اسكيتش عيد القيامة مات علشانى
اهداف الاسكتش
1- معرفة المخدوم لماذا مات الرب يسوع وقام من بين الاموات .
2 - احداث مشهورة من بداية خلق ادم حتى قيامة الرب يسوع .
3- ليه بنحتفل بعيد القيامة ؟
بداية الاسكتش
( في البداية يسمع صوت جرس الباب من خارج المسرح حيث الخادم يمر بطفل ليأخذه حفلة عيد القيامة )
( بعد جرس الباب يسمع صوت فتح الباب ويدور الحوار الاتى دون الظهور على المسرح أيضا )
فادى : أهلا أهلا ياستاذ مجدي ... كل سنه وحضرتك طيب ... أتفضل ادخل .ا/مجدي : لا ياحبيبى شكرا علشان منتاخرش على حفلة العيد ... وكويس انى لاقيتك لابس وجاهز ... يالا بينا .
فادى : اوكيه يالا بينا ....... ( ويسمع صوت غلق الباب ) .
( ويبدأ بينهم حوار أثناء طريقهم إلى الكنيسة )
فادى : أستاذ مجدي ...........
ا/مجدي : نعم يافادى ........
فادى : عايز اسأل سؤال.....؟؟؟
ا/مجدي : أتفضل يافادى .
فادى : يعنى إيه عيد القيامة ...؟؟؟
ا/مجدي : ما أنتا عارف يافادى ده العيد اللي بتحيفل فيه بقيامة المسيح .
فادى : ايوه .... ايوه ما أنا عارف ......... ( وهنا يظهران على المسرح ) أنا قصدي يعنى ليه قام السيد المسيح .....؟؟
ا/مجدي : ااااااااااه ده موضوع مهم أوى يافادى ... وكويس انك بتسال السؤال ده ... بس علشان تفهم الموضوع كويس
لازم تعرف وتفهم شوية حاجات الأول .... مستعد يافادى تعرف القصة من أولها ....؟؟؟؟
فادى : مستعد ياستاذ مجدي .
ا/مجدي : القصة بتبدا يافادى من آية " الله محبه " ..... ربنا زى ما أنتا وكلنا عارفين بيحبنا جدا جدا ..... عشان كده خلقنا ..
لان ربنا نفسه هو محبه وخلق الإنسان علشان نعيش معاه في حب ..... وجهز ربنا كل حاجه للإنسان علشان يعيش
مبسوط ومرتاح .... وخلاه هو سيد كل حاجه ومن ضم الحاجات الحلوة اللي ربنا عملها لأدم الشجر الجميل اللي
في الجنة وقال له " من جميع شجر الجنة تأكل آكلا وآما شجرة معرفة الخير والشر فلا تآكل منها لأنك يوم تأكل
منها موتا تموت " .
( وهنا يبدأ الخروج من المسرح يبدأ الخروج من المسرح ومجدى بيكمل كلامه )
ا/مجدي : وبعدها خلق ربنا حواء لأدم ..... وبقى ادم وحواء عايشين مع ربنا في سعادة وفرح ..... ولكن في يوم .....( هنا يفتح الستار على منظر الجنة وحواء بداخلها وفى وسط المسرح شجرة معرفة الخير والشر )
( مع وجود أصوات عصافير وتغريد )
حواء : كل الجنة دى وكل الجمال ده علشانى أنا وأدام .... يااااااااه ..... دى حاجات جميله أوى .
( وهى تنظر إلى أركان الجنة )
(هنا تدخل الحية ذات الأربع أرجل والذيل الطويل مع موسيقى تدل على الخطر تبدأ عاليه ثم تهدا )
الحية : ( وهى تلف حول حواء ) صحيح ربنا قالكم ماتكلوش من كل شجر الجنة ....؟؟؟حواء : لاء .... نأكل من كل شجر الجنة ماعدا الشجرة اللي في وسط الجنة اللي هناك دى .... ربنا قالنا ما تكلوش منها عشان
ما تمتوش .
الحية : (في خبث مع علو صوت الموسيقى قليلا ) مش هتموتوا ..... بس ربنا عارف أنكم يوم ما هتكلو منها هتبقو
زيه عارفين الخير والشر .
