مؤتمر صحفي عن القيامة

 مؤتمر صحفي  ما حدث فى القيامة

بداية الاسكتش سوف نتحدث عن احداث القيامة من خلال مؤتمر صحفى يدور حول شخصيات وصحفيين يسألون اسئلة حول ما حدث اثناء القيامة .

ماذا يكون المؤتمر حول القيامة ؟

يدخل الي قاعة الصحافة قائد مئة روماني في يده خوذته ويرتدي درعه وملابسه المميزة فيتجه للمنصة ويتجاهل أسئلة الصحفيين الذين يقفون حالما يلمحونه ويبدأون في توجيه الأسئلة بصورة متتابعة وسريعة جدا جدا.

ماذا حدث اثناء القيامة ؟

صحفي 1 : صحيح المعلومات اللي وصلتنا ان الجسد اختفي؟؟
صحفي 2 : مفيش أي معلومات عن مكان الجسد؟؟
صحفي 3 : هل الجسد اتسرق فعلا ؟؟
ص1: هل يمكنك أن تؤكد حدوث قيامة بالفعل؟؟
ص4: هل فيه شهود علي اللي حصل ؟؟

* يشير لهم قائد المئة بيديه لكي يصمتوا لكنهم يستمرون في طرح أسئلتهم

اسئلة الصحفيين 

ص 2 : هل صحيح ان زوجة الحاكم متورطة في الموضوع ده؟؟
ص4: هل زوجة الحاكم فعلا تنبأت بحدوث كارثة؟؟
ص1 : ليه الحاكم مجاش هنا بنفسه عشان يوضح للناس ايه اللي حصل؟؟
ص4: ممكن تقول لنا فين القبر اللي اتدفن فيه المُعلم؟؟
ص5: هل تنبأ المُعلم فعلا بأنه هيقوم من الموت؟؟

 قائد المئة : هدوء من فضلكم (ينتظر ثواني حتي يصمت الكل ثم يبدأ حديثه)

قائد المئة :  أنا اسمي مالثوس ....قائد مئة في حرس قصر فخامة الحاكم ..حاكم مقاطعة فلسطين....جناب الحاكم بيلاطس طلب مني أقدم بيان وهو كالتالي (يبدأ يقرأ من لفافة ورقية في يده) 

حكاية القصة 

منذ ثلاثة أيام تم تنفيذ حكم الاعدام بالصلب علي المعلم اليهودي المدعو يسوع الناصري ، وتم دفن جثمانه بعد الوفاة مباشرة في قبر ، واليوم فقط وقبل شروق الشمس مباشرة علمنا أن الجسد قد تمت سرقته وقد تم هذا في الأغلب علي يد أحد التلاميذ المتحمسين والغيورين لهذا المعلم في محاولة لجعل الأمر يبدو وكأنها القيامة التي كان المعلم قد سبق وتنبأ عنها أثناء حياته. حتي الآن لم نتمكن من تحديد مكان الجسد ، لكن حالما نجده فسوف نُعلمكم لكي ما يراه الجميع ونضع بالتالي نهاية لهذه الخدعة. شكرا (ينظر للصحفيين ويستدير لكي يذهب)

ص 3: كابتن ماثوس ..هل صحيح ان يسوع مكنش ميت لما اتدفن في القبر؟؟
قائد المئة : أنا آسف .أنا مش جاهز للإجابة عن أي سؤال تاني.
ص3 : دا سؤال بسيط يا كابتن مالثوس ....هل يسوع كان ميت لما نزلتوه من علي الصليب ولا لأ؟؟
قائد : كان ميت طبعا .. بعد اذنكم (يحاول أن ينصرف)
ص3 : ليه حضرتك متأكد انه كان ميت؟؟
ق : لأني كنت الظابط المشرف علي اعدامه.
ص3 : دي مش اجابة علي السؤال.

ق (بنفاذ صبر) : لما قائد روماني يشرف علي عملية اعدام بتكون مهمته الرئيسية والوحيدة انه يتأكد ان السجين ميت قبل ما ينزلوه من علي الصليب، و احنا لينا طريقة معينة بنتبعهاعشان نتأكد من الوفاة ، احنا بنطعنه بحربة هنا وهنا في القلب والرئة(يشير علي جسده) .

