اسكتش ادمان الانترنت
لكل الخدام اسكتش جميل جدا عن ادمان الانترنت مناسب لاعدادى فأعلى ممكن تعملوه فى الافتتاحية او فى مؤتمرات او حفلات منقول من جروب نصوص واسكتشات مسيحية
الرب يعوض الجميع .
بداية الاسكتش
(يدخل سعيد ومعه الدكتوره )
سعيد : اهلا وسهلا بالدكتوره جيهان والف مبروك افتتاح عياده الدكتوره جيهان لعلاج الادمان
دكتوره : شكرا يا سعيد ربنا يخلييك
سعيد : احسن حاجه يا دكتوره انك فتحتى عياده لعلاج الادمان الموضوع ده بقي خطير جدا
د : مزبوط يا سعيد فعلا الموضوع ده زاد اوى اليومين دول
س : دانا اعرف واحد صاحبى ما سابش صنف الا وجربه حشيش .. بانجو راشق فى اى حاجه لازم اخليه ييجى هنا يتعالج
د : بس انا مش بعالج ادمان المخدرات يا سعيد
س : امال ايه يا دكتوره يبقي اكيد الكيميا..... دانا اعرف واحد جرب كل حاجه ترامادول.... تامول كل اللى ييجى على بالك جربه
د : ولا ادمان الحبوب برده
س : يبقى السجاير ... قطعت وقطعت سيرتها ده الواد مرزوق بيخلص علبتين من السجاير الطويله دى ...بقي فظيع
د : انت ما تعرفش غير مدمنين ولا ايه يا سعيد
س : لا يا دكتوره ما تقوليش كده دانا اعرف ناس كده
د : بص بقي يا سعيد انا بعالج نوع من الادمان .. اصحابه مش بيبقوا عارفين انهم مدمنين
س: ازاى يعنى يا دكتوره مش فاهم
د : انا بعالج ادمان الموبيل والانترنت
س : ايه الهيافه دى يا دكتوره بقي سايبه كل الحاجات المهمه اللى قولتهالك وتقوليلى موبيل ومش عارف ايه ... طب ادى دقنى لو حد عبرك اصلا
اصوات من الخارج : يا دكتوره انتى فين احنا عايزينك ضرورى
د : شفت بقي انها مشكله كبيره يلا اتفضل دخلهملى واحد واحد
س : حاضر يا دكتوره
د : واضح فعلا انا الموضوع خطير زى منا توقعت ( يدخلان رانيا و شريف )
رانيا : مساء الخير يا دكتوره
د : اهلا وسهلا اتفضلوا
شريف : اتكلم انا ولا تتكلمى انتى
رانيا : لا اتكلم انا
شريف : لا اتكلم انا
د : انتو جايين تتخانقوا هنا ... اتفضلى يا مدام
رانيا : انا رانيا وده شريف جوزى بس انا زهقت من اللى هو بيعمله
شريف : يعنى انا اللى ما ذهقتش انا اتخنقت منك
د : طب بالراحه كده واحده واحده قوليلى يا مدام رانيا ايه اللى مضايقك من استاذ شريف
رانيا : انا اقولك بقى يا دكتوره .... الراجل ده كل حياته بقت كوره وبس كل ماتشات الكوره بيتفرج عليها مدمن حاجه اسمها ماتشات ... الاهلى ده بالنسبه له اهم منى ومن عياله دانا لو بموت قدامه مش هيسيب ماتش الاهلى واليوم اللى يتهزم فيه الاهلى بتبقي جنازه فى البيت
شريف : لو سمحتى الاهلى مش بيتهزم ده طول عمره بيفوز
رانيا : يفوز ولا يخسر احنا مالنا ده حتى ماتشات المنتخب وليفر بول قال ايه عشان محمد صلاح وبرشلونه وريال مدريد ولو مافيش ماتشات يفضل يتفرج على الاعاده والاهداف وتحليل الحكام انا زهقت خالص جبت اخرى
د : يا مدام رانيا ممكن دى حاجه بيحبها جوزك مافيهاش مشكله
رانيا : ده مش حب عادى ده ادمان .. وهو فى الشغل يفضل يتفرج على الماتشات والمدير بتاعه يشوفه ويمشيه طبعا
شريف : ده هو اللى كان حاططنى فى دماغه
رانيا : طب ولما كنا راكبين فى العربيه كنت مركز مع الماتش وعملنا حادثه ولولا ستر ربنا كنا رحنا فيها
شريف : عندك حق دى انا كنت غلطان فيها
د : طب لو كان عندك حاجه مهمه فى وقت ماتش الاهلى ... زى اجتماع فى الكنيسه او خدمه او زياره او قداس هتسيب الماتش ولا لا
شريف : اكيد لا طبعا هو الاهلى بيلعب كل يوم يعنى كله الا ماتش الاهلى
د : يبقى المدام عندها حق انت فعلا مزودها ووصلت للادمان ولازم تعرف ان فى حاجات فى حياتك اهم بكتيير من ماتشات الكوره ..