(تنظر حواء إلى الشجرة في إعجاب شديد وتقترب منها )
الحية : (تكرر كلامها بصوت عالي ) مش هتموتوا ..... مش هتموتوا بس ربنا عارف إنكم يوم ما تأكلوا منها هتكونوا
زيه عارفين الخير والشر ومش عايزكم تبقوا زيه .... كلى ياحوا ... كلى ياحوا .... كلى ياحوا .
( تقترب حواء أكثر من الشجرة في شهوه للأكل منها وتاخد وتأكل ويدخل عليها ادم مفزوع )
ادم : إيه ده ياحوا ... انتى اكلتى من الشجرة اللي ربنا قالنا ما نكلش منها .
حواء : دى جميله أوى ياادم وبعدين الحية قاليتلى .... قاليتلى إن لما نأكل منها هنبقى زى ربنا ... ما تخفش ياادم .. كل
كل ... ما أنا أكلت ومجرليش حاجه اهو .... كل ياادم .
الحية : ( في أذن ادم ) كل ياادم .. كل .. مش هتموتوا .... ربنا عارف إن يوم ما هتكلو منها هتبقوا زيه كل ياادم .
( يأخذ ادم الثمرة من يد حواء ويأكل )
( ثم يسمع صوت رياح شديدة ويجرى ادم وحواء ليختبئا وراء الشجرة واقفة في سرور )
( ويتكلم الرب إلى ادم وحواء )
الله : ادم ادم ......... أين أنت ؟؟؟؟
ادم : أنا ... أنا ... أنا هنا يارب سمعت صوتك في الجنة فاستخبيت أصل أنا .... أنا ..... أنا عريان .
الله : عرفت منين انك عريان ... هل أكلت من الشجرة التي وصيتك ألا تأكل منها ....؟؟؟
ادم : حواء .... حواء اللي أنتا جيبتهالى هي اللي اديتنى فأكلت .
الله : ما هذا الذي فعلتي .....؟؟؟؟
حواء : الحية .... الحية اغريتنى فخليتني أكل .
الله : الحية ... لأنك فعلتي هذا ملعونة انتى من بين ميع الحيوانات هتمشى على بطنك وتاكلى التراب طوال حياتك ( فتسقط
الحية على باطنها )وانتى ياحواء ... هيكون تعبك كبير جدا عند ولادة أولادك وأنتا ياادم علشان سمعت كلام حوا
ملعونة الأرض بسببك ... بالتعب تآكل منها كل أيام حياتك ودلوقتى ... ماينفعش تعيشوا في الجنة تانى .... بعد ما
افسد توا نفسكم بالخطية وبقيتوا عارفين الخير والشر .
( وهنا تدخل موسيقى خطر وحزن عاليه ويدخل ملاك ويأخذهم إلى خارج الجنة وهما يصرخان )
( ويقفل الستار )( يدخل أستاذ مجدي وفادى إلى المسرح وهما متأثران لما حدث )
فادى : ياخساره .... ادم وحواء خرجوا من الجنة الجميلة ..... بس في سؤال محيرنى ؟؟؟؟؟
ا/مجدي : إيه هو يافادى ....؟؟؟؟؟
فادى : مش ربنا قال لأدم ... "أما شجرة معرفة الخير والشر فلا تآكل منها لأنك يوم تآكل منها موتا تموت " ... طيب ليه ادم
وحوا مماتوش بعد ما أكلوا من الشجرة .
ا/مجدي : لاء ماتوا يافادى ... بس الموت اللي ربنا يقصده هنا هو مش موت الجسد ... إنما موت الروح ...يعنى انفصال الله
عن الإنسان يعنى الإنسان معدش عايش مع ربنا في الجنة زى الأول ... هو ده الموت اللي يقصده ربنا .
فادى : ااااااااااااه فهمت ... طيب دلوقتى ياترى اللي بيعمل خطيه هو كمان بينفصل عن ربنا ؟؟؟؟؟؟؟
ا/مجدي : طبعا يافادى ..... بس ربنا من حبه لينا عمل سر التوبة والاعتراف يعنى اللي يغلط ... لو تاب واعترف بخطيته
وأتناول ... يرجع تانى لربنا ومعدش يبقى بعيد عنه .
فادى : ياااااه ... طب الحمد الله إن عندنا أسرار الكنيسة اللي بتخلي ربنا يسامحنا وترجعنا ليه تانى .
ا/مجدي : طبعا يافادى .... المهم .... أكملك القصة ......
