اسكتش النجاح
اسكتش لحفلة التخرج
* منظر غرفة في بيت وبها كرسيين ثم تدخل سيدة وهي مخضوضة وتتلفت حولها وتبحث عن شيء وهي تنادي: فادي...فادي........إنت فين يا فادي؟؟ وتستمر في البحث وتدخل وتخرج وهي مستمرة في النداء: أنت فين يا ابني؟؟
* تظهر فتاة صغيرة في سن اعدادي تمسك ساندويتش تقضم منه بشراهة وتبدو وكأنها مفجوعة
الأم : أخوكي فين يا داليا؟؟
داليا (تتكلم وفمها محشي بالطعام وهي تهز أكتافها علامة علي عدم المعرفة) : معرفش ...هيكون فين يعني...أكيد بيذاكر.
الأم : لأ ...مش في أوضته (تستمر في الحركة والنداء عليه بينما تجلس البنت وتمسك كتابا وتقرأ فيه وهي مستمرة في الأكل) ......ما تقومي يا بت تدوري معايا علي أخوكي بدل ما أنتي قاعدة كده.
داليا: وأنا هأعمل إيه يعني؟؟ هتلاقيه عالسطح قاعد بيدح هناك....ما هو مبيعتقش
الأم : طب قومي اطلعي ناديله خليه ينزل بسرعة ...أنا عاوزاه
* تقوم البنت في برود شديد وهي مازالت تقضم في الساندويتش وتسأل: هو احنا هنتغدي ايه النهاردة؟؟
الأم: يا ربي ي ي ي ي ي ي ي .......يا بنتي اتحركي ...ماسورة الميه ضربت في بير السلم وغرقت الدنيا....نادي لي أخوكي يشوف سباك ولا يتصرف.
* تخرج البنت وتجلس الأم وتمسك التليفون وتتصل برقم: أيوه يا أبو تامر.....شفت اللي حصل مش ماسورة المية اتكسرت وبير السلم غرقان.
* يأتي صوت الأب من الخلف : ودي ايه اللي كسرها بس ؟؟ خلي تامر يروح يجيب السباك بسرعة
الأم : تامر خرج من بدري...وموبايله مش مجمع معايا.
الأب : خلاص اندهي فادي.
الأم: ما أنا بعت له عالسطح بس مكنتش عاوزة أعطله...مينفعش يعني تجيب لنا أنت السباك؟؟
الأب (يشخط وتبعد الأم السماعة عن ودنها) : وأن هأسيب ازاي المحل والزباين دلوقتي؟؟ خليه هو يروح مش هيجري حاجة
الأم : خلاص ...خلاص...هأخلي فادي يروح له...مع السلامة (تضع السماعة)
* يأتي صوت شاب من الخارج بيزعق: هو الواحد ميعرفش يذاكر في البيت ده؟؟(يدخل كالإعصار وخلفه داليا التي تجلس علي كرسي وتمسك الكتاب): جري ايه يا ماما ؟؟ حرام عليكي أنا مش فاضي
الأم : حرام عليّ ليه يا ابني هو انا عملت لك حاجة ؟؟ يعني نسيب البيت يغرق؟؟
فادي (بعصبية): لأ متسيبيهوش بس كلمي الأستاذ اللي طول اليوم بيلف مع أصحابه.
الأم : وأنا هأجيبه منين دلوقتي...موبايله خارج نطاق الخدمة...معلش بقي ...روح أنت دول كلهم 5 دقايق....عارف السباك فين؟؟
فادي : عارفه....حاضر ...هأروح....(يخرج وهو يتمتم ويدمدم)
داليا : ماما.......
الأم : نعم...عاوزة ايه؟؟
داليا : عاوزة ساندويتش
الأم: تاني؟؟ يا بنتي أنتي مش لسه مخلصة واحد دلوقتي؟؟
داليا : آه بس أنا جعانة
الأم : اقعدي ذاكري دلوقتي والغدا قرب يخلص
داليا : مش هعرف اذاكر وأنا جعانة
الأم (تتنهد) : حاضر هأعمل لك ساندويتش(تقوم وتخرج)
* تمسك داليا التليفون وتطلب رقم: أيوه يا نرمين ..كويس إن أنتي اللي رديتي..بأقولك ايه أنا مخنوقة ما تيجي تقعدي معايا شوية(تسكت وتستمع للحظات) ...لأ مفيش حاجة ..الخناقات العادية بتاعة كل يوم(تسكت وتستمع للحظات) ...ماشي هأستناكي وأنتي راجعة (تضع السماعة)
* تدخل الأم وتناول الساندويتش لداليا وتكاد تخرج لكنها تصطدم بفادي وهو داخل غضبان وتأخذ داليا الساندويتش وتخرج
الأم : إيه ده؟؟ لحقت ؟؟فين السباك؟؟
فادي :شوفوا لكوا حد غيري يجيبه ...دا راجل مبيفهمش
الأم : يعني ايه ؟؟اتخانقت مع الراجل...
