اسكتش الحدود بين الخطيبين
اهداف الاسكتش
1- لازم نعرف الحدود فى فترة الخطوبة بين الولد والبنت .
2- كل خطوة لازم نضع ربنا فيها ومنسمعش اى كلام من الاخرين يشتت تفكيرنا بعيد عن ربنا ونلتزم بالحدود فى اشياء كثيره هنعرفها .
منقول من جروب نصوص اسكتشات مسيحية الرب يعوض كل من له تعب فى الخدمة .
الشخصيات
دينا الخطيب( فادى) / خطبته ..منال ( منال)
كاترين الخطيب المؤدب (مينا ) / خطبته انجى
الملاك ... شريف
الشيطان .. اشرف
الستاره تفتح على فادي بيكلم نفسه ياااا اخيرا خطبت وههيص بقي .. لما اكلم الموزة اشوفها بتعمل ايه
( يمسك الفون) الو ايه يا مونى عامله ايه وحشتينى
منال.. انت كمان وحشتنى اوى
فادي.. طب اايه ..
منال.. ايه ايه.؟
فادي .. ايه ااايه يلا نتقابل انزلى
منال ..انزل ازاى مانت عارف انى مينفعش انزل الا لما اقوول لماما وبابا واشوف البت اختى عشان تيجي معانا
فادي .. نعم ياختى ولا هو انا خطبتك وجيبلك شبكه ب5000 تلاف جنيه عشان تقوليلى ااامى وابويا واختى ... قولى لامك اى كدبه وانزلى قبلينى
المــلاك ... يوشوش منال .. اوعي يا منال تكدبي متضحكيش على مامتك
الشيطان لمنال .. على فكره ده خطيبك يعنى عادي جداااا لو نزلتى معاه ومفهاش اى حاجه
منال .. اه فعلا ده خطيبى يعنى عادي ... طب فادي خمس دقايق وهنزلك
فادي يقفل الفون ... واااالعه بقي لما اظبط السكسوكه
منال تروحله يسلم عليها ويشدها له ... هى تبعده
فادى..... ايه يا بت مالك ده انا كنت هبوس راسك
منال ...لا ياعم ولا راس ولا ايد .... انا قلت لامى انى نازله نص ساعه وراجعه
فادي ... طب وحشتينى بقي
منال .. مانا معاك اهو
فاادي .. بحبك يابت
منال .. وانا بردو
فادى ... طب متيجى نروح شقتنا اوريكى الالوان
منال... ياااا انت يابنى قديم اوى جو تعالى الشقه وماما تعبانه ده جو افلام قديمه
انت فكرنى هبله وهاجى معاك
فادى ... يابت انتى دماغك وديتك فين يابت انتى خطبتى وكلها كم شهر وتبقي مراتى
وهو بيحط ايديه على كتفها
منال..ايه شيل ايدك لما ابقي مراتك .... وبعدين انا مش بحب الحركات دى
فادى ... مبتحبيهااااش امال خطبتك ليه انا
ويوشوش نفسه هو انا اتدبست فى وحده عقد ولا ايه
ويكمل . بقولك تعالى نتمشي زهقت وهو بيحط ايديه على وسطها
الملاك .. لمنال خليه يشيل ايديه
الشيطان ... ياخيبه هيسيبك فكيها شويا هتعنسي وتقعدى جنب امك
والاتنين يطلعوا بره المسرح
يدخل فادى
فادي ...يدخل وهو بيكلم منال فى التليفون
ااالو يا حبي
منال ... ايوه يا فادي ازيك
فادي.. ايه فادي دي قوليلى يا فوفو.. تعالى ننزل
منال .. ننزل ايه مش كل مره هكدب على ماما
فادي .. انتى هتمثلى مانتى ياما كدبتى ونزلتى معايا اشمعنا دلوقتى
منال..ايه الطريقه اللى بتكلمنى بيها دى انا كنت بكدب وبنزل معاك من ورا اهلى علشان مزعلكش.... ااقولك تعالى انت اتغدى معانا
فادى .... اشطاااات هلبس واجى
يدخل ويقعدوا على كرسين ويلزق ويبصلها بصياعه ايه يابت الحلاوة دى ويحاول يقرب
منال .. تعالى صوتها وتقوله ااايه
فادى يخربيتك وطى صوتك هتودينا ف داهيه امك جوه وبعدين ماحنا عملنا محضر نص الاكليل يعنى كتابنا الكتاب وعلينا الجواب يعنى مررراتى يابت
مناال.. وده مين اللى ضحك عليك وقالك كده المحضر ده خطوووبه يعنى ممكن افكها واسيبك فى اى لحظه