فادى : آه طبعا يااستاذ مجدي ..... إيه اللي حصل بعد كده لأدم وحواء ...؟؟؟؟؟؟
ا/مجدي : حصل يافادى زى ما ربنا قال بالضبط ... بدا ادم يتعب ويشتغل علشان يقدر يأكل ... ومعاه حواء وعاشوا في الأرض
وخلفوا أولاد وكانت طبعا حواء بتتعب جدا في الولادة زى ما ربنا قالها وكبر ادم وحواء وأولادهم كبروا وبدأت الحياة
على الأرض اللي إحنا عرفنها لغاية ما جه الوقت اللي ادم وحواء ماتوا فيه .
( وهنا يبدأن في الخروج من المسرح )
ا/مجدي : وللأسف بسبب خطيتهم وعدم سماعهم لكلمة ربنا كان لازم يبقى مكانهم ... الجحيم ... وفعلا مات ادم وحواء وراحواالجحيم وبقى اى حد يموت يروح الجحيم وده بسبب خطية ادم وماعدش للإنسان حياه مع ربنا .
فادى : طب وبعدين ... مش ربنا خلق ادم علشان يعيش معاه ... معقول ربنا هيسيب ادم يعيش بعيد عنه ...؟؟؟؟
ا/مجدي : لا طبعا يافادى ... ربنا نزل بنفسه علشان يحل المشكلة وساعتها كان ادم وحواء لسه في الجحيم ...
( وهنا يفتح الستار على منظر الجحيم حيث اللون الأسود والأصوات المخيفة )
( وموسيقى رعب وادم وحواء في حاله خوف ورعب وحزن )
ا/مجدي : وكانت الإحداث كلها في طريقها لأنها ترجع الإنسان لربنا علشان يعيش معاه وطبعا أنتا عارف إن المسيح بنفسه دفع
الثمن ...
( وهنا يعرض جزء من جلد المسيح والصلب والآلام على خلفية المسرح ويقف ادم وحواء ينظران وهما في الجحيم حتى تأتى لقطة موت المسيح )
( وعندها يدخل المسيح إلى المسرح ويأخذ ادم وحواء معه إلى الخارج وتهدا الموسيقى ويظل المسرح مفتوحا )
فادى : إيه ده ... مين ده ....؟؟؟؟؟؟؟ا/مجدي : ده المسيح يافادى ... بعد ما مات نزل إلى الجحيم علشان ياخد ادم يعيش معاه تانى .
فادى : يعنى موت المسيح ده كان العقاب اللي المفروض ادم ياخده ......؟؟؟
ا/مجدي : بالضبط يافادى ... صلب المسيح وموته كان نتيجة خطية ادم .
فادى : ياااااه .... أد كده ربنا بيحب ادم .
ا/مجدي : طبعا .
فادى : طيب ليه ادم ما اخدش هو عقاب خطيته وانصلب هو ومات ......؟؟؟
ا/مجدي : لان ادم لو كان هو اللي مات مكنش هيقدر يعمل حاجه بعد كده هيبقى الموت غلبه ... لكن كان لازم اللي يموت واحد
اقوي من الموت ومفيش غير المسيح هو اللي يقدر على الموت ... علشان كده في اليوم الثالث لموته ...
( وهنا يكتمل العرض على خلفية المسرح بقيامة المسيح مع موسيقى فرح وجزء من لحن يا كل الصفوف السمائيين )
ا/مجدي : قام .
فادى : قام .
ا/مجدي : قام ..... في اليوم الثالث عشان يقولنا متزعلوش وماتخفوش ماتفكروش أنى مت لاء ... إنا اقوي من الموت وغلبته
علشانكم علشان ترجعوا تعيشوا معايا تانى ... لانى بحبكم ... حب حتى الموت ... حب من غير حدود .
فادى : ياااااااااااااه على حبك يارب ... إنا بحبك أوى ياربى يسوع المسيح ... وعايز أعيش معاك ... طوووول عمري .
ا/مجدي : برافو يافادى .... أنتا كده .... أكيد فهمت .
فادى : طبعا يااستاذ مجدي .... شكرا ليك ويلا بينا علشان نلحق الحفلة .
ا/مجدي : يلا ياحبيبى .
منقول للجميع جروب نصوص اسكتشات الرب يعوض كل من له تعب فى الخدمة