فادي(يقاطعها): هو اللي بدأ أنا معملتلوش حاجة
الأم : يااااا دي الحكاية..أنت يا بني علي طول كده واخد في وشك....مش تراعي اننا محتاجينه عالأقل
* يظهر شاب في سن جامعة
تامر: مساااااااااااااااااااااء الخيررررررررررررر(بيغنيها)
الأم: خير وهييجي منين الخير ده؟؟أنت مشفتش البركة اللي في بير السلم
تامر :آه ...حلو حمام السباحة اللي تحت ده....أنتوا ناويين تتدربوا للأوليمبياد ان شاء الله؟؟
فادي : أيوة ... طبعاً ... حضرتك جاي بتتريق و لا في بالك
الأم : معلش يا تامر يا حبيبي .... تروح تجيب لنا السباك أصل ...
تامر (بيقاطعها) : عينيَّ يا أم تامر .... إيدك علي 20 جنيه
الأم : 20 جنيه ليه ؟ روح هاته و بابا هو اللي هيحاسب
تامر : ما انتي عارفه يا أم تامر ... ده لزوم الشغل .... شاي ... قهوة .... يحتاجوا جبس ... أسمنت ... مش عارف إيه
الأم : ماشي .... إتفضل (تناوله الفلوس ) أما أروح أشوف الأكل
(تخرج الأم)
فادي : حضرتك راجع فايق و رايق ... هي النتيجة ظهرت و الا لسه ؟
تامر (يضع يده علي فمه ): هس .. بس .. متفتحش الموضوع ده دلوقتي فادي : ليه خير ؟ سقطت تاني ؟
تامر : لا الحمدلله ............ ربنا ستر .......... مادتين بس
فادي : مادتين في الترم الاول ... ايه التفوق ده ؟
تامر : بقولك ايه ...... متعيش الدور معايا ... انا خلاص دخلت كلية و مستقبلي اتحدد ... الدور و الباقي عليك يا بتاع ثانوية عامة
فادي : الدور الللي عليا يا خويا أنا بعمله كويس و بابا و ماما شايفين كده كمان ... أنا الوحيد فيكو اللي بذاكر كويس و مش باتعبهم خالص
تامر : ماشي يا باشا ... أنا عارف إني أنا الفاشل اللي في البيت ده ... امسك لسانك بقي يومين...هه ... سلام (يخرج )
(يجلس فادي و ينادي بصوت عالي ) : ماما كوباية شاي متينة (يكمل بصوت منخفض ) خليني اعدل دماغي اللي عوجهالي السباك الغبي ده .
(تمر داليا من أمامه و هي تاكل الساندويتش )
فادي : كفاية أكل يا بنتي ...... حرام عليكي
داليا : خليك في نفسك
فادي : أنا خايف عليكي هتتخني
داليا : حل عني بقي عاوزه اذاكر .......... مش انت بتشرب الشاي عشان تعرف تذاكر ......... انا كمان باكل عشان اعرف اذاكر
(تخرج و هي غاضبة )
فادي : هي السندويتشات كمان بتصحصح زي الشاي ؟؟؟
(يدخل الأب من نفس المكان الذي خرجت منه داليا و الغضب يبدو علي ملامحه و يراه فادي فيقف )
الأب : إيه يابني اللي انت عملته ده ؟
فادي (مرتبكاً) : عملت ايه يابابا
الأب : رايح للراجل تشخط فيه و تزعق له و تقول له قوم سيب اللي في ايدك و تعال معايا ؟ ... مش عارف تتفاهم مع الناس بالهداوة
فادي : و انا هاعمل ايه يعني ؟... ما انا ورايا مذاكرة و عاوز ارجع بسرعه
الأب (بشخط ) : خلاص يعني .. هي الساعه دي اللي هتضيع مستقبلك ؟
فادي : هو انتوا طول اليوم تقولوا ذاكروا .. ذاكروا .. و لما نيجي نذاكر تعطلونا ؟
الأب : إحنا مش بنعطلك ... احنا مش عاوزينك تدخل هندسه و ف الآخر تطلع دكتور مكشر علي طول ولا مهندس فاشل مش عارف يتفاهم مع الناس إلا بالخناق و الشخط.
فادي : و المطلوب مني ايه دلوقتي ؟
الأب : هتنزل معايا المحل ساعتين كل يوم خميس ... علي الأقل تتدردح شوية و تتعلم إزاي تتعامل مع كل الناس
فادي : يعني هاسيب مذاكرتي ؟ و...........