رانيا : ياريت يفوق ويعرف
شريف : وانتى بقي مش ناويه تفوقى ولا انتى ناسيه
د : مالها المدام يا استاذ شريف
شريف : مدمنه مسلسلات بتتفرج على مسلسلات من كل الجنسيات مصري سورى تركى مكسيكى امريكى حتى الكورى والهندى انا ذهقت كل ما ارجع من الشغل الاقيها بتتفرج على مسلسلات نبقي خارجين مع بعض تسيبنى وتنفضل تتفرج على المسلسل .... فى مره رجعت البيت لقيتها مش عاملالى اكل وزعلانه اقولها مالك تقولى مراد وحياه سابوا بعض اقولها مين دول قرايبك يعنى تقولى بتوع المسلسل التركى لما جبت اخرى منها والمسلسل من دول يبقي 150 حلقه ...
رانيا : وفيها ايه يعنى منا بسلى وقتى
شريف : دانتى طول الوقت على المسلسلات وكل ما اقولك على اكل ولا شرب ولا غسيل تقوليلى مش فاضيه بشوف المسلسل والعيال ينادوا عليها ما تردش عليهم عشان الهانم حاطه السماعات فى ودنها
د : يا مدام رانيا ممكن تتفرجى شويه بس ما تبقاش المسلسلات دى اهم حاجه فى حياتك
رانيا : بس انا لما ببدا مسلسل ببقي عايزه اشوف باقى الحداث واكمله
د : فى حاجات اهم فى حياتنا بيتك وولادك
رانيا : هحاول يا دكتوره على اد ما اقدر
د : انتو تقدروا تتفضلوا دلوقتى استنونى بره
شريف : ماشي يا دكتوره شكرا خالص ( يخرجان )
د :يا سعيد ..... يا سعيد دخل اللى بعده
س : حاضر يا دكتوره اتفضلى يا انسه ( تدخل مونيكا وكل شويه تتصور )
مونيكا : هاى يا دكتوره
س : يا اهلا وسهلا ومرحبا مش عارف العياده نورت فجأه كده ليه
د : اتفضل يا سعيد
س : ما تخلينى قاعد شويه يا دكتوره الجو هنا حلو قوى
د : يووه بقي يا سعيد ما قلتلك اتفضل
س : يعنى متأكده انك مش عايزه من حاجه
د : لا شكرا مش عايزه .... اهلا وسهلا بحضرتك
مونيكا : اهلا بيكى يا دكتوره انا اسمى مونيكا
د : ايه مشكلتك يا مونيكا
م : انا بقي اهم حاجه عندى لا دول حاجتين الصور والفيس بوك
د : ازاى بقي يا مونيكا
م : يعنى كل ما اعمل حاجه لازم اتصور كل ما اروح مكان لازم اتصور ومش صوره واحده ابقى طول الوقت اتصور اهم حاجه عندى انى اتصور وانزل صورى على الفيس بوك والنستجرام دانا تقريبا ممكن اغير صورتى كل ساعتين والفيس بوك ده تقريبا بقي دنيتى وحياتى .. اى حاجه اعملها لازم تنزل عالفيس يعنى اروح اى مكان لازم اعمل شيك ان واعمل اى حاجه لازم اكتب انى عملت كده اخد دور برد بسيط اكتب انى عيانه وبموت ازعل مع حد اروح اجرى اكتب هى ليه كل الناس بقت بوشين وبتزعل بسرعه ..انا تقريبا كل اصحابى قطعوا علاقتهم بيا
د : اكيد فى سبب لكده
م : طبعا لانى كل ما اخرج معاهم مش ببقي مهتمه غير بالصور والفيس بوك وببقى مش معاهم خالص يفضلوا يتكلموا مع بعض وانا طول الوقت ماسكه الموبيل لاما بتصور او بشوف الفيس بوك او بعمل شات مع حد
د : وبتعملى شات مع مين