فادى.. يانهارك مطين تسبينى ده ايه يابت ده انا صرفت عليكى دم قلبي خروج وفسح ومحلات 2.50 اللى خربت بيتى وبعدين ده لو فكرتى تسبينى هفضحك وهقول لامك انك كنتى بتخرجى معايا من وراهم وهقولهم على التليفون اللى مخبياه وبتسهرى تكلمينى لحد الفجر وهطلع الصور اللى كنتى بتبعتهااالى
وورينى بقي يا حلوة مين هيرضا ياجوزك
منال. صور ايه انا كنت ببعتلك صور عاديه
فادى وهو بيمسك الفون لا هو انتى متعرفيش ؟؟ ان في برامج بتخلى الصور لووووز وهو بيحط الفون فوشها
منال .. انا اللى غلطانه انى وفقت على واحد زايك قال ايه عنده شقه وجاهز ياخى تغور انت وشقتك وتتقفل الستاره
تفتح الستاره
انجى ... بتتكلم ف الفون ايوه يابت اتخطبت لولولولوى يااااا ساتر كنت هموت واتخطب اخيرا هخرج واتبسط وهدايا بقي ااقفلى ااقفلى لما اشوف مينا مجاش ليه
الو ايه يا منمن انت فين يابنى
مينا .. ايه منمن دى مش بحب الدلع الرخم ده
انجى .. معلش ياعم متزوقش كده ...ها يا حبيب انوج هتيجى امتى
مينا .. انا تحت بتكم افتحى .... مينا يدخل
ازيك يا انجى
انجى تقرب تبوسه وهو يبعدها تغمز وتقوله ايه ياعم امى ف المطبخ
مينا .. مال عنيكي
انجي .. مال عيني؟؟!!... لا مفيش اصل دخل فعينى تراب
يلا هننزل ولا ايه
مينا طيب نستاذن طنط ..
انجي طنط؟؟ ام عبد السيد بقت طنط ... ماما احنا نازلين
ويطلعوا ويدخلو
انجي .. متيجي جنبي وهو فيه ايه انت قرفان منى ولا ايه
تبصله هو انت ساكت ليه كده مش هتقولى كلمتين حلوين شعرك جسمك عنيكى ده انا حتى لبسه عدسات
مينا بصراحه انا عايز اكلم معاكى فى حاجه انتى استيلك لازم يتغير لبسك ضيق وقصير
الشيطان ... هو هيبداء يتحكم ولا ايه
انجى... يابنى اغير ايه ده انا كل صحابي بيغيروا منى ونفسهم يبقوا زايي انا موووزه
مينا ..ايه موزه دى متتكلمى بطريقه كويسه انتى بنت ربنا
انجى ... بصوت واطى . اااه سكه بنت ربنا لما اجاريه لاحسن يسبنى وانا مصدقتت
معلش حبيبي اصلى اتفرجت على فيلم ولقط كام كلمه . سورى بجد
الملاك لمينا ... يلا معاد الاجتماع
مينا ..طب بقولك متيجى نمشي نروح الاجتماع زمانه بداء
الشيطان ل انجى .. اااه اجتماع ده مش عايز يخرج معاكى ويلغى الخروجه
انجى .. اجتماع ايه ما تفكك بقي انا كنت بروح الاجتماع عشان اصطاد عريس وخلاص لقيته
مينا ... ايه؟
انجى قصدي يا حبيبي كنت بروح علشان اشوفك وادينا اهو مع بعض .. وبعدين عمرى مشفت واحد بيقول لخطبته تعالى نروح الاجتماع كل اصحابى اللى بيتخطبوا بيمنعوا خطابهم من الاجتماع وساعات من الكنيسه اصلا
مينا .. مهو ده الجهل انى امنعك من ربنا ومن الكنيسه وكل صحابك غلط
حلو اوى اننا نروح سوا الكنيسه ونحضر سوا الاجتماع ونسمع كلمه ربنا
انجي.. ايه الواد القفل ده قاعده قدامه ويقولى ربنا
طب بقولك متيجي نتصور سلفي عشان احطها ع النت واغيظ صحابي
مينا يابنتى ايه الهيافه دي .. صور ايه اللى ع النت وافرضي حد خد صورك وركبها على اى مصيبه هتفرحي؟
انجي... تروح تلزق فيه وتقوله طب صوره وحده وتعمل بوز البطه
وتقوله يلا اعمل
مينا اعمل ايه
انجي اعمل بوز البطه انت مش عارف بوز البطه
مينا ااقولك خليكي مع بوز البطه انا اللى غلطان انى اخدت وحده هايفه وسطحيه ومش بنت ربنا بس عشان شكلها حلو ....