اسكتش احد المخلع مع فرفورة وسرحان

اسكتش احد المخلع فرفورة وسرحان

 لكل الخدام اسكتش حلو جدا عن احد المخلع

( مريض بركة بيت حسدا )  ممكن تعملوه فى مدارس الاحد فقرة افتتاحية ويعرفوا قصة احد المخلع وينفع تعملوه عرايس ويستفادوا من الدرس مناسب لمراحل ابتدائى واعدادى  منقول الرب يعوض كل من له تعب فى الخدمة 

الشخصيات : سرحان – فرفورة – الراجل المريض - الملاك

سرحان : ياسلام احلى حاجة هى النوم

فرفورة : ازيك ياسرحان

سرحان : اهلا ايه النور ده كله عمله ايه يا فلفولة

فرفورة : فلفولة ايه يا عم انت الدغ ولا لسانك ملسوع فى حاجة

سرحان : طب وليه الغلط ده بث ده انا بضحك معاكى 

فرفورة : بص بجد انا مديقه جدا ومش عايزه حد يهزر معايا

سرحان : ليه بس كده حد ضربك ولا ايه قوليلى وانا افشفشه

فرفورة : ياعم روح وانت لو عصفورة قربت منك بيغم عليك

سرحان : انتى بتتريقى عليا طيب اناغلطان بس بجد انتى زعلانه ليه

فرفورة : لا مش هقولك

سرحان : لا عشان خاطرى قوليلى عشان خاطرى بقى قولى بقى ياله يا بوثبوث

فرفورة : يا اخى انطق اسمى عدل بقى فرفورة قول ورايا

سرحان : بوثبوث

فرفورة: انت بنص لثان ولا ايه

سرحان : خلاص بقى مش مهم ها انتى زعلانه ليه بقى

فرفورة : مفيش اصل انا كنت فى الكنيسة

سرحان : وديه حاجة تزعل 

فرفورة: وبعدين........ هتسبنى احكى ولا امشى

سرحان : خلاص كملى رحتى الكنيسة وبعدين

فرفورة : لقيت واحد عمال يصلى 

سرحان : ودي فيها ايه ما كل الناس بتصلى فى الكنيسة

فرفورة : خلاص انامش هكمل

سرحان : خلاص معلش انا مش هقطعك تانى ،ماله الراجل الى كان بيصلى ده

فرفورة : كنت حاسة كده انه عمال يتخانق مع ربنا

سرحان : بيتخانق ازاى يعنى 

فرفورة : مش عارفة عماله يقول اشمعنا انا وليه يارب ومش ليه يارب وكلام زى كده

سرحان : يمكن يكون مجنون وعمال يقول اى كلام

فرفورة : لا يا اخى مجنون وداخل يصلى فى الكنيسة

سرحان : طب صدقينى تلاقيه مجنون وبيكلم نفسه وانتى افتكرتيه بيصلى

فرفورة : انا اللى شوفته وبقولك انه شكله مش مجنون 

سرحان : طيب ترهنينى هو لسه فى الكنيسة 

فرفورة : اه انا مشيت وهو كان لسة موجود هناك 

سرحان : خلاص احنا نروح ونشوف كلام مين الى صح

فرفورة : انا موافقة

مشهد ثانى (فرفورة وسرحان يروحوا الكنيسة)

فرفورة : اه هو الراجل ده ..........ها هنعرف ازاى دلوقت 

سرحان : ولا حاجة احنا نروح نكلم معاه وهيبان من كلامه اذا كان عاقل ولا لاسع

فرفورة : طيب ياله روح انت كلمه الاول

سرحان : اشمعنا انا ماتروحى انتى

فرفورة : الله مش انت الولد

سرحان : دلوقتى انا الولد ما انت من شويه كنت هتضربينى

فرفورة : هتروح تكلمه ولا نمشى وتبقى انت اللى خسرت الراهان 

سرحان : خلاص رايح اهو

سرحان : مساء الخير 

الراجل : ليه ليه

سرحان : ليه ايه طب مساء النور

الراجل : اشمعنا انا اشمعنا انا بس

سرحان : يا حول الله يارب طيب اقوله ايه ده ........انا بقول ياله نمشى

فرفورة : ايه انت مش هتكلمه ولا ايه

سرحان : اكلم مين انتى مش شايفه عمال يقولك ليه واشمعنا، ده شويه وهيضربنا

فرفورة : خلاص انا هروح اكلمه 

سرحان : براحتك بس خدى بالك ليهبش فيكى

فرفورة : لو سمحت ياعموا 

سرحان : وده حد يقوله يا عموا

فرفورة : هس

الراجل : ايوة يابنتى

سرحان : كفارة اخيرا رد

فرفورة : مقولتلك اسكت

سرحان : خلاص سكت اهو

فرفورة : انا فرفورة وده سرحان صحبتى كنا عايزين نطلب من حضرتك طلب لو سمحت يعنى

الراجل : طلب... انا يا بنتى معنديش اى حاجة ادهالك 

فرفورة : لا ياعمو انت فهمنتنى غلط احنا كنا عايزين نعرف حكايتك ايه وليه بتكلم ربنا كده