يبدو علي الصحفي التأثر ويتحرك وكأنه هو من يُطعن
ق : وبالتالي حتي لو السجين مماتش من الصلب هيموت من الجرح العميق اللي هيحصل له في القلب والرئتين، وفي حالة يسوع لازم تعرفوا ان فيه دم ومية خرجوا من جرح الحربة وهذا يدل علي انه كان ميت قبلها بشوية ويمكن حتي قبل ما نطعنه بساعات.(يستدير ليخرج)
ص2: هل من الصحيح أن المقبرة التي دُفن فيها كان عليها حراسة مشددة خوفا من اختفاء الجسد؟؟
ق: أنا قلت لحضراتكم ...أنا مش مستعد للإجابة عن أسئلة تاني.
ص5: مش حضرتك برضه المسئول عن الأمن أمام  الحاكم بيلاطس يا كابتن مالثوس ؟؟
ق: أيوه أنا ...بس ............
ص5: يبقي  لو كان فيه حراسة مشددة حوالين القبر اللي اتدفن فيه المعلم يسوع فأكيد حضرتك هتكون علي علم بيها ومسئول عنها ، مش كده ولا ايه؟؟
ق: نعم ..نعم ...أنا المسئول.
ص5: أرجع تاني لسؤالي : هل كان فيه فعلا حراسة مشددة علي القبر؟؟
ق(يصمت للحظات وينظر للصحفيين بتمعن ثم يجيب): نعم . كان فيه حراسة .واحنا ختمنا القبر...هوه ده كل اللي أقدر أقوله دلوقتي....لما يكون فيه حاجة جديدة هأقولها لكوا. (يستدير لكي يخرج)
ص1: ممكن حضرتك تدينا فكرة عن كيفية ختم القبر ؟؟
ق(يلتف لينظر للصحفيين مرة ثانية): القبر عبارة عن كهف محفور في منحدر واحنا قفلنا فتحة الكهف بصخرة ضخمة وختمنا بالشمع السخن علي حواف الصخرة بحيث انه لو أي شخص فتحها هيتكسر الشمع ....أنا لازم أنسحب حالا.....
ص 6 (يقاطعه بسرعة): وزن الحجر اللي اتقفل بيه القبر أد ايه؟؟
ق: حوالي طن ....
ص6 (في دهشة): طن؟؟ يعني 1000 كيلو؟؟
ق: متهيألي كفاية أسئلة كده ...لما يكون فيه جديد...
ص7: كابتن ماثوس ...هل كان فيه حراسة أمام القبر؟؟
ق(يتنفس بعنق ويبدو عليه الاستسلام): نعم ....قادة الهيكل كانوا خايفين ان تلاميذ يسوع يسرقوا جسده وبعدين يقولوا انه قام من الموت...وبناءً علي طلب من قادة الهيكل وضعنا حراس حول القبر لمدة أربعة وعشرين ساعة طول الثلات أيام اللي فاتت.
ص7 : إذن لو تلاميذ المسيح عاوزين يسرقوا جسده لازم يغلبوا الحراس اللي قدام القبر وبعدين يرفعوا حجر وزنه 1000 كيلو..؟؟
ق : احنا لسه مش متأكدين من الطريقة اللي تمت بيها سرقة الجسد بس معلوماتنا بتقول ان التلاميذ سرقوه.
ص2: هل هناك اصابات بين الحراس؟؟
ق: لا ...لا توجد أي اصابات.
ص2: حضرتك تقصد ان الجنود المسلحين دول سابوا الجسد يتسرق بدون ما يحاولوا يوقفوا الحرامية؟؟
ق: هما قالوا لي ان الحراس كانوا نايمين.
ص2: كابتن مالثوس . ايه هي عقوبة الحارس اللي ينام في وقت الخدمة؟؟
ق: بحسب القانون الروماني تكون عقوبته هي الموت.
ص1: ممكن نتكلم مع الحراس قبل ما يتم تنفيذ الحكم فيهم؟؟
ق: للأسف ده مش ممكن لأنهم كلهم اتنقلوا لوحدة عسكرية جديدة في قيصرية.
ص2 (باستغراب):  حضرتك تقصد انه بدل ما يتم اعدامهم نقلتوهم ؟؟
