القديس البخيل (بطرس العابد) بنظرة معاصرة
الهدف من الاسكتش
قصة القديس بطرس العابد ولكن فى عصرنا الحاضر وهدف الاسكتش هو العطاء ازاى نتعلم العطاء بأنواعه مناسب لجميع المراحل .
(بداية الاسكتش تفتح الستار)
بطرس يتكلم في التليفون : هو لسه مجابش الفلوس اللي عليه ازاي كدة دول عشرة جنية مش معقوله يكون نسي دا انا هوديه في داهية هبلغ عنة ، اقفل دلوقتي انا دمي محروق
(يدخل عليه مرات فراش المكتب)
مرات الفراش: صباح الخير يا بطرس بيه
بطرس: صباح النور انتي مين
مرات الفراش: انا مرات عم خليل فراش مكتبك. هو تعبان قوي و بعتني اكلمك بخصوص سلفة احنا مش لاقيين حق العلاج
بطرس: ايه انت جاييه هنا عاوزة فلوس ،قولي لجوزك اللي بعتك انه مرفود ازاي عاوز يأخد فلوس مش من حقه
مرات الفراش: ابوس ايدك يا بطرس بيه جوزي تعبان ممكن يموت
بطرس : ما يموت انا مالي دا قضاء ربنا هنعترض
مرات الفراش: دا خدمك بعنيه كيف تسيبه في محنتة
بطرس:بلا محنته بلا كلام فارغ يلا برا المكتب برااا
(تخرج مرات الفراش حزينة بتبكي)
(تغلق الستار)
المشهد الثاني
(تفتح الستار علي منظر بيت بطرس )
يدخل بطرس و يتجه ناحية الخزنة و يخرج نقودة و يعدها بشراهة حتي يسمع صوت
الشحات: لله يا اهل الخير ، ساعدوا فقير مسكين
بطرس : يوووه كل يوم يجي الراجل دة لما اقوم اشوفه عاوز ايه
(يدخل الشحات)
الشحات: لله يا اهل البيت
بطرس: الله يسهلك يا عم
الشحات:اديني حاجة اكلها طيب جعان
بطرس: الله يسهلك يا عم قولنا
الشحات: اي حاجة يا بيه
(يدخل الخادم بطبق عيش )
الواد: العيش يا بطرس بيه
الشحات: طيب هات رغيف جعان يا بيه
بطرس : يووووه بقولك امشي امشي
(يضربه برغيف ناشف علي دماغة الشحات يأخدة و يمشي )
بطرس للواد :ادخل حط العيش دة في المطبخ انا داخل انام شوية حرق دمي الراجل الرزل دة
(تغلق الستار)
المشهد الثالث
(ينصب الميزان في وسط المسرح يقف بطرس في جانب المسرح ؛يحضر شياطين و معهم خطايا بطرس حتي تمتلئ الكفة الشمال ، يحضر الملائكة و يحتاروا ماذا يضعون له في الكفة اليمين حتي يحضر احدهم الخبزة الناشفة لكي يحطها في الكفة)
بطرس: انا فين معقوله انا مت و الشركة و فلوسي ،
احد الملائكة: بس دي اللي عرفنا نجمعهاله
بطرس: لا لا دور تاني اكيد فيه حاجة
(يفرح الشياطين )
احد الشياطين: يبقي دا تبعنا هاتوه ناخدة معانا للجحيم
بطرس : لا مش هجي معاكم اكيد فيه حاجة تاني انا عملتها
(يهجم الشياطين علي بطرس ليأخذوه معهم )
(تغلق الستار)
المشهد الرابع
(تفتح الستار علي بطرس و هو نائم )
يقوم بطرس مفزوع: لاااا مش هجي معاكم لسه فيه حاجة تاني
بطرس: يااه حلم فظيع ،بس معقوله انا معملتش حاجة كويسة خالص غير الرغيف اللي رميته علي الشحات دة دا انا كان قصدي اطردة بيه انا لازم ازود الخير اللي بعمله علشان الكفة اليمين تتملي ، يا حنا يا حنا
حنا: ايوة يا بطرس بيه
بطرس: شوف الراجل اللي كان هنا من شوية هاته انا عاوزة
حنا : امرك يا بطرس بيه
(يخرج حنا )
بطرس: انا لازم اوزع جزء من فلوسي علي المحتاجين
(يدخل حنا و معاه الشحات)
الشحات: عاوز ايه مني يا بيه
بطرس: انا اسف يا عمي متزعلش مني انا كنت غلطان في حقك و حق ناس كتير خد الفلوس دي خليها معاك و لو احتجت اي حاجة افتكر ان ليك اخ اسمه بطرس
الشحات: شكرا يا بيه
(يخرج الشحات)
بطرس : يا حنا تروح دلوقتي للدكتور مرقس تأخدة معاك لبيت عم خليل تخليه يكشف علية و طمني ، خد معاك الفلوس دي حاسب الدكتور واديهم الباقي و قولهم لو احتاجوا اي حاجة انا تحت امرهم
حنا: تحت امرك يا بطرس بيه
بطرس: برضو مش كفاية انا لازم ابيع الشركة و اوزع فلوسها علي المحتاجين و البيت دة كمان انت مش محتاجه برضو مش كفاية انا هبيع نفسي و اوزع تمني للناس انا من النهاردة هكون لربنا و بس
انا ليك انت يا رب انت بس
تأليف "مسرح تماڤ ماريا و سان جورج ببرديس"
الرب يعوض كل من له تعب فى الخدمة من جروب نصوص استكتشات ومسرحيات للخدمة