م : اى حد مش هتفرق اعرفه او معرفوش مش فارقه المهم انى اعمل شات واتعرف على ناس جديده يعنى من الاخر حياتى بقت ما بين الفيس بوك والاانستجرام والسناب شات ... وكل علاقاتى مع اصحابى تقريبا اتقطعت عشان كده انا جايالك تشوفيلى حل يا دكتوره
د : انتى اهتميتى بحاجات كتير مش مهمه ونسيتى حاجات مهمه
م : يعنى انا برده ما فهمتش اعمل ايه
د : حاولى تقللى الساعات اللى بتمسكى فيها الموبيل
م : الموضوع مش بالسهوله دى يا دكتوره
د : بس انتى لازم تحاولى وانشاء الله هتقدرى .... تقدرى تتفضلى تستنينى بره
م : اوكى يا دكتوره شكرا خالص ... عن اذنك
س : نورتى يا استاذه ياريت تكررى الزياره تانى
م : انشاء الله
د : يا سعيد .... يا سعيد
س : فيه ايه بس يا دكتوره مش شايفانى فى حاله انهيار عاطفى
د : وبعدين معاك بقي يا سعيد ... قولى فى زباين تانى بره
س : لا مافيش ... قصدى فى واحد بس مستنى
د : طب يلا دخله
س: حاضر يا دكتوره ... اتفضل يا استاذ ( يدخل جورج وهو بيلعب )
د : مساء الخير يا استاذ
جورج : يااه كنت هخلصها هبدأ من الاول تانى
د : يا استاذ ... يا استاذ
جورج : ايوه مين
د : انا الدكتوره جيهان
جورج: الحقينى يا دكتوره انا شكلى اتجننت خالص
د : ممكن اعرف اسمك
جورج : انا اسمى جورج
د : مالك بقي يا استاذ جورج
ج : انا يا دكتوره اهم حاجه عندى الالعاب على الموبيل ... كل حياتى تقريبا بقضيها وسط الالعاب عالموبيل او عالاب توب والبلاى ستاشن كل ما تنزل لعبه جديده لازم اشتريها وافضل العبها لغايه ما اخلصها دانا مضيع كل وقتى وفلوسي عالالعاب بس ويوم ما اروح مكان او اقعد مع ناس ابقى طول الوقت ماسك الموبيل بالعب عليه لحد ما بطلت اخرج ولا اقابل اى بشر حتى الكنيسه بطلت اروحها وفى شغلى طول الوقت تقريبا بلعب او بدور على العاب جديده ... وبصراحه انا ذهقت من العيشه دى ومش عارف ابطلها
د : هى فعلا مشكله كبيره بس انت تقدر تشغل وقتك فى حاجات اهم من الالعاب
ج : حاولت بس ما عرفتش
د : يا سعيد .... ناديلى كل الناس اللى عندك
سعيد ( من الخارج ) : حاضر يا دكتوره .... اتفضلوا ادخلوا .... ( مشيرا الى مونيكا ) اتفضلى حضرتك من هنا طب اجيبلك اى حاجه تشربيها طيب
مونيكا : ميرسي خاالص
د : خلاص يا سعيد اتفضل انت
س : حاضر .. حاضر اووف
د : بصوا بقي يا جماعه ... كلكم بقيتو تحت سيطره حاجات كتير ومش قادرين تتخلوا عنها بس خلو بالكو انت حصلكم مشاكل كتير بسبب ادمانكم للحاجات دى ولازم تفوقوا وبسرعه انت يا استاذ شريف لازم تقلل اهتمامك شويه بالكوره والماتشات عشان ما تخسرش اكتر من اللى خسرته وانتى يا مدام اهتمى ببيتك وعيالك وحياتكمع ربنا اهم من المسلسلات وانتى يا مونيكا سيبى شويه السوشيال ميديا واستمتعى بالحياه كع اصحابك واهلك واوعى تخسريهم ولو حد زعلان منك حاولى تصالحيه وانت بقي يا جورج قلل شويه من الالعاب دى على الاقل خليها فى وقت فراغك بس
شريف : نوعدك هنحاول يا دكتوره
رانيا : وانا كمان هنسي شويه المسلسلات
