حوار صحفي مع يونان

حوار صحفى مع يونان

اهداف الحوار 

1- معرفة قصة يونان النبى من خلال حوار يدور معه .
2- توصيل فكرة القصة فى الحوار للتسهيل على المخدومين.

بداية الحوار 

يبدأ الحوار من خلال ميس مدارس الاحد وفى وسط المخدومين ومعهم شخصية يونان النبى .

میس مدارس الاحد: يونان ....يونان ...ازيك ...عامل ايه ؟...احنا بنسمع ان انت نبی عظیم قوى قوى ممكن تحكى لنا حكايتك؟
یونان: طيب اسألوني وانا اجاوب علشان اشوفكم شطار في الاسئلة ولا لأ ؟ ولو  اصحابی عارفين الاجابة ياريت هما اللى يجاوبوا وانا حكمل لو فيه حاجة ناقصة .
میس مدارس الاحد: یعنی ایه اسم یونان ؟
ومين باباك ومين مامتك؟
ويا ترى انت كنت من انبياء العهد القديم ولا الجديد؟
یونان: معنى اسمى (حمامة )، وبابايا اسمه امتاى ومامتي اللي كانت ارملة في مدينة صيدا ولما انا مرضت وتعبت خالص قالت لايليا النبي انه يخليني اخف وكمان اقوم بعد ما اموت .

وانا من انبياء العهد القديم يعني قبل مجئ السيد المسيح .
میس مدارس الاحد: طيب ايه المهمة اللي ربنا قالك عليها ؟
ولیه ربنا اختارك انت بالتحديد؟
یونان :ربنا قاللی اروح ابشر مدينة اسمها نينوى وهي مدينة عظيمة والملك  بتاعها قوى جدا لان شرها ازداد امام ربنا وعايزهم يتوبوا ويرجعوا عن خطاياهم .

بس انا قلت اهرب من ربنا وربنا اختارني انا لاسباب کتیپپپپر قوی.

ربنا عارف انى بخاف ومش جرئ وانی حخاف اروح هناك ، فحب ربنا يعلمنى انى مخافش مدام هو معايا لانه بيحميني .
انا عارف انها مدينة شريرة وبيعملوا شر كثييير لكنهم لو تابوا ربنا حيغفر لهم وانا حطلع كذاب قدامهم فربنا حب يعرفني اهمية كل نفس امام الله وان احنا كلنا مهمي عنده قوی قوی قوی .
انا كنت فاكر انى ممكن اهرب من ربنا بس ربنا حب يقولي مهما رحت لابعد مكان انا شايفك وعارف مكانك .
انا عارف ان كان فيه حروب كتير بين ملك اسرائيل 

(المملكة اللي انا عايش فيها) وملك مدينة نينوى وانا مش عايز اروح لاعدائنا ، لكن ربنا حب يفهمني اني احب كل الناس حتى اعدائنا ، وان ربنا عظيم بيدعو كل الناس لمعرفته حتى الناس اللي بيننا وبينهم حروب ومشاكل .
میس مدارس الاحد: طيب عملت ايه یا یونان علشان تهرب من ربنا؟
یونان: قلت اهرب لابعد مكان . فلقيت سفينة من مدينة يافا رايحة ترشيش (اسبانيا حاليا) وديه كانت مدينة بعيدة قوى بالنسبة لي وفعلا ركبت السفينة علشان اهرب من ربنا.

 ودخلت السفينة ونمت وانا واثق ان انا هربت من ربنا خلاص
میس مدارس الاحد: وبعدين يا يونان ؟ ايه اللي حصل ؟
یونان: ربنا طبعاً عارف كل حاجة وشايفني ..اطلق ريح شديدة جداا فهاج البحر  على السفينة والبحارة خافوا جدا وعملوا حاجة حلوة قوى...عارفين ايه هي؟ 

صلوا لالههم كل واحد صلى لالهه وقالوا احنا نرمي الامتعة اللي هي الشنط كلها في البحر علشان البحر يهدأ لكن مفيش فايدة .

ميس مدارس الأحد: وكل ده وانت نايم؟
یونان: نايم نوم هروب ومش عايز أقوم وخايف.

لكن جه واحد منهم قاللي قوم صلى لالهك وبعدين قالوا احنا نعمل قرعة نشوف مين هو سبب المشاكل ديه طبعاً وقعت القرعة عليا. 

میس مدارس الاحد: عملوا ايه معاك يا يونان؟
یونان: سألوني مين انا وليه البحر هاج بالشكل ده حكيت لهم كل حاجة وقلت لهم  ده بسببي وعرفوا ان الهي هو اعظم اله وهو خالق البحر والسما وكل حاجة وقلت لهم يرموني في البحر علشان البحر يسكت وفعلاً البحر سكت وعرفوا ان الهي اله عظيم فشكروا ربنا وذبحوا ذبائح .

میس مدارس الاحد: ياترى ربنا ساب يونان يهلك في البحر ويموت؟ ولا بعث له ايه؟

البنات: بعت له حوت كبير وقعد فيه يونان ۳ ایام و ۳ لیالی .
میس مدارس الاحد: ياترى ايه شعورك وانت في بطن الحوت يا يونان؟
 يونان: الدنيا ظلمة خالص خالص خالص ...مفيش نور وانا كنت خايف والحوت كل  ما يبلع حاجة ياكلها انا كنت بخاف قوى وكنت لوحدى ومحدش موجود معايا وكنت جعان مفیش ای اکل اکله تتصوروا ان انا لوحدي في مكان ظلمة .

فصرخت لربنا و قلت صلاة حلوة خالص فربنا سمع صلاتي وخلى الحوت يقذفني على الشط .
میس مدارس الاحد: وياترى ربنا كلمك تانى علشان تروح نینوی؟
يونان: ايوة وقاللي اروح مدينة نينوى وابشر هناك واقولهم ان بعد 40 يوم ربنا هيهلك المدينة ان مكنتوش تتوبوا وترجعوا عن الشر اللي انتم فيه ربنا هيهلك المدينة وفعلاً تابوا ورجعوا لربنا وصاموا لربنا 3 ايام ولبسوا لبس قديم خالص عندهم حزن على خطاياهم اللي عملوها قدام ربنا وصرخوا لربنا وصلوا كلهم وفعلا ربنا
 استجاب لهم وغفر خطاياهم .
ميس مدارس الأحد: وطبعاً يا يونان انت فرحت خالص لتوبتهم؟
يونان: انا مش كنت فرحان لتوبتهم وعارف ان ربنا حيرفع غضبه عنهم لانه رحيم ورؤوف وزعلت لان ربنا رفع عليهم غضبه وماأهلكش المدينة مع انهم كانوا اشرار لكن ربنا حب يوضح لي محبته للبشر وقد ايه بيحب البشر لانهم من صنع ايديه وان كل نفس غالية قوى قوى عند ربنا .
ميس مدارس الأحد: ازای یا یونان؟
يونان: بعد ما خرجت من المدينة لقيت الجو حر قوى والشمس حامية فلقيت ذي مظلة ونمت تحتها ولما صحيت لقيتها بقيت شجرة صغيرة فوقى ربنا اوجدها علشان تظلل على وبعد يوم لقيتها ذبلت واكلتها دودة فزعلت عليها قوي فربنا قاللي انت زعلان على الشجرة الصغيرة اللي هي بنت يوم وبنت ليلة ومكنتش عايزها تذبل
اومال انا المفروض اشفق على اهل نينوى واغفر خطيتهم وهم شعب عظيم وكثير ازای اهلكهم .
 میس مدارس الأحد : طیب نلاحظ یا اصحابی آن یونان مش سمع كلام ربنا ما كنش مطيع لكن الشخصيات اللي ف القصه سمعت كلام ربنا ذي مين؟ البحر والحوت والدودة والشجرة الصغيرة وأهل نينوى.

 يبقى احنا كمان لازم نسمع كلام ربنا وقصة يونان خلت أهل نينوى يرجعوا عن خطيتهم ومين كمان أمن بربنا؟ 

فعلا البحارة البحارة اول ما لقوا البحر هاج صلوا كل واحد لالهه ...الصلاة اول ما اقع في اي ضيقة ربنا عارف ضعف يونان ولكن اختاره يبشر بلد عظيمة علشان يقولنا مش بقوتكم تعملوا .
اى حاجة دة قوتي وانا اللي بعمل مش انتم. فنترك كل حاجة لربنا

منقول من جروب الخدمة الرب يعوض كل من له تعب فى الخدمة