اسكتش عيد القيامة اتصال هاتفي مع سمعان القيرواني
اهداف الاسكتش
1- معرفة من هو سمعان القيروانى وما علاقته بالرب يسوع .
2- محبة الاخرين والصلاة من اجلهم .
3- قصة صلب المسيح والقيامة .
بداية الاسكتش
يدخل احد الخدام ليتحدث فى التليفون ويتكلم القديس من الداخل
الو يابني
• ازيك يا قديس
• اهلا يابني ازيك وازيكم كلكم.. اخرستوس انستي ........ المسيح قام
• احنا عاملين مفاجأة لأخواتنا هنا في الكنيسة وهما لحد دوقتي مايعرفوش مين اللي بيتكلم معانا عالتليفون .. ياريت حضرتك يا قديس تعرفنا بنفسك• حاضر يابني .. انا يا ولاد سمعان القيرواني. انا اللي شلت الصليب جنب يسوع المسيح . انا اللي هدومي كلها اتعاصت دم من دم السيد المسيح اللي كان مغرق كل حتة..
• طيب يابونا سمعان ممكن تحكيلنا انت اصلا منين
• انا من بلد اسمها قيروان والبلد دي موجودة في ليبيا . وسافرت لفلسطين عشان احضر عيد الفصح هناك
• طيب ايه حكايتك بأه مع السيد المسيح ؟
• انا كنت ماشي في شوارع اورشليم ساعتها وكان الصبح .. وبعدين سمعت ناس بتقول اقتلوه اصلبوه وكانت الدنيا زحمة جدا بس مكنتش شايف حاجة• وبعدين يابونا سمعان
• قلت اقرب شوية عشان اتفرج واشوف الشعب دا هايج علي مين وبيقول اقتلوه اقتلوه لمين . فجأة ظهر قدامي واحد شكله صعب اوي.. واحد كان متبهدل وهدومة كلها متقطعة وجسمه مليان دم ومتبهدل خالص وكان شايل الصليب وماشي بيتطوح بيه يمين وشمال .. وكان صعبان عليا اوي
• ياااااه وبعدين يابونا سمعان ؟؟؟
• وبعدين يابني مرة واحدة الراجل دا وقع علي الارض ومكنش قادر يشيل الصليب . فا واحد من الجنود راح وقال لقائد المئة . الحق لحسن شكله حايموت قبل ما تصلبووه .. اتصرف وخلي حد تاني يشيل الصليب مكانه .
• يعني السيد المسيح وقع علي الارض ومكنش قادر يشيل الصليب من التعب!!
• ايوة يابني كان تعبان جدا جدا . وبعدين مرة واحدة لقيت قائد المئة قدامي قالي تعالا ..شيييييييل الصليب دا مع يسوع الناصري.. انا علي فكرة كنت ممكن اهرب او أزق حد مكاني .بس يسوع الناصري دا صعب عليا جدا جدا وشيلت فعلا الصليب جنبه
• يابختك يا ابونا سمعان القيرواني مكتوبالك تشيل الصليب جنب السيد المسيح .. وياتري ماقلكش حاجة ونتا شايل الصليب معاه ؟
• كان ماشي جنبي بيتوجع من كتر الجلد والضرب .. وانا كمان كنت بتضرب من الشعب معاه . كان واحد بدل ما يجي يضربه يروح ضاربني انا .. وفضلت ماشي جنبه وشايل الصليب معاه وانا هدومي كلها متغرقة من دمه و هوا كان بيتألم جدا لحد ما وصلنا لجبل الجلجثة وهناك قالولي روح روح بيتكم خلاص مهمتك انتهت علي كدة ...
• طيب وبعدين لما روحت البيت عملت ايه بأه؟
• اول ما روحت البيت قالولي عيالي انت تعبان ليه كدة يا بابا قلتلهم انا شلت الصليب جنب يسوع الناصري . فا اتضايقو جدا جدا وصرخوا في وشي وقالولي اللي انت عملته دا عاار.. الصليب عاار يا بابا ازاي تعمل كدة .. بس انا كنت مقتنع جدا باللي عملته عشان يسوع دا كان صعبان عليا• طيب هل شفت السيد المسيح بعد كدة ؟
• طبعا .. السيد المسيح دا حنين جدا وطيب جدا .. جالي يوميها بليل في الحلم ونا نايم بس مكنش متعذب ومتبهدل زي ما شفته يوميها الضهر .. لالالالا . كان جايلي في شكل ملك عظيم ووشه زي الشمس وجالي وباسني وقالي بالحرف الواحد " طوباك يا سمعان لأن العار الذي حملته معي سيكون فخرا ابديا لك "
• طيب كتير من اصدقاء البرنامج دلوقتي مستغربين اني بناديك يا قديس سمعان القيرواني . ايه تعليقك علي الكلام دا يا ابونا .
• لالالالا انا فعلا يا ولاد استشهدت علي اسم السيد المسيح وأمنت بيه من بعد ما ظهرلي في الحلم وبيتي كان كنيسة كبيرة اوي واولادي بردو خدمو السيد المسيح .
• طيب يا ابونا سمعان القيرواني بنرحب بقداستك في برنامجنا وبنقولك كل سنة ونت طيب في عيد القايمة
• ونتو طيبين يا اولاد واخرستوس انستي ...... المسيح قام
منقول للجميع من جروبات الخدمة الرب يعوض كل من له تعب فى الخدمة .