م : انا حاسه ان الموضوع صعب عليا اوى بس لازم ابدأ اتغير
جورج : انا الالعاب ده سيطرت على دماغى وخسرتنى حاجات كتير ولازم افوق
د : تمام برافو عليكم .. اشوفكم بقي الاسبوع الجاى اشوفكم عملتو ايه ... مع السلامه
الجميع : سلام يا دكتوره
( بعد مرور اسبوع )
( تدخل الدكتوره وسعيد )
د : كلهم موجودين يا سعيد
س : ايوه يا دكتوره
د : طب دخلهم كلهم مع بعض
س : امرك يا دكتوره ( يدخلون الجميع )
د : اتفضلو يا جماعه .. ها طمنونى ايه الاخبار
شريف : تمام يا دكتوره انا عملت اللى قولتى عليه ومابقتش الكوره والماتشات هى اهم حاجه فى حياتى لان فى حاجات كتير اهم زى بيتى وشغلى وكنيستى وانها مش هتوكلنى عيش يعنى بقيت بتفرج اه بس لو فى يوم فاتنى ماتش لانى مشغول عادى مافيهاش مشكله
د : الكلام ده مزبوط يا مدام رانيا
رانيا : ايه يا دكتوره مزبزط والبركه فيكى ده اتغير خالص معايا ومع الاولاد وكمان ممكن نخرج وقت الماتش عادى
د : طب وانتى بقى يا رانيا
ر : انا كمان اتغيرت سبتنى من المسلسلات وبقيت اهتم ببيتى وعيالى ومش بس كده بقيت بتفرج اه بس بدل المسلسلات افلام قديسين ووعظات وفيديوهات للكتاب المقدس الحاجات دى جميله اوى فعلا
شريف : فعلا يا دكتوره رانيا اتغيرت خالص وقللت خالص من الفرجه على المسلسلات وكله بفضلك يا دكتووره
د : انا ما عملتش حاجه ... وانتى بقي يا مونيكا
مونيكا : انا حلولت كتير بس الظاهر مافيش فايده
د: ازاى بس فهمينى
م : يعنى كل ما ابعد شويه عن الفيس بوك الصور والشات الاقينى بضعف وارجع تانى برده
د : يعنى انتى مش حاسه باى فرق خالص
م : لا فيه فرق طبعا بس فرق بسيط
د : معلش مع الوقت هتلاقى نفسك بتتحسنى وتبقى احسن ارجعى لاصحابك واهتمى بعيلتك ابعدى عن العالم الوهمى ده شويه وعيشى فى الواقع
م : انا فعلا هعمل كده بس انتى لازم تكونى معايا وتشجعينى دايما
د : ما تخافيش انا هفضل معاكى وانا واثقه انك قويه وهتقدرى ..و ربنا يقف معاكى
م : عندك حق انا فعلا ناسيه ربنا خالص وسط كل ده لان هو قال ادعنى وقت الضيق انقذك فتمجدنى
د : برافو عليكى يا مونيكا هو ده الكلام المزبوط .... وانت بقي يا جورج
ج : انا تمام خالص يا دكتوره بقيت ساعات بلعب اه بس مش فى كل وقت وبقيت بهتم بحاحات اهم من اللعب واشتركت فى خدمه فى الكنيسه عشان اشغل وقتى انا فعلا اتعيرت حتى كل اللى حواليا حسوا بالتغيير ده .. شكرا ليكى يا دكتوره
د : كلنا ساعات بننسي ايه الهدف من حياتنا .. وان كل واحد فينا ليه رساله لازم ياديها بنجاح وان كل وزنه ربنا بيديهالنا لازم نحافظ عليها ونربح بيها كمان حافظ عليى حياتك ووقتك وعلاقتك بربنا وبالناس ما تخلوش الموبيل والانترنت يشغلكم عن حاجتت مهمه فى حياتكم كل حاجه نقدر نستخدمها صح وغلط فياريت ما نزودش فى استخدامنا للحاجات دى وتبقى هدف فى حياتنا خلى هدفك هو ربنا وخليك دايما مهتم بخلاص نفسك وتهتم بابديتك