الأب (يقاطعه ) : و لاكلمة .... هتيجي معايا يعني هتيجي معايا ..... اتفضل
(يخرج فادي غاضبا و يصطدم بالأم و هو خارج )
الأم: علي مهلك يابني ...(تلتفت للأب الذي يجلس ) حمدالله ع السلامة يابو تامر ... تعبت نفسك و جيت ليه ... ماهو تامر جه و بعته للسباك
الأب : ما انا قابلته في السكه أصل الزحمة اللي عندي في المحل خفت فقلت اروح أشوف السباك راضيته بكلمتين و سايب تامر معاه تحت دلوقتي ..... الغدا خلص ؟
الأم : أيوة جاهز ..(تنادي بصوت عالي ) داليا ... يا داليا الغدا خلص لو عاوزه تاكلي
الأب : هي هتأكل تاني ؟؟ دا أنا لسه شايفها طالعه و ماسكه ساندويتش في ايدها
الأم : ماهي عماله تقولي لي جعانه كل شوية ... أنا قلقانه عليها البت دي ... زي ماتكون بتفش غلها في الأكل
الأب : و هي المفعوصة دي هتبقي مغلولة من ايه ؟
الأم : أنا عارفه .......... هي أصلها حساسه قوي و بتعبي جواها كل حاجه وملهاش صحاب كتير...أو يمكن تكون متضايقة من المذاكرة.
الأب : المذاكرة .......... المذاكرة أنا بدأت أندم إننا طول عمرنا ضاغطين ع الولاد قوي كده بالمذاكرة و كأن مفيش حاجه في الدنيا غيرها
الأم : و احنا هنعمل ايه ؟ ماهو ده حال الكل
الأب : علي رأيك بس احنا لازم نشوف لنا حل في داليا
الأم : أنا بأقول نشجعها تطلع رحلات مع أصحابها أو تخرج معاهم زي اللي في سنها بدل الحبسة دي.
الأب: أنا موافق ...أهي أي حاجة تشغلها عن الأكل والسرحان اللي هي فيه ده
(يدخل تامر )
تامر : كله تمام يا باشا
الأب : حاسبته ؟
تامر: طبعا و مشي مبسوط ع الآخر
الأب : أنا مبسوط منك يا تامر ... إنت راجل و بتسد في المواقف اللي زي دي
تامر : أنا تلميذك يا سعادة الباشا
الأم : أخبار نتيجة الترم الأولاني ايه يا تامر؟؟ أنت مش كنت في الجامعة النهاردة؟؟
تامر (مرتبكاً): وأنتي ايه اللي فكرك بالموضوع ده دلوقتي؟؟
الأم(مخضوضة) : إوعي تقول لي انك سقطت تاني
تامر : لأ ..الحمد لله...جت سليمة المرة دي......مادتين بس
الأب(يبدو في صوته الغيظ): لاااأ ..ممتاز...برافو عليك...دا أنت تستاهل جايزة.
تامر: يا بابا دا أحسن من كل سنة .....عالأقل مسقطتش.
الأم : طبعا ...وأنت هتنجح ازاي ؟؟وانت طول اليوم في الشارع مع صحابك
الأب :اعمل حسابك لغاية متنجح وتعدي السنة دي ..مفيش خروج إلا يوم الخميس بس .... ومتفكرش تقول لي أطلع رحلة....اتفضل امشي من قدامي...
تامر(غاضبا): يا بابا.......
الأب(مقاطعا وبشخط ) : اتفضل دلوقتي..........(يخرج تامر)
الأم: عاجبك كده.... وتقول لي اننا بنضغط عليهم في المذاكرة
الأب : صدقيني أنا احترت........ اللي بيذاكر كويس ومبيتعبناش وقت الجد يغرق في شبر ميه....والتانية عشان تذاكر لازم تأكل يا إما نفسيتها تتعب..... واللي يقف معانا وقت ما نحتاجه يطلع عينينا عشان يذاكر ويأخد السنة في سنتين....... مش عارف أعمل ايه؟؟
الأم : متضايقش نفسك.... ما هو مش معقولة يبقوا معندهمش مشاكل
الأب : أيو ...بس احنا كان لازم نأخد بالنا من الأول بدل ما نركز علي حاجة واحدة ونسيب الباقي....دا احنا حتي ركزنا علي نجاحهم وتفوقهم أكتر ما بنركز علي علاقتهم بربنا .... وبنحاسبهم علي المذاكرة ومبنسألهمش حتي راحوا الكنيسة ولا لأ؟؟ تفتكري الوقت عدي علي اننا نصلح الحاجات دي؟؟
الأم: لأ طبعا أكيد الوقت معداش وهما لسه صغيرين وممكن يتعلموا.
الأب: المهم احنا اللي نتعلم......ياللا بينا نتغدي (يقومان ويخرجان)
منقول من جروب نصوص واسكتشات مسيحية