الراجل : هو صوتى كان عالى قوى كده....طيب اعمل ايه ما انا مش فى ايدى حاجة

سرحان : احنا بجد يا عموا عايزين نعرف حكايتك

الرجل : حكايتى يا ابنى انى من وانا عمرى عشر سنين وانا عمال اتصاب بالامراض وكل مرض اتصاب بيه قعد فترة كبيرة على ما اتعالج منه وبعد ما اتعالج منه اتصاب بمرض تانى واهو حياتى ماشيه على كده فا انا خلاص زهقت وربنا لا عايز يا خدنى ولا يشفينى وخلاص تعبت من الدكاتره والادويه وزهقت من حياتى كلها يارب خدنى بقى خدنى بقى

فرفورة : لا يا عموا مش هو ده الحل يمكن يكون ربنا بيجربك وبيشوف قوة ايمانك قد ايه

الراجل : عشرين سنه بيجربنى

سرحان : ربنا ياعمو هو الى بيسمح بكده ومش معنى ان الامراض ديه عندك ان ربنا بيعاقبك او بيكرهك بالعكس ربنا بيحبك جدا وهو عارف ان هتقدر تتحمل قد ايه

فرفورة : بس المهم ياعموا انك تصلى من قلبك وتطلب من ربنا انه يشفيك من غير ما تتخانق معاه او تلومه لان ربنا هو الى ادانا حياتنا وصحتنا والحاجات ديه بتاعته فمينفعش نلومه لما يطلبها منا

سرحان : واكيد يا عمو لو صليت من قلبك ربنا هيشفيك وهيخففك من كل الى عندك

الراجل : انا متشكر اوى يا ولادى على كلامكم وانا هصلى لربنا من قلبى وانا واثق ان المره ديه هيسمعلى ويشفينى

سرحان : وانا ياعموا عايزك تسامحنى لانى كنت بتريق عليك بجد انا اسف انا مكنتش اعرف حكايتك

الراجل : انا مش زعلان يا ابنى المهم انك تصلى عشانى

فرفورة : طيب احنا لازم نمشى دلوقتى لاننا اتاخرنا

الراجل : اتفضلى يا بنتى سلام 

فرفورة و سرحان : سلام

المشهد الثالث (الراجل يصلى وفرفورة وسرحان يغادروا)

الراجل : يارب سامحنى ان كنت بكلمك وحش ودايما بزعلك منى لكن يارب لو انت بتحبنى بجد ومسامحنى اشفينى يارب لانى تعبان قوى ومش قادر اعمل حاجة بشفاعة ام النور ومارمينا ومارجرجس ومار........

الملاك : انت مالك زعلان ليه

الراجل : ايه ده باسم الصليب انت مين

الملاك : انا ملاك الرب بعتنى علشان اشفيك

الراجل : ياه اخيرا ربنا استجاب ليا وسمع لصلاتى بعد كل السنين ديه

الملاك : ربنا سمع ليك لما صليت من قلبك لكن قبل كده انت كنت بتعاتب ربنا وبتتذمر عليه وكأنك بتامره انه يشفيك

الرجل : غصب عنى انا بقالى كتير عيان والمرض تعبنى قوى

الملاك : ديه مش حجه تخليك تتذمر على ربنا انت عارف انا زمان ربنا امرنى انى انزل كل سنة يوم واحد لمكان اسمه بيت حسدا علشان احرك ميه كانت موجوده فى بركة وكنت بعد ما بحرك الميه اول واحد ينزل البركة كان بيخف من اى مرض 

الراجل : ثوانى مش هى ديه بركة بيت حسدا الى ربنا شفى عندها المخلع

الملاك : مظبوط هى البركة ديه وانا كنت الملاك الى بحرك المية بتاعة البركة طيب انت عارف ان الراجل المخلع ده كان بقاله 38 سنة تعبان وكانت كل مشكلته انه مش لاقى حد يزقه فى الميه بعد ما انا احركها ومع ذلك عمره ما اتذمر على ربنا او صلى وهو بيزعق ومتنرفز ذى ما انت كنت بتعمل علشان كده السيد المسيح بنفسه راحله عند البركة وشفاه وكمان غفرله كل الخطايا بتاعته

الراجل : ياه فعلا انا غلطان واستحق الى انا فيه وانا مش بطلب من ربنا يشفينى قد ما بطلب انه يسامحنى على انى غلط فى حقه وزعلته منى كتير

الملاك : كده انت فعلا اتعلمت اننا دايما نكون واثقين فى ربنا واننا لما نيجى نطلب حاجة من ربنا منطلبهاش كاننا بنامره ولو محققهاش نزعل منه ونبقى مضايقين من ربنا بس هو الى عارف امتى وفين هيحقق طلبتنا عشان كده انت خفيت من كل الامراض الى عندك لانك اتعلمت اذاى تتكلم مع ربنا 

الراجل : ايه ده انا خفيت خفيت ياه بعد كل السنين ديه شكرا ليك يارب وانا اسف على الى كنت بعمله قبل كده وانا بصلى، انت بجد حنين قوى يارب وبتحبنا خالص.

منقول من جروب نبض الخدمة وجروبات الخدمات الرب يعوض كل من له تعب فى الخدمة