حوار مع القديس مامرقس الرسول كاروز الديار المصرية
الاهداف
معرفة سيرة القديس مارمرقس الرسول من خلال اجراء حوارصحفى مع القديس ويتكلم عن نفسه ممكن تعملوا الحوار بالورق ويفهموا المخدومين القصة بسهولة .
بداية الحوار
تدخل المذيعة لتلقى كلمتها ومن ثم ترحب بالقديس عند دخوله .
المذيعة : اهلا بيكم يا اصحابى النهاردة معانا قديس عظيم احنا كلنا بنفتخر بيه وبنقول عليه كاروز الديار المصريةاكيد عرفتوا هو مين طبعا القديس مارمرقس الرسول فى البداية تعالوا نرحب بالقديس
المذيعة : اهلا بيك معانا فى الحوار الصحفى يا قديسنا العظيم
مارمرقس : اهلا بيكم يا اولادى انا مبسوط انى معاكم النهاردة كتير وانا جاى مخصوص عشانكم
المذيعة : فى البداية عايزين نعرف اسمك ايه ومن بلد ايه ؟
مارمرقس : انا يا اولادى عندى اسمين الاول اسم يوحنا وده اسم عبرى معناه الله حنان
والثانى اسم مرقس وده اسم رومانى معناه مطرقة وطبعا انا اتولدة فى بلد اسمها القيروان احد المدن الخمس الغربية بليبيا
المذيعة : ممكن نعرف اسم باباك ومامتك ايه وكمان انت من سبط ايه ؟
مارمرقس : بابا كان اسمه ارسطوبولس و ماما اسمها مريم وانا من سبط لاوى عشان بابا وماما كانوا يهوديين .
المذيعة :انت اتعلمت فى مدارس او كنت تعرف تقرأ ؟
مارمرقس : ايوه طبعا انا كنت شاطر زيكم كدا واتعلمت لغات كمان زى اليونانية واللاتينية والعبرية .
المذيعة : ممكن تقولنا ايه علاقتك بالسيد المسيح ؟
مارمرقس : طبعا انا كنت بحب السيد المسيح وماما كانت بتخدمه من فلوسها كمان وحصلت حاجات كتيره فى بيتنا .
المذيعة : حاجات زى ايه ممكن تحكيلنا ؟
مارمرقس : طبعا السيد المسيح اكل الفصح مع التلاميذ فى علية صهيون وده كان بيتنا وطبعا عملوا سر الافخارستيا في بيتنا كمان
وربنا غسل ارجل التلاميذ بردو وبردو بعد قيامة الرب يسوع كانوا التلاميذ بيجتمعوا فى بيتنا وطبعا بيتنا يعتبر اول كنيسة فى العالم يجتمع فيها الرسل مع بعض .
المذيعة : ياااه حاجات جميلة خالص طيب انت كنت من التلاميذ ولا الرسل ؟
مارمرقس : لا انا كنت من السبعين رسول وخدمت مع بعضهم زى بولس الرسول وبرنابا الرسول .
المذيعة : انت بشرت فى اماكن كتير بالسيد المسيح ؟
مارمرقس : ايوه طبعا انا رحت انطاكيا وقبرص واماكن كتير تانى وطبعا الاهم هى بلدكم مصر .
المذيعة : طيب ممكن تحكيلنا ازاى دخلت مصر مع انه اغلبها فى الوقت ده كانوا وثنيين .
مارمرقس : طبعا انا قبل ما اعمل اى حاجه لازم اصلى كتير واول ما دخلت مصر فى بلد الاسكندرية الشبشب اللى كنت لابسه
اتقطع وعطيته لراجل خياط هناك اسمه انيانوس الاسكافى وطبعا وهو بيخيط فيه راحت الابره دخلت فى صوابعه وقعد يصرخ وقتها.
المذيعة : ياااه صعبة خالص طيب وعملت ايه :
مارمرقس : طبعا صليت وربنا شفاه وبعدين بشرتهم كتيرورسمت انيانوس اسقف وثلاث كهنه وسبع شمامسة .
المذيعة : طيب وعملت ايه تانى ؟
مارمرقس : انشأت المدرسة اللاهوتية وبشرت فى بلاد كتير .
المذيعة : طيب انت كتبت اى حاجه فى الانجيل ؟
مارمرقس : ايوه كتبت انجيل مرقس وفى حاجه تانى غير الانجيل .
المذيعة : ممكن نعرفها ؟
مارمرقس : كتبت القداس الكيرلسى وبعدين طبعا عدل عليه القديس كيرلس الكبير .
المذيعة : طيب ممكن تحكيلنا استشهدت امتى وازاى ؟
مارمرقس : كنت بعمل القداس راح هجم عليا الوثنيين وجرونى بالحبال وطبعا نزفت دم كتير وجسمى اتقطع .
المذيعة : وبعدين حصل ايه ؟
مارمرقس : حطونى فى سجن مظلم وهناك ظهرلى ربنا يسوع المسيح وتانى يوم جرونى تانى لحد ما استشهدت وكانوا عايزين يحرقوا جسدى فى النار لكن ربنا بعت هواء شديد ومطر شديد اطفات النار واخدوا تلاميذى جسدى ودفنونى .
المذيعة : ممكن نعرف تاريخ استشهادك يوم ايه ؟
مارمرقس : كان يوم 30 برمودة سنة 68 ميلادية وطبعا كل سنة بيحتفلوا بيه .
المذيعة : ليه الكنيسة بتقول عليك ناظر الاله ؟
مارمرقس : عشان انا شوفت ربنا يسوع المسيح كتير وكان بيظهر لى بردو عشان كدا بيقولوا عنى ناظر الاله .
المذيعة : اخر سؤال ممكن نعرف انت تبقى رقم كام فى البطاركة بتاعت الكنيسة ؟
مارمرقس : طبعا انا البابا رقم واحد اول بطريرك فى الكنيسة القبطبة ودلوقت البابا تواضروس الثانى 118 يعنى جه بعدى انا 117 بطريرك عشان كدا اى بابا بيجلس على الكرسى بيقولوا عنه كرسى القديس مارمرقس الرسول .,
المذيعة : طبعا فى النهاية نشكر القديس مارمرقس الرسول كاروز الديار المصرية على الحوار الصحفى الرائع وتحب تقول كلمة لاولادنا النهاردة .
مارمرقس : اكيد طبعا انا مبسوط انهم معايا وحابب اقولهم متنسوش انكم تصلوا دايما فى الكنيسة والبيت كمان ونحترم بيت ربنا كتير ونحترم الخدام ومش نتخانق مع بعض ومنزعقش فى البيت ونحترم بابا وماما ونسمع الكلام .
المذيعة : شكرا خالص للقديس مارمرقس الرسول واللى اللقاء مع قديسين اخرين