ق: القرار ده مش قراري ....ده قرارسيادة الحاكم وهو بيقرر اللي بيشوفه جنابه صح.
ص2 (بتريقة): طبعا ...القرار جه في وقته.
ق: حضرتك بتقول حاجة؟؟
ص2 : هل ده هو السبب اللي خلي الحاكم بيلاطس ميجيش النهاردة المؤتمر الصحفي؟؟
ق: الحاكم بيلاطس تعبان شوية النهاردة.
ص4: هل فعلا كان فيه زلزال النهاردة في الوقت اللي اختفي الجسد فيه؟؟
ق : أعتقد ان ده حصل فعلاً.
ص1 : اللي حضرتك بتقوله ان الحراس فضلوا نايمين لما كان فيه حجر وزنه 1000 كيلو بيتحرك وكمان كان فيه زلزال؟؟؟؟
ق: دي الحكاية اللي قالوها الحراس.
ص6: هل الاشاعة اللي بتقول ان كان فيه أكفان كتيرة جوه القبر اتفكت عن الجسد الميت قبل سرقته دي اشاعة صحيحة؟؟
ق: الأكفان مازالت في القبر فعلا.
ص6: هل حضرتك تعتقد أن سارقي القبور هيقعدوا يفكوا الأكفان عن جثة قبل ما يأخدوها؟؟
ق: اللي أقدر أقدمه لحضراتكم هي بس التقارير اللي وصلتني.
ص6 : أنا متهيألي حضرتك مش مصدق التقارير دي زينا؟؟
ق: أنا مجرد جندي ومليش حق أقول رأيي الشخصي في مسائل تخص الدولة.
ص2 : هل شفي يسوع أثناء حياته أحد خدامك والذي كان مشلولا؟؟
ق (يصمت مذهولا لثواني): نعم ...نعم ...ده حصل فعلا بس أنا مش فاهم ايه علاقته باللي احنا بنتكلم فيه دلوقتي؟؟
ص2 : ممكن نعرف ايه الدوا اللي يسوع اداه للخادم بتاعك عشان يشفيه؟؟
ق(مرتبكا): هو ..هو مإداهوش أي أدوية خالص.
ص2: إزاي يعني؟؟
ق : هو بس قال كلمة فخف الخادم من المرض.
ص5: تقصد انه ملمسوش خالص؟؟
ق(بعد توقف لثواني): يسوع مرحش خالص بيتي ...هو كان في مكان تاني من المدينة.
ينظر كل الصحفيين لبعضهم ويهزون أكتافهم تعجبا 
ص1: قصدك ان يسوع شفي خادمك من غير ميشوفوه؟؟
ص2 : مجرد انه اتكلم بس راح المرض منه؟؟
ص3: وهو في مكان بعيد؟؟
ص4 (بصوت جهوري ومفاجيء): كابتن مالثوس هل تؤمن أن يسوع هو ابن الله؟؟ هل تؤمن أنه قام من الأموات كما تنبأ؟؟ 
ق: أنا آسف . أنا جندي وغير مسموح ليّ اني أتكلم في أمور تخص الدين.
ص4 : كابتن مالثوس . في الظروف الغامضة دي الموضوع مبقاش موضوع دين ولا مش دين... أنا متهيألي أي حد محتاج ايمان كبير قوي بعد ما يسمع الكلام ده عشان يصدق ان الجسد اتسرق أكتر بكتير من الايمان اللي ممكن يحتاجه عشان يصدق ان شخص زي يسوع عمل معجزات كتيرة قام من الأموات...ولا حضرتك شايف ايه؟؟
ق (مرتبكا ويتحرك للخروج): أنا .....أنا آسف ...لازم أمشي حالاً..  (يخرج ويتحرك الصحفيون وراءه وهم يتابعونه بأسئلتهم)
ص2: هل أنت مسيحي؟؟
ص1: امتي قابلت يسوع أول مرة؟؟
ص3 : امتي بقيت مسيحي؟؟
ص4: ازاي بقيت مسيحي؟؟
ص5: ممكن نتكلم مع الخادم بتاعك اللي شفاه يسوع؟؟
                                                               النهاية
منقول للجميع الرب يعوض كل من له تعب فى الخدمة