اسكتش الحمار حوحو والاتان توتو
لكل الخدام اسكتش احد الشعانين
مناسب لحضانه وابتدائى
الشخصيات حمار بابا (حوحو ) والحمار ابنه ( توتو )
الذى ركب عليهم الرب يسوع اثناء دخوله اورشاليم
ممكن تعملوه فى الافتتاحية لمدارس الاحد
بطرس ويوحنا والسيد المسيح
يدخل الحمار حوحو ينهق ه ه ه ه
الحمار حوحو : ياااه الجو النهارده برد خالص وشكل الواحد كدا هيعطس وياخد شوية برد اما اشوف ابنى الصغير فين
يا توتو يا توتو فينك يا توتو
الحمارتوتو : ايوه يا بابا حوحو انا هنا بجيب اكل وشويه حشيش من هنا انا جاى اهو
الحمار حوحو: يلا يا توتو عشان تلبس حاجه تقيلة عشان الجو برد نهارده خالص
الحمار توتو : حاضر يا بابا حوحو
الحمار حوحو : وكمان فى حاجه تانى هقولك عليها
الحمار توتو : خير يا بابا حوحو
الحمار حوحو: انا سمعت من شويه كدا ان السيد المسيح بيعمل معجزات والناس كلها هايصه وهيدخل اورشاليم ياترى هيعملوا ايه
الحمار توتو : مش عارف طيب تعال يا بابا حوحو نقف فى الشمس شويه عشان الجو برد وكمان نشوف فى اى يلا بينا
يخرج الحمارين يدخلوا تانى
الحمار توتو : يااااه يابابا حوحو الجو هنا دافى خالص
الحمار حوحو : ياااه بص كدا يا توتو شوف مين اللى جاى من بعيد كدا
الحمار توتو : ده اتنين شكلهم جايين ياخدونا
يدخل بطرس ويوحنا
بطرس : يلا يا يوحنا نعمل زى ما قالنا المعلم وناخد الحمارين دول عشان المعلم عايزيهم
يوحنا : حاضر يا بطرس
الحمار توتو : مين المعلم ده يا بابا حوحو
الحمار حوحو : ده الرب يسوع يا توتو وشكلهم كدا جايين ياخدونا يا ترى هيعملوا بينا اى
الحمار: توتو : يلا يا بابا حوحو نروح معاهم وخلاص
يخرج الجميع
يدخل بطرس ويوحنا ومعهم الحمارين
بطرس : يا معلم يا معلم احنا جبنا الحمارين اهم
يدخل السيد المسيح: ايوه يا بطرس انا هركب عليهم دلوقت عشان نروح اورشاليم
الحمار حوحو : ياااه يا توتو شوفت السيد المسيح بنفسه هيركب علينا واحنا هناخد بركة كبيره خالص عشان هو ده خالق العالم كله وخالقنا يا توتو .
الحمار توتو : ايوه يا بابا حوحو لازم نبقى حلوين ونسمع الكلام ونستحمل المشوار
الحمار حوحو : ايوه صح لازم نسمع الكلام
يخرج الجميع
ويدخل الحمار حوحو و توتو
الحمار حوحو : شفت يا توتو الناس كانت بترمى سعف فى الارض وبتفرش قدامنا ازاى والسيد المسيح كان راكب علينا لحد ما دخلنا اورشاليم والناس كانت بتقول مبارك الاتى باسم الرب واحنا كنا فرحانين خالص خالص
الحمار توتو : ايوه صح يا بابا حوحو انا كنت مبسوط خالص
الحمار حوحو : واحنا لازم نسمع الكلام علطلول ومنعملش حاجه غلط عشان الناس تبقى مبسوطة بينا خالص
يوجه كلامه للاطفال
لازم يا اولاد تسمعوا كلام بابا يسوع فى الانجيل وتسمعوا كلام بابا وماما فى البيت ومنعملش هيصه فى الكنيسة وكمان نقف كويسه فى القداس عشان بابا يسوع زعل خالص هو داخل الهيكل والناس كانت بتهيص خالص هناك فاحنا لازم نبقى كويسين ونحترم بيت ربنا
يلا بينا عشان اتاخرنا ونروح ننام يلا باى يا اصحابى باى باى