اسكتش عيد القيامة محاكمة جنود

                    اسكتش القيامة محاكمة جنود 

اهداف الاسكتش

1- معرفة المخدومين بأحداث القيامة من خلال اسكتش محاكمة جنود اللى كانوا واقفين حراس على القبر .

2- شرح وتوضيح باحداث قصة الرب يسوع حتى القيامة .

3- اهمية القيامة من خلال التوضيح للمخدومين كيف قام الرب يسوع .

4- توضيح احداث القيامة من خلال بعض المشاهد التى تشرح القيامة .

بداية الاسكتش 

+ يقف الحاجب وينده بصوت عالى (محكمة) ويدخل القاضى والمستشارين ويقعدوا واثناء ذلك يكون موجود الجنود بالقفص وكمان النيابة والدفاع.

- القاضى : نادى ياابنى على القضية الاولى.
= الحاجب : القضية الاولى المتهم فيها الحراس على اهمالهم وهما واقفين على قبر يسوع والتلاميذ جم وسرقوه.
- القاضى : النيابة تتفضل.
= النيابة : سيادة القاضى حضرات السادة المستشارين احنا النهارده قدام قضية كبيرة ولازم يكون فيها حكم شديد على هؤلاء الجنود وكمان باطالب بالقبض على التلاميذ واعادة جسد يسوع .
# الدفاع : يقوم ويزعق : التلاميذ مسرقوش جسد يسوع الكلام ده مش صحيح .
- القاضى : متتكلمش غير فى دورك .كمل يانيابة .
= النيابة: انا هاشرح لحضرتك ياسيادة القاضى على كل حاجة بالتفصيل.
- القاضى : اتفضل احكى.
= النيابة : الحكاية ياسيادة القاضى ان كان فيه واحد اسمه يسوع ده اتولد فى بلد اسمها بيت لحم لكن عاش فى بلد اسمها ناصرة .يسوع ده كان بيضحك على الناس ...
- الدافاع : وهو منفعل : يسوع مكانش بيضحك على حد ده كان بيشفى المرضى وبيقعد معاهم و....
= القاضى : قولتلك متتكلمش غير فى دورك .كمل يانيابة .
- النيابة : الناس اللى الدفاع بيقول عليهم ان يسوع كان بيشفيهم هما هما الناس اللى راحوا لبيلاطس علشان يصلب يسوع .
.المهم ياسيادة القاضى بيلاطس سمع كلام الناس هما وروساء الكهنة وامر بصلب يسوع وبعد ما يسوع اتصلب ومات جه واحد اسمه يوسف الرامى وطلب من بيلاطس انه ياخد جسد يسوع ويدفنه وفعلا وافق بيلاطس وجم روساء الكهنة وطلبوا من بيلاطس انه يوقف الحراس دول على القبر ويحط اختام علشان التلاميذ ميجوش ويسرقوه . وفعلا بيلاطس وافق على كل الكلام ده .
..بس اللى حصل واللى كانوا روساء الكهنة خايفين منه ان التلاميذ جم سرقوا جسد يسوع وكمان ممكن الحراس يكونوا مشتركين فى الجريمة دى وعلشان كدا انا بطلب بمحاكمة الحراس واعادة جسد يسوع .وشكرا ياسيادة القاضى .
= القاضى : الدفاع يتفضل .
- الدفاع : سيادة القاضى حضرات الساده المستشارين .فى البداية انا حابب ااكد ان التلاميد مسرقوش جسد يسوع وانا معايا شاهد على الكلام ده وكان حاضر كل الاحداث 
= القاضى : نادى ياابنى على الشاهد .
- الحاجب : الشاهد الاول ( مريم المجدلية )
قف مريم قدام القاضى...........
= القاضى : (لمريم) ايه اللى تعرفيه عن الموضوع ده .
- مريم : انا هاحكيلك على كل حاجة ياسيادة القاضى ...
ومن هنا يبدا المشهد الثانى (تروح مريم على القبر وتلاقى الحجر مرفوع عن القبر تدخل وتخرج تجرى وتروح لبطرس ويوحنا ....
- مريم : الحق يابطرس روحت لقيت القبر مفتوح ويسوع مش موجود فى القبر .
يجروا بطرس ويوحنا ويدخلوا القبر ..........
- مريم : (خارج القبر تبكى ) ياترى يايسوع جسدك راح فين ومين اللى فتح القبر ..(ونظرت للخلف فوجدت يسوع ولم تعرفه)
= يسوع : انتى بتعيطى ليه , انتى عايزة مين ؟
- مريم : انا بعيط علشان ملقيتش يسوع فى القبر .ياريت لو انت اللى اخذته قولى فين وانا اروح اخده .
= يسوع : يامريم.
- مريم : يامعلم ( وهى فرحانه)
= يسوع : روحى بسرعة بشرى وقولى للتلاميذ انى قمن من الاموات وانى هاصعد للسموات .
- مريم : حاضر هاروح ابلغهم بسرعة ( وهى فرحانة )
..........................................................
- مريم : بس ياسيادة القاضى ده اللى حصل ويسوع قام من الاموات ومحدش سرقه زى ما الناس بتقول .
= النيابة : طب لما يسوع قام من الاموات .ياترى هو فين دلوقت؟
- مريم : بعد ما يسوع قام واحنا كلمنا كنا متجمعين كلنا بنصلى ظهر لنا يسوع وكلنا فرحنا جدا وبعد كدا قعد معانا هنا على الارض 40 يوم وبعد كدا صعد قدامنا كلنا للسماء زى ما قلنا وكمان قالنا قبل ما يصعد روحوا بشروا فى كل العالم وقولوا لكل الناس انى قومت من الاموات وانى صعدت للسماء .
= القاضى : حكاية غريبة فعلا .بس بما ان فيه شهود على الكلام ده عايزين نسمع الحراس هايقولوا ايه ...
- احد الحراس : فعلا ياسيادة القاضى زى ما مريم حكت يسوع قام وساعتها سمعنا زلزلة كبيرة واحنا خوفنا جدا وشوفنا يسوع وهو بيقوم وكان فيه نور عالى جدا لما يسوع خرج من القبر . واحنا روحنا بسرعة قولنا لروساء الكهنة بس هما قالولنا ما نقولش لحد على اللى حصل وهما اللى قالولنا نقول للناس ان التلاميذ سرقوه .لكن الحقيقة انه محدش سرقه واحنا غلطنا اننا سمعنا كلامهم .
= القاضى : بعد ما سمعنا من الشاهد والحراس وعرفنا الحكاية على حقيقتها وان يسوع فعلا قام من الاموات وصعد للسموات ومحدش سرق جسده زى ما فيه ناس بتقول ..
... حكمت المحكمة على الحراس بالبراءة لان اللى حصل كان غصب عنهم وهما ما اهملوش فى حراسة القبر بس برضوا هما غلطوا انهم سمعوا كلام روساء الكهنة ومرضيوش يقولوا الحقيقة ان يسوع قام من الاموات لوحده ...
.............روعت الجلسة ...................
- الدفاع : وعلشان كدا احنا بنحتفل بعيد القيامة وبنبقى فرحانين بعد ما عرفنا ان بابا يسوع قام من الاموات وصعد للسموات علشان يجهز لينا مكان علشان نروح نفعد معاه فى السماء .
وكلنا لازم نفرح بالعيد ونروح ليلة العيد نصلى القداس ونفرح بقيامة بابا يسوع من الاموات ...............................
منقول ابرام مكين  الرب يعوض كل من له تعب فى الخدمة