرف هما ودوه فين ارجوك قولي .
يسوع: مريم
مريم ج: مين يسوع . ده صوت يسوع . حبيبي يسوع
يسوع : مريم روحي بسرعة لأخواتي التلاميذ وقوليلهم انك شوفتيني
مريم ج: حاضر يا رب حاضر . انا مش مصدقة نفسي . انا هاقول لكل الناس مش بس التلاميذ .. يسوع حي قام . قام من بين الأموات . يالا بينا يا مريم .. نفرح التلاميذ ونقولهم على اللي شفناه وسمعناه
مريم : يالا بينا . يا مريم يالا بينا
يوسف: الله ياجدو طبعا التلاميذ فرحوا لما عرفوا ان بابا يسوع قام بعد ما كانوا فاكرينه خلاص مات .. اكيد القيامه فرحتهم كلهم
جدو : طبعا يا يوسف ده مش بس كده ده ظهرلهم كذا مرة وقعد معاهم 40 يوم . شافوه وكلموه لحد ما صعد للسما
يوسف: انا فرحان قوي يا جدو !
جدو: ليه يا حبيبي؟
يوسف: علشان بابا يسوع جه على الأرض .. فداني وقام من بين ألأموات علشاني .. كل ده ومن غير مقابل انا لازم افرح انهارده وافرح كل اصحابي معايا واقولهم وانت كمان قول معايا يا جدو المسيح قام .. حقا قام
اخرستوس انيستي .. اليسوس انيستي ( ترنيمة 1, 2, 3)
منقول من جروب نصوص اسكتشات للخدمة الرب يعوض الجميع وكل من له تعب فى الخدمة اجرا